Шамсиддинова: “Аз шавҳари нопадидшудаи ман то ҳол хабаре нест”
Ҳамсари Салим Шамсиддинов, раиси ҷамъияти узбактаборони вилояти Хатлон мегӯяд, бо гузашти 25 рӯз аз нопадид шудани шавҳараш то ҳол аз вай хабаре ба даст наомадааст.
Ин дар ҳолест, ки як масъули бахши вазорати умури дохила дар ҷануби Тоҷикистон мегӯяд, ки кормандони онҳо аз ҳудуди камтар аз як моҳ машғули ҷустуҷӯйи оқои Шамсиддинов будаанд.
Эминҷон Ҷалилов, муъовини раиси ин бахш ба Би-би-сӣ гуфт, рӯзе, ки писар ва хонуми оқои Шамсиддинов дар бораи нопадид шудани вай ба онҳо арз карданд, фаъъолиятҳои ҷустуҷӯӣ оғоз шудааст.
Оқои Ҷалилов афзуд, ки парванда дар бораи нопадид шудани оқои Шамсиддиновро боз ва ҷустуҷӯйи ӯро идома медиҳанд. Вай гуфт, ғайб задани Салим Шамсиддинов ангезаи сиёсӣ надорад ва касе дар ин ҳодиса муттаҳам набудааст.
Ин дар ҳолест, ки дар авохири моҳи марти соли равон, раиси ҳизби сусиол-демукроти Тоҷикистон дар муроҷеъатномаи расмии худ унвонии Ваколатдори оид ба ҳуқуқи инсон, Кумитаи давлатии амнияти миллӣ ва Вазорати кишвари Тоҷикистон, аз мақомоти ин ниҳодҳо хоста, ки ба қазияи нопадид шудани раиси ҷамъияти узбактаборон вилояти Хатлон расидагӣ кунанд. Раҳматило Зойиров он замон гуфт, ки эҳтимол дорад Салим Шамсиддинов бо далоили сиёсӣ боздошт шуда бошад.
Раҳматилло Зоиров ба Би-бисӣ гуфт, ки нигарониҳои худро дар мулоқот бо мақомоти бахши вазорати кишвар дар шаҳри Қурғонтеппа изҳор доштааст.
Вай гуфт: “Онҳо якчанд фарзия пешниҳод кардаанд, ки гӯё нопадид шудани Шамсиддинов ба сиёсат рабте надорад. Аммо ман гуфтам, то замоне, ки далелҳо барои тасдиқи ин ё он фарзия пешниҳод нашавад, ман аз бовари худам барнамегардам.”
Аз сӯйи дигар пайвандони Салим Шамсиддинов аз нопадид шудани сарпарасти хонавода изҳори нигаронӣ карда мегӯянд, ки то ҳол иттилоъи сиҳате дар мавриди дар куҷо будани ӯро дарёфт накардаанд. Бибиниссо Шамсиддинова, ҳамсари вай гуфт, ки баъди 24 соъати нопадид шудани шавҳараш ба пулис муроҷеъа кардааст.
Хонуми Бибиниссо мегӯяд, ки бо гузашти 25 рӯзи аз хона баромадани шавҳараш то ҳол аз ӯ хабаре надорад. Вай афзуд: “Салим ҳар субҳ барвақт аз хобаш бар мехест ва дар ҳавои тоза қадам мезад. Вале он рӯз субҳ аз хона баромаду дигар барнагашт. Пулис мегӯяд, ки мо дар ҷустуҷӯи Салим ҳастем, аммо наход, ки то имрӯз ҳеҷ хабареро дар мавриди вай пайдо накарда бошанд?”
Ӯ мегӯяд, ки ба бахши умури дохилии шаҳрӣ ва додситони вилояти Хатлон низ дар мавриди ғайб задани шавҳараш шикоят бурдааст.
Аммо хонум Шамсиддинова мегӯяд: “Се рӯз қабл аз ғайб задани Салим, раиси ҷамъияти узбактаборони Тоҷикистон бо номи Муҳаррама субҳ назди дари манзил омада ва бо Салим даъво кард, аммо ба хона надаромад. Мо дар баёнот дар мавриди ин ҳодиса навишта будем, аммо намедонам, ки пулис ин ҳодисаро ба инобат гирифт ё не?”
Ин дар ҳолест, ки Салим Шамсиддинов раиси ҷаъмияти узбакҳои вилояти Хатлон ва муъовини ҷаъмияти узбакони Тоҷикистон, 5 май соли гузашта дар наздикии хонааш дар шаҳри Қурғонтеппа, аз сӯи як гурӯҳи номаълум мавриди латукӯб қарор гирифта буд.
Он замон кормандони интизомӣ ҳеҷ нафарро ба занни латукӯби Салим Шамсиддинов дастгир накарданд, аммо бо гузашти як моҳ дар манзили Шамсиддиновҳо, ки дар маркази шаҳи Қурғонтеппа воқеъ аст оташсӯзӣ рух дод ва ошхонаи манзил қисман хароб шуд.
Ҳамчунин дар он давра оқои Шамсиддинов дар як мусоҳиба дар ҳафтаномаи “Миллат”, сабаби ин ҳаводисро ба сард шудани муносибати миёни Тоҷикистону Узбакистон марбут донист.
Хонаводаи Салим Шамсиддинов мегӯяд, ки ӯ беш аз 20 сол дар бахши вазорати умури дохилии вилояти Хатлон фаъъолият карда ҳамчунин дар бахши ожонсии зидди фасоди ин вилоят низ муддате кор карда, сипас бознишаста шудааст.
Ҳоло яке аз фарзандони Салим Шамсиддинов дар бахши умури дохилии вилояти Хатлон кор мекунад.
Салим Шамсиддинов дар Хатлон дафтари корӣ надошт, аммо бо ду муъовини худ дар ин вилоят бо ҷамъияти узбакон фаъъолият мекард. Зимнан ҳудуди сӣ дарсади ҷамъияти ҷанубии Тоҷикистонро сокинони узбактабор ташкил медиҳанд.