Duqeynta Israa’iil ku hayso Qasa oo lagu dilay 61 qof oo Falastiiniyiin ah 48 kii saac ee la soo dhaafay

Tebin toos ah

1. 8 Sebtembar 2024Xamaas oo hambalyeysay weerarka lagu dilay sedexda Israa’iiliyiinta ah iyo Netanyahu oo maanta ku tilmaamay maalin adag

   Ururka Xamaas oo war uu soo saaray soo dhigay bartiisa internet-ka ayaa ku tilmaamay weerarka “hawgal halyeynimo ah oo uu fuliyay mid kamid ah nashmiyiinta Urdun, waana fal celin dabiici ah oo looga jawaabayo fallalka cadowtooyo ee Israa’iil ku hayso dadka ku nool Qasa iyo Daanta Galbeed ee la haysto”.

   Ra’isul Wasaaraha Israa’iil Bin Yamiin Netanyahu ayaa isna ku sifeeyay weerarka lagu dilay sedexda Israa’iiliyiinta ah “maanta waa maalin adag, waxana nagu hareereysan afkaar wax disha oo asalka shartoodu ka imaanayso Iiraan”.

   Saraakiisha Israa’iil ayaa sheegay in la xiray dhammaan marinada xuduudda ee ay la leeyihiin Urdun kaddib markii sedex Israa’iiliyiin ah lagu dilay rasaas lagu furay meel ku dhaw Marinka Al-nabi ee buundada Boqor Xuseen ee xuduudda Israa’iil iyo Urdun.

   Mareegta “Kaan” ayaa sheegtay in qof haysta dhalashada Urdun uu rasaas ooda uga qaaday sedex shaqaale Israa’iiliyiin ah Marinka ku yaala meel u dhaxeysa Daanta Galbbeed ee la haysto iyo Urdun.

   Waaxda Adeegga Gurmadka Degdeg ah ee Israa’iil ayaa sheegtay in sedex qof lagu dilay tacshiiradda.

2. 8 Sebtembar 2024Golaha Wakiillada oo mar kale diiday codsi uga yimid Xeer Ilaalinta Guud ee Somaliland

   Golaha Wakiillada ee Somaliland, ayaa mar kale diiday codsi uga yimid xeer ilaalinta Guud ee Somaliland oo la xidhiidhay in Xildhibaan Maxamed Abiib la xidhay isaga oo dembi faraha kula jira, isla markaana xasaanadda looga qaado si Maxkamadda loo horgeeyo.

   Fadhi ay maanta Golaha Wakiilladu ku yeesheen Magaalada Hargeysa, oo ay ka soo xaadireen 47 Mudane, ayaa waxa 43 ka mid ah diideen oo laalleen codsiga iyo ogeysiinta Xeer ilaalinta Guud oo sheegtay in Xildhibaan Abiib la xidhay isaga oo dembi faraha kula jira, waxa ka aamusay saddex Xildhibaan, halka Guddoomiyuhu aanu codayn.

   Codayntan Golaha Wakiillada ayaa ah tii labaad oo uu Golahaas ku diido xadhigga iyo in xasaanadda laga qaado Xildhibaan Maxamed Abiib oo maalintii toddobaad weli ku xidhan Xabsiga Mandheera ee ku yaala inta u dhaxaysa Hargeysa iyo Berbera.

   Salaasaddii toddobaadkii hore ayaa Golaha Wakiilladu diideen codsi Xeer ilaalintu ku dalbanaysay in Xasaanadda laga qaado Xildhibaanka oo bishii Luuliyo Golahaas u soo gudbisay, waxaana codsigaas Xeer ilaalinta lagu diiday go'aan gole.

   Dhinaca kale, Xeer ilaaliyaha Guud ee Somaliland Cabdiraxmaan Hayaan oo Golahaas u diray qoraal yeedhmo ah, si wax looga weydiiyo arrinta xadhiga Xildhibaan Maxamed Abiib, ayaa ka baaqday inuu horyimaado Golahaas, iyada oo qoraal uu kaga jawaabayey yeedhmada Golahaas ku sheegay in loo cadeeyo waxyaabaha loogu yeedhayo.

   Guddoomiye kuxigeenka Koowaad ee Golaha Wakiillada Siciid Mire Giire oo shir-guddoominayey fadhiga maanta, ayaa kaga hadlay jawaabta Xeer Ilaalinta Guud waxa uuna yidhi " Xeer ilaaliyuhu xaq uma laha inuu yidhaahdo maxaynu ka wada hadlaynaa, waayo laba dawladdood ma nihin ee waxaynu nahay waaxdii sharci dejinta ee Xeer ilaaliyaha xasaanadda siiyey, inuu yidhaahdo maxaynu ka wada hadlaynaa xaq nooguma laha. Shirguddoon ahaan waxa aanu garanayn in aanu xeer ilaalinta qoraal dambe ku celino" ayuu yidhi Guddoomiye Kuxigeenka koowaad ee Golahaas Siciid Giirre.

   Xildhibaan Maxamed Abiib, ayaa xeer ilaalintu ku soo eedaysay qodob ay ka mid yihiin Qarandumisnimo, sumcad dil ciidanka ah iyo gacan siin xooggaga Somaliland ka soo horjeeda.

3. 8 Sebtembar 2024Dab ka kacay Iskuulka Hoyga Gabdhaha ee Isiolo

   Warrarka ka imaanaya dalka Kenya ayaa sheegaya in uu dab ka kacay Iskuulka sare hoyga gabdhaha ee Ismaamulka Isiolo ee bartamaha Kenya.

   Illaa hadda lama sheegin sababta dabka keentay, waxana ku dhaawacmay sedex qof.

   Booliska ayaa sheegay in burbur xoog leh gaaray dhismaha iskuulka.

   Hay’adda Laanqeyrta Cas ee Kenya ayaa sheegtay in koox ka tirsan hay’adda loo diray iskuulka.

   Bulshada deegaanka ayaa sidoo kale ka qayb qaatay daminta dabka.

   Dhacdadan ayaa imaanaysa maamlmo uun kaddib dab kii isna dhawaan ka kacay iskuulka hoyga ee Ismaamulka Nyeri, halkaas oo ay ku dhinteen 21 ardey.

4. 8 Sebtembar 2024War deg deg ah, Sedex Israa’iiliyiin ah oo lagu dilay xuduudda Urdun iyo Israa’iil

   Ciidamada Israa’iil ayaa sheegay in uu soo gaaray warka la xiriirra rasaas ka dhacday meel ku dhaw marinka Al-Nabi ee buundada Boqor Xuseen ee xuduudda Urdun.

   Mareegta “Kaan” ayaa sheegtay in qof haysta dhalashada Urdun uu rasaas oodda uga qaaday sedex shaqaale Israa’iiliyiin ah Marinka ku yaala meel u dhaxeysa Daanta Galbbeed ee la haysto iyo Urdun.

   Waaxda Adeegga Gurmadka Degdeg ah ee Israa’iil ayaa sheegtay in sedex qof lagu dilay tacshiiradda.

   Faahfaahin intaa dheer ciidamada Israa’iil ayaa sheegay in ninka rasaasta furay uu la socday gaari ka soo galay dalka Urdun.

   Tan iyo markii uu bilowday dagaalka Qasa bishii Oktoobar ee sanad kii hore dalka Urdun ma istaagin dibad baxyada looga soo horjeedo duulaanka Israa’iil.

5. 8 Sebtembar 2024Duqeynta Israa’iil ku hayso Qasa oo lagu dilay 61 qof oo Falastiiniyiin ah 48 kii saac ee la soo dhaafay

   Duqeynta Milatariga Israa’iil ku hayo Marinka Qasa ayaa lagu soo waramayaa in lagu dilay 48 kii saac ee la soo dhaafay 61 qof oo Falastiiniyiin ah sida ay sheegeen saraakiisha caafimaadka.

   Kow iyo toban bilood oo uu socday dagaalka Marinka Qasa ayaa waxa guul dareystay isku dayo dublamaasiyeed oo lagu doonayay in lagu joojiyo dagaalka, laguna sii daayo lahaystayaasha shisheeye ee gacanta ugu jira ururka Xamaas.

   Labo duqeyn oo lagu qaaday labo iskuul oo hoy u ah dadka gudaha ku barakacay oo ku kala yaala degmada Qasa iyo degmada kale ee Jabaliya ayaa waxa ugu yaraan tii ku dhintay 12 qof, sida ay sheegeen saraakiisha caafimaadka ee Falastiin.

   Milatariga Israa’iil waxa uu sheegay in weerarka lagu bartilmaameed saday xubbno hubeysan oo ka tirsan Xamaas oo ka hawgalayay dhismayaasha la duqeeyay. Shan qof oo kale oo falastiiniyiin ah ayaa duqeyn cirka ah lagu dilay guri ku yaala degmada Qasa, waxana tirada Sabtidii shalay la dilay oo kaliya ay noqonaysaa 28 qof.

   Garabyada hubeysan ee Xamaas, Islaamik Jihaad iyo Fatax ayaa sheegay in ay dagaal adag oo loo adeegsanayo garneylo, hoobiyayaal iyo miinooyinka dhulka lagu aaso ay kula jiraan ciidamada Israa’iil.