You’re viewing a text-only version of this website that uses less data. View the main version of the website including all images and videos.
Dagaalka Ruushka iyo Ukraine: Ma run baa in Putin uu Afrika yimid oo uu dagaalyahanno ku tababaray?
Sawir madow iyo caddaan ah oo dadka qaar ay si been abuur ah u faafinayaan, ayaa muujinaya Madaxweynaha Ruushka, Vladamir Putin, oo tababaraya dhaq dhaqaaqyo xornimo doon ah, oo ka socda dhanka Koonfureed ee qaaradda Afrika.
Waxa ay dadka qaar u adeegsadeen iney sabab ugga dhigaan in dalalka Afrika ay Ruushka ku taageeraan dagaalka Ukraine.
Sawirka waxaa sidoo kale bartiisa Twitter-ka soo dhigay wiil uu dhaley Madaxweynaha Uganda, Yoweri Museveni.
Laakiin ma jirto wax muujinaya oo caddeyn ah in Putin Afrika tagey, iyadoo waqtiga ay dadku ku andacoonayaan in la qaadey sawirkuna uu yahay qalad ama xilli fog.
Putin ma joogin Tanzania
Sawirka Putin ayaa si weyn looggu wadaagey Baraha Bulshada, kadib markii uu soo galiyey qof wax ku qora Internet-ka oo u dhashey Zimbabwe dhamaadkii sanadkii 2018-kii.
Qoraalada ayaa lagu sheegay in sawirka uu yahay Putin oo ku sugan xero ciidan oo ku taalla Tanzania, oo lagu tababarayey dhaq dhaqaaqyadii xornimada doonka ee ka socdey dhanka Koonfureed ee qaaradda sanadkii 1973-dii.
Sidoo kale, sawirka waxaa qeyb ka ahaa madaxweynaha mustaqbalka ee Mozambique, Samora Machel, iyo Emmerson Mnangagwa, oo ah haatan Madaxweynaha dalka Zimbabwe.
"Putin waxa uu kusugnaa Tanzania afar sano, oo uu tababarayey dagaal yahanada xornima doonka sanadihii 1973-diii illaa iyo sanadkii 1977-dii," baraha wax lagu qorey, ayaa sidaasi lagu sheegay.
Si kastaba ha ahaatee, ma jiraan wax caddeyn ah oo laga helay diiwaanka Ruushka ama Afrika ee Putin, oo dhashey sanadkii 1952-dii, iyada oo xilliga la sheegay in uu Afrika ku sugnaana ay ahayd 1970-naadkii.
Taariikh nololeedka Putin ee ku qoran barta Kremlin-ka ku leeyahay internet-ka, ayaa muujinaya in xiligaasi uu wax ka baranayey jaamacadda gobolka Leningrad, isagoo ka qalin jabiyey 1975-tii.
"Sheegashadu waa wax lagu qoslo," ayuu yiri Paul Fauvet, oo ah wariye kunoolaa Mozambique dhowr iyo toban sano.
Tababarka loo fidiyey dagaal yahanada xornimada doonka dalka Mozambique, ee ku jira xeryo ku yaalley dalka Tanzania, ayuu yiri "Waxaa qabtey macalimiin Shiinees ah, ee ma aysan fidinin tababarka Soofiyeedka".
Sidoo kale, Mr Mnangagwa ma uusan joogi karin sanadkii 1973-dii dalka Tanzania, iyadoo la xirey sanadkii 1965-tii, oo uu toban sano u xirnaa dowladdii caddaanka tirada yar ee xiligaasi ka jirtey Rhodesia.
Socdaalkii Ruushka ee Mozambique sanadkii 1980-kii?
Qoraaga Mozambique ee, Renato Matusse, ayaa sawirka u adeegsadey buuggiisa soo baxey sanadkii 2018-kii, halkaas oo uu ku muujiyey Mr Machel oo ay wehliyaan lataliyeyaal ciidan oo u dhashey Soofiyeetka, oo indha indheynaya xarun ciidan, oo u dhow caasimadda dalkaas ee magaalada Maputo bartamihii sanadihiii sideetamaadkii.
Laakiin waxa uu sheegay in Mr Putin aanu aheyn ninka la hadal hayo, oo calaamatu su'aalka saaran tahay.
Mr Putin waxa uu ku shaqeynayey wakiilka hey'addii sirdoonka Midowgii Soofiyeeti ee burburey ee KGB-da ee dhanka Jarmalkii Bari, intii u dhaxeysay sanadihii 1985-tii illaa iyo 1990-kii, intaa wixii ka horeeyeyna wuxuu ahaa sargaal darajadiisu hooseyso, taasoo ka dhigeysa mid aad u adag inuu noqdo xubin hoggaaminaya wafdiga xiligaas.
Sidoo kale, aqalka Kremlin-ka ma aanu xusin inuu safar shaqo ku tagey dalka Mozambique xiligaasi, ama qeyb kamid ah taariikh nololeedka Mr Putin.
Jose Milhazes, oo ah taariikh yahan iyo saxafi, ayaa soo jeediyey in qofka sawirka ka muuqda uu ahaa sargaal sare oo katirsan Midowga Soofiyeeti, oo ka shaqeynayey dhanka koonfureed ee qaaradda Afrika.
"Marka laga hadlayo waxyaabaha lamidka ah, waxaan dhihi karaa oo kaliya iney yihiin wax si kama ah isaga dhacey, oo aan sidaa usii qoto dheereyn," ayuu yiri.
Georgi Derluguian, oo sanadihii 1980-maadkii, kusoo shaqeeyey turjubaan afafka Bortuqiiska iyo Ruushka, haddana bare ka ah jaamacadda New York ee Abu Dhabi, ayaa sheegay in sheegashada ah in ninka sawirka ka muuqda uu yahay Mr Putin ay kaftan.
Waxa uu intaa ku darey in kabaha ninka lagu tilmaamayo Putin uu xiran yahay ay yihiin nooca kabo military oo ciidan ah, halka Mr Putin uu ahaa sargaal sirdoon ah. Muuqaalku wuxuu kaloo aad ugu eg yahay mid ka weyn Mr Putin.
Iyo hal arrin oo u dambeysa, oo lagu daro hal xiraalahan.
Ninka aan la garanayn kan uu yahay ee sawirka ka muuqata ee lagu sheegayo in uu Putin yahay ayaa gacanta bidix ku qaba saacad, balse Putin waxa uu dhowaanahan saacadda ku xidhaa gacanta midig. Taasina waa arrin kale oo caddeyn u noqon karta in sawirkani been abuur yahay sida ay tabinayso laanta xaqiiqo-baarista ee BBC-da.