Maxay basasha qaarkeed ceeb ula noqotay Facebook?

Waxaa jirta basal iska caadi ah, waxaa kale oo jira basal kale oo ceeb looga arko Facebook, sida ay ogaadeen mas'uuliyiinta bakhaar lagu keydiyo raashinka dhirta kasoo baxa, oo laga leeyahay waddanka Canada.

Bakhaarkan, oo ku yaalla magaalada St John's ee gobolka Newfoundland, ayaa doonayay inuu baraha bulshada - gaar ahaan Facebook - soo dhigo sawirro lagu xayeysiinayo basashada nooceeda loo yaqaanno Walla Walla.

Laakiin arrinta layaabka ku noqotay waxay ahayd in Facebook uu ka mamnuucay soo daabicista sawirradaas, iyadoo loo sababeeyay "inay sawirrada basasha u muuqdaan kuwo ceeb ah oo abuuraya dareen jinsi".

Bayaan ay shirkadda Facebook soo saartay ayey raalligalin uga bixisay tallaabada lagu hor istaagay sawirrada basasha, oo ay sheegtay inuu si khalad ah u mamnuucay qalabka tiknoolojiyadda ee iskiis isu haga.

Xayeysiinta ay diidday Facebook waxaa ka muuqday Basal caan ah oo lagu yaqaanno inay dadka u jecel yihiin midab ahaan iyo cabir ahaanba.

Agaasimaha bakhaarka, Jackson McLean, ayaa in muddo ah ka fikirayay sababta loo mamnuucay xayeysiinta basasha.

Kaddib wuxuu ogaaday in ujeeddada looga hor istaagay Facebook ay la xiriirto "sida ay u egtahay iyo qaabka ay u sameysan tahay" taasoo loo maleyn karo naaso ama badhi.

Wuxuu agaasimuhu ogaa in macaamiishiisu ay ku qosli doonaan diiditaanka xayeysiintaas, isagoo bogga uu bakhaarka ku leeyahay baraha bulshada soo dhigay sawirka basasha iyo qoraal ay Facebook ku caddeyneysay inaan laga oggoleyn ama digniin ah.

Mr McLean ayaa sheegay in macaamiishiisu ay ugu soo jawaabayeen sawirro ay ka muuqdaan karooto iyo dhir kale oo laga yaabo in sidaasoo kale loo mamnuuco.

Wuxuu sidoo kale kasoo horjeestay go'aanka ay xayeysiintiisa ka qaadatay shirkadda Facebook.

"Waxaan isticmaaleynaa qalab tiknoolojiyad ah oo naga ilaalinaya sawirrada qaawanaanta ah, laakiin haddana qalabkaas ma kala garan karo basal iyo waxyaabo kale," sidaas waxaa BBC-da u sheegay Madaxa shirkadda Facebook, laanteeda waddanka Canada, Meg Sinclair.

"Dib ayaan usoo celinay xayeysiintii, waana ka xun nahay carqaladda aan galinay ganacsiga."

Bakhaarka laga hor istaagay xayeysiintan ayaa damacsanaa in uu badeecooyinkiisa ku suuq geeyo dhinaca internet-ka sababo la xidhiidha fayraska safmarka ah ee Corona ee saameynta ku sheegay dhaqaalaha caalamka.

Tallaabooyinka la qaaday ilaa hadda waxaa ka mid ah in la kordhiyay xayeysiimihii horay gaabiska u ahaa ee lagu taageerayay alaabta lagu iibiyo bakhaarka ee dhinaca baraha bulshada, gaar ahaan Facebook-ga.