Машрут шудани ҳаҷи қубодиёниён бо эъзоми фарзандонашон ба артиш
Ҳукумати ноҳияи Қубодиён ба афроде, ки фарзандонашон аз хизмат дар артиш саркашӣ мекунанд, иҷозаи сафар ба ҳаҷро нахоҳад дод.
Дар ин бора Саидэҳсон Маҳмудов, имомхатиби масҷиди ҷомеъи ноҳияи Қубодиён ба Би-би-сӣ хабар дод.
Оқои Маҳмудов гуфт, ки тибқи дастури раиси ноҳияи Қубодиён нафароне, ки фарзандони синни хизмат дар артиш доранду, онҳоро ба артиш намефиристанд, имкони сафари ҳаҷро нахоҳанд дошт.
Раиси ноҳияи Қубодиён чанде қабл ин дастури худро дар мулоқоташ бо сокинони ин ноҳия эълом кардааст.
Саъдулло Бекназаров, раиси ноҳияи Қубодиён ба сокинони ин ноҳия гуфт, ки "ҳар нафаре ки мехоҳад ба ҳаҷ равад бояд бачаашро ба артиш равон кунад."
Тасмими машрут шудани сафари ҳаҷ ба эъзоми фарзандон ба артиш аз сӯйи ҳукумати ноҳияи Қубодиён ҳамзамон бо оғози мавсими баҳории даъват ба артиш ва оғози тадорукот барои сафари зоирон ба ҳаҷ иттхоз шудааст.
Ба гуфтаи Саидэҳсон Маҳмудов, имомхатиби ноҳияи Қубодиён раиси ноҳия имомхатибон ва масъулони кумитаи умури дин дар Қубодиёнро, ки феҳристи зоирон ба ҳаҷро таҳия мекунанд муваззаф кардааст, то ба риъояти дастури мазкур назорат кунанд.
Саъадулло Бекназаров дар мулоқоти ахири худ бо сокинони ноҳия гуфт: “Ҳамаи нафароне, ки дар ноҳия барои сафари ҳаҷ омодаги гирифтаанду бачаҳои синни сарбозӣ доранд бояд онҳоро ба артиш фиристонад ва баъдан омодаи сафар ба ҳаҷ шаванд.”
Бино ба иттилоъи имомхатиби ноҳияи Қубодиён то ҳоло дар ин ноҳия ҳудуди 100 нафар барои сафар ба ҳаҷ сабти ном шудааст.
Ба гуфтаи ӯ он идда аз алоқамандони сафар ба ҳаҷ, ки писарони аз синни 18 то 27 доранд ва дар артиш хизмат накардаанд бояд нахуст ин фарзандонашонро ба сарбозӣ бифиристанд ва сипас асноди сафари онҳо такмил хоҳад шуд. Оқои Маҳмудов афзуд дар ғайри ин сурат ин афрод имкони сафар ба ҳаҷро нахоҳанд дошт.
Оқои Маҳмудов гуфт, то ҳоло аз миёни алоқамандони сафар ба ҳаҷ 34 нафар сокини ноҳия писаронашонро ба идораи кумисориёи низомии ноҳия бурда ва онҳоро барои сарбозӣ сафарбар карданд.
Ҳарчанд чунин тасмими мақомоти маҳаллӣ озодиҳои мазҳабии сокинони ноҳияро нақз мекунад, чунин ба назар мерасад, ки рӯҳониёни минтақа дар баробари машрут шудани сафар ба ҳаҷ бо эъзоми фарзандон ба артиш дар Қубодиён вокуниши манфӣ нишон намедиҳад.
Қамариддин Афзалӣ, раиси бахши маҳалии Ҳизби наҳзати исломии Тоҷикистон дар вилояти Хатлон низ дар ин бора фақат гуфт, ки чунин иқдом "роҳи дурусти ҷалби ҷавонон ба артиш нест."
Вай афзуд: “Бояд барномаи махсусе бошад, ки ҷавононро ба роҳи ватандустӣ ҳидоят кунад ва ҷавонон бо хоҳиши худашон ба сарбозӣ раванд. Вақте бо ин роҳ ҷавоноро ба сарбозӣ ҷалб мекунад маълум мешавад, ки мушкиле ҳаст."
Барои бори нахуст нест, ки ҳукумати маҳаллии Қубодиён дар мавсими навбатии даъвати ҷавонон ба артиш тасмимоти ғайримунтазира барои ҷалби ҷавонон ба артиш иттихоз мекунад.
Дар соли гузаштаи мелодӣ дар ноҳияи Қубодиён ҳукумати маҳаллӣ аз мансабдорони ноҳия даъват ба амал оварда буд, ки ба унвони улгу барои волидайни дигар фарзандони худро ба артиш бифиристанд.
Маълум нест, ки мақомоти маҳаллӣ дар соли гузашта то куҷо даъвати ҳукумати ноҳияро пазируфта ва фарзандони синни артиши худро ба хизмат фиристодаанд.
Зеро тайи солҳои зиёд ҷавонони тоҷик ба доили мухталиф, аз ҷумла ба далели вазъи бади буду бош дар артиш аз як сӯ ва муҳоҷирати кории аксари ҷавонон ба хориҷ аз кишвар, моил нестанд хизмати низомӣ анҷом диҳанд.
Ин дар ҳолест, ки хизмати низомӣ барои ҷавонписарон дар Тоҷикистон ҳатмист. Гуфта мешавад ҳамасола дар мавсими даъвати ҷавонон ба артиш дар вилояти Хатлон ба монанди вилоёти дигари Тоҷикистон саркашии ҷавонон аз хидмат башиддат мушоҳида мешавад.