Бумбгузорӣ дар шаҳрҳои мухталифи Ироқ 19 кушта барҷой гузошт
Инфиҷори чанд бумб дар соъоти шулуғи субҳи рӯзи душанбе (15 апрел) дар чанд шаҳри Ироқ ба кушта шудани дастикам 19 нафар ва маҷрӯҳ шудани шумори дигар мунҷар шудааст.
Интизор меравад, ки бар шумори талафоти ношӣ аз ин инфиҷорҳо афзуда шавад.
Илова бар Бағдод, пойтахти Ироқ, шаҳрҳои Фалуҷа ва Каркук ҳам ҳадафи ин бумбгузориҳо қарор гирифтаанд.
Ин ҳамалот дар ҳоле сурат гирифта, ки қарор аст интихоботи устонӣ дар ин кишвар дар 20 апрел (баъд аз 5 рӯз) баргузор шавад.
То кунун ҳеч гурӯҳе масъулияти ин ҳамалотро бар уҳда нагирифтааст.
Ин аввалин интихобот аз замони хуруҷи нерӯҳои омрикоӣ аз Ироқ аст.
Рӯзи гузашта ҳам яке аз номзадҳои интихоботӣ ҳадафи ҳамла қарор гирифт ва кушта шуд
Дар ҳафтаҳои ахир беш аз 11 номзади интихоботи порлумонӣ ба зарби гулӯла кушта шуданд.
Инфиҷори чанд бумб дар масҷиде дар шаҳри Бағдод ва Канъон дар устони Диола ҳам дар рӯзи ҷумъаи гузашта (12 апрел) ба кушта шудани 11 нафар ва маҷрӯҳ шудани беш аз 70 нафар мунҷар шуд.
Гузоришҳо аз боло будани танишҳо байни шиъиён ва сунниҳои сокин дар Ироқ ҳикоят дорад.
Аксарияти мусалмонони суннимазҳаби Ироқ аз ин ки тавассути давлати шиъаи таҳти раҳбарии Нурӣ Моликӣ, нахуствазир, ба ҳошия ронда шудаанд, шокӣ ҳастанд.
Ҳарчанд аз мизони хушунатҳо дар Ироқ дар муқоиса бо солҳои 2006 ва 2007 ба мизони зиёде коста шуда, аммо бумбгузорӣ дар ин кишвар ҳамчунон амре оддӣ аст.