Muxuu Yuhuud naceybka iyo Islam naceybka isugu xiray Ra'iisul Wasaaraha Pakistan?

Ra'iisul Wasaaraha Pakistaan Cimraan Khaan ayaa dhawaan ugu baaqay shirkadda Facebook inay mamnuucdo qoraallada ama hadallada horseedi kara Islaam naceybka.

Khaan wuxuu soo hadal qaaday go'aan dhawaan ka soo baxay Facebook kaas oo uu ku mamnuucay in la beeniyo ama wax laga sheego dhacdadii lagu gubay dadkii Yuhuud ee xilliggii dagaalkii labaad ee dunida.

"Iyadoo ay baraha bulshada ka socdaan tacaddiyada baahsan ee lagu dhalleeceynayo muslimiinta, waxaan ka codsanayaa Facebook in uu mamnuuco waxyaabaha horseedayo Islaam naceybka ee lagu soo qoro Facebook, si la mid ah markii uu Facebook mamnuucay qoraallada wax ka sheegayay dhacdadii lagu gubay dadkii Yuhuudda ahaa."

"Farriimaha naceybka abuurayo waa in gebi ahaanba la mamnuucaa - farriimaha naceybka dhalin kara ayaanan loo ogoleyn dadka qaar halka isla arrintan, dadka kale loo ogolyahay," ayuu yiri Cimraan Khaan.

Facebook iyo xeerarka ka hortagga falalka naceybka ah

Dhawaan ayay aheyd markii ugu horreysay ee shirkadda Facebook ay mamnuucdo qoraallada ama hadallada wax ka sheegayo ama beeninaya dhacdadii lagu gubay dadkii yuhuudda ahaa ee dagaalkii labaad ee dunida.

Milkiilaha Facebook Mark Zuckerberg ayaa sheegay in "dadaal badan la geliyay galay sidii loo kala saari lahaa qoraallada qeexaya xoriyatul qowlka iyo in la mamnuuco arrintaas, isla markaana ay gaareen go'aanka ugu waanagsan ee isu dheelitiran".

Labo sano ka hor, Mr Zuckerberg wuxuu sheegay in meesha aanan laga saari doonin qoraallada ka hadlaya "dhacdadii lagu gubay dadkii Yuhuudda ahaa".

Milkiilaha shirkadda Facebook qoraal uu horraantii bishan soo dhigay boggiisa, wuxuu sharaxay sababta loo mamnuucay arrintaas in ay tahay in ay soo bateen weerarrada ku saabsan Yuhuud naceybka.

"Waxaan meesha ka saareynaa qoraallada bogaadinaya dambiga naceybka ah ama xasuuq oo ay ka mid tahay dhacdadii lagu guday dad Yuhuud ahaa, iyadoo ay soo badanayaan weerarrada ku saleysan Yuhuud naceybka, waxaan ballaarinay xeerarkeena si aan u mamnuucno wax kasta oo diidaya ama wax ka sheegaya dhacdadii Holocaust", ayuu yiri.

"Waxaan arkay macluumaad muujinayaa inay soo bateen qalalaasaha ku saabsan Yuhuud naceybka maadam aanu leeyahay xeerar qoto dheer oo ka dhan ah jeedinta naceybka" ayuu yiri Mr Zuckerberg.

Shirkadda Facebook waxay horey u dhaqan gelisay tallaaboloyiin ay boggeeda uga saareyso qorallaada ama hadallada naceybka abuuri karaa ee ku saleysan in weerar toos ah oo dhanka afka ah lagu qaado jinsiyadda qofka, qabiilka ama diinta iyo hadallada ka dhanka ah dhaqamada qaar.

Xeerarka u yaalla Facebook ee kaga hortagga haddallada ama qoraallada naceybka abuuri kara waxaa ka mid ah in aanan la beegsan karin ama aan wax laga sheegi karin Muslimiinta.

Warqadda uu Mr Khaan u diray milkiikaha Facebooka wuxuu ku sheegay "in ay soo kordhayaan wararka la xiriira islaam naceybka", tallaabadaasina ay horseedi karto "Naceyb, xagjirnimo iyo qalalaase" iyadoo dhammaan ficiladaas la isu soo marinayo baraha bulshada.

Axaddii, Ra'iisul Wasaaraha Pakistaan wuxuu ku eedeeyay madaxweynaha Faransiiska in uu wado weerar afka ah oo ka dhan Islaamka.

Hadalka Macron ayaa imaanaya ka dib markii uu ka qeyb galay munaasabad baroor diiq ahayd oo loo sameeyay macalinkii u dhashay dalkaas ee la dilay kaddib markii ardey uu tusay sawir gacmeed laga sameeyay Nebi Maxamed N.N.K.H.H.

Macron wuxuu sheegay: "Macalinka waxaa dilay islaamiyiinta doonaya in ay la wareegaan mustaqbalkeena", wuxuuna intaa klu daray: "Faransiiska uusan weligiis is dhiibi doonin".

Ra'iisul Wasaaraha Pakistan, Imran Khan ayaa Twitter-ka ugu jawaabay Macron, wuxuuna ku yiri: "Waxaa nasiib darro ah in Macron uu billaabay falal ku saabsan Islaam naceyb, oo uu weerarayo Islaamka, intii uu weerari lahaa argagixisada dhibka geysatay".