Нигаронии “Amnesty International” аз сарнавишти раҳбари ҷамъияти ӯзбакҳо

Созмони байналмилалии ҳуқуқи башари “Amnesty International” аз нопадид шудани Салим Шамсиддинов, раҳбари ҷамъияти ӯзбакҳо дар вилояти Хатлони Тоҷикистон ибрози нигаронӣ кардааст.

Оқои Шамсиддинов шоми 15 марти соли ҷорӣ аз манзилаш берун рафта ва дигар барнагаштааст.

Хонаводаи ӯ дар ин маврид ба пулис хабар дода, аммо то ҳол аз ин фарди мавқуд дараке нест.

“Amnesty International” зимни як баёния, ки дирӯз 26 март пахш шуд, ҳодисаи нопадид шудани Салим Шамсиддиновро сиёсӣ хондааст.

Дар баёния ба ҳодисаи лату кӯб шудани оқои Шамсиддинов аз ҷониби афроди номаълум дар шаҳри Қӯрғонтеппа дар 5 майи соли гузашта ишора шудааст.

Ҳамчунин, Салим Шамсиддинов қабл аз нопадид шудан дар як мусоҳибааш бо расонаҳои хабарӣ аз сиёсати давлати Тоҷикистон интиқод карда ва онро “миллатгароёна” арзёбӣ карда буд.

Зимнан, хабари нопадид шудани Салим Шамсиддинов, раиси ҷамъияти ӯзбакҳои вилояти Хатлон аз ҷониби Раҳматулло Зойиров, раиси Ҳизби умумимиллии сусиёл-демукроти Тоҷикистон пахш шуда буд.

Дар баёнияи созмони “Amnesty International” омадааст: “Оқои Зойиров ин ҳодисаро сиёсӣ хонда ва гуфта буд, оқои Шамсиддинов хостори ислоҳи қонуни интихоботи раёсати ҷумҳурӣ буда ва аз сокинони ӯзбактабори вилояти Хатлон даъват карда буд, ки дар интихоботи раёсати ҷумҳурии Тоҷикистон дар моҳи ноябри соли ҷорӣ аз номзадии ӯ, яъне Раҳматулло Зойиров пуштибонӣ кунанд.”

Ин созмон дар иртибот ба нопадид шудани Салим Шамсиддинов аз давлати Тоҷикистон даъват кардааст, то ин ҳодисаро сареъан бозрасӣ карда ва дар пайдо кардани оқои Шамсиддинов талош кунанд.

“Amnesty International” навиштааст: “Агар Салим Шамсиддинов боздошт шуда бошад, бояд барои мулоқот бо хонаводааш ва вакили мудофеъ имконият фароҳам шуда, дастрасии ӯ барои кумаки пизишкӣ таъмин гардад.”

Ҳамчунин, ин ниҳод аз давлати Тоҷикистон хостааст, то дар остонаи интихоботи раёсати ҷумҳурӣ ба гирдиҳамоии сулҳомези фаъолони сиёсӣ ва тарафдорони онҳо шароити мусоид фароҳам куанд.