Nin caan ka ah Koonfur Afrika ayey dileen labo libaax oo nooca cad cad ah

Booliska waddanka Koonfur Afrika ayaa sheegay in labo libaax, oo nooca cad cad ah ay weerareen nin caan ku ah ilaalinta xayawaanka iyo deegaanka, xilli uu soo lugeysiinayay, ayna ku dileen xaaskiisa horteeda.

West Mathewson, oo libaaxyadaas soo koriyay ayaa u geeriyooday dhaawacyo halis ah oo ay gaarsiiyeen.

Xaaskiisa, oo gaadhi la daba socotay, ayaa isku dayday inay ka mashquuliso libaaxyada, laakiin way ku guul darreysatay inay badbaadiso seygeeda.

Mr Mathewson ayaa gobolka Limpopo ee dalka Koonfur Afrika ku lahaa hoteel loogu talagalay dadka dalxiiseyaasha ah iyo kuwa damaashaadaya, oo lagu magacaabo Lion Tree Top Lodge.

Libaaxyadan, oo ahaa dhadig, ayaa goor sii horreysay loo wareejiyay goob kale oo xayawaanka lagu xannaaneeyo, waxaana lagu waday in dhawaan lagu sii daayo duurka, maadaama ay weynaadeen.

Mid ka mid ah goosha libaax ayaa dagaal ku sameysay libaaxii kale, kaddibna waxay ku soo jeedsatay ninkii xanananeynayay, oo muddo dheer saaxiib lasoo ahaa, sida ay kusoo warrantay wariyaha BBC-da ee magaalada Johannesburg, Nomsa Maseko.

Qoyska ninka dhintay ayaa sheegay in musiibada dhacday Arbacadii ay ka dhalatay ciyaar xumaatay.

Libaaxyada ayaa weerarka kaddib la xidhay, waxaana loo gudbiyay xarun lagu hayo xayawaannada halista ah.

Mr Mathewson ayaa la sheegay inuu libaaxyadan markii ugu horreysay kasoo badbaadiyay "ugaarsi sharci darro ah". Wuxuu muddo dheer ku hayay goob xiran oo ka mid ah hoteelkiisa.

Labadan libaax qudhooda ayaa lagu soo warramay inay nin dileen sanadkii 2017-kii.

Koonfur Afrika ayaa marar hore oo kale laga soo tabiyay weerarro ay geysteen libaaxyo, oo ay dad ku dhinteen.

Horaantii sanadkii 2018-kii, haweeney ayaa geeriyootay kadib markii ay soo weerartay libaax dhedig ah (gool), xili ay haweenaydan ku sugnayd kayn xayawaanka lagu xanaaneeyo oo ku taala Koonfur Afrika.

Dhacdadaas ayaa waxa ay ka dhacday hoy loo nasiino tago oo ku yaala magaalada Hammanskraal, ee waqooyiga magaalada Pretoria.

Afhayeen xilligaas u hadlay shirkadda gurmadka degdega ah ee Netcare 911 ayaa warbaahinta ku yidhi: "Xogta aan ka helnay aagga waxa ay sheegaysaa in haweenay 22 jir ah ay dhimatay kadib markii uu libaax weeraray, markii shaqaalaha Netcare 911 ay goobta gaareenna waxa ay u tageen gabadhii oo dhimatay".