Madaxweyne Deni oo sheegay in Shabaab xabsiga dhexe ee Boosaaso maxaabiis kala baxeen

Tebin toos ah

1. 6 Maarso 2021Faahfaahin dheeri ah oo ka soo baxaysa khasaarihii ka dhashay qaraxii Muqdisho

   Faahfaahin dheeraad ah ayaa ka soo baxaysa qaraxii xalay ka dhacay maqaayad ku taaal magaalada Muqdisho iyo khasaarihii ka dhashay.

   Qaraxa oo ka dhacay maqaayadda Luul Yemeni oo ku taal meel u dhow dekedda magaalada Muqdisho ayaa dhaliyey khasaare isugu jira naf iyo maal.

   Booliiska Soomaaliya ayaa tirada dadka halkaa ku dhintay ku sheegay in Toban ay gaarayso, inkastoo hay’adaha gurmadka ded degga ah ay tiro intaas ka badan sheegeen, halka dhaawacyaduna ay 30 qof kor u dhaafayeen.

   Dhaawacyada ayaa la sheegay in qaar ka mid ah ay cuslaayeen, kuwaas oo qalliimo kala duwan ku galay qaar ka mid ah cisbitaallada Muqdisho.

   Sida uu sheegay weriyaha BBC-da ee Muqdisho burbur xoog leh ayaa gaaray dhismaha maqayaadda iyo dhismayaasha ku agyaal, waxaana maanta Muqdisho lagu aasay inta badan dadkii ku dhintay qaraxaas.

2. 6 Maarso 2021Isku shaandeyn lagu sameeyay qaar kamid ah golaha wasiirada Dowlad Deegaanka

   Waxaa maanta isku shaandeyn lagu sameeyay qaar kamid ah golaha wasiirada ee Dowlad Deegaanka Soomaalida Itoobiya kadib wareegto kasoo baxday xafiiska madaxweynaha.

   Isbaddaladan waxay saameeyeen wasiir ku xigeenno, mareeyeyaal iyo agaasimeeyaal.

   Lama sheegin sababta ka dambeysay tallaabadaas.

   Tallaabadan ayaa noqoneysaa tii ugu bandeynd ee hal mar isbaddal noocan ah lagu sameeyo mas'uuliyiinta ka tirsan Dowlad Deegaanka Soomaalida ee Itoobiya.

3. 6 Maarso 2021Abaarta Soomaaliya: 200 neef ayuu haystay abaarta ka hor haddane waxbo uma harin

4. 6 Maarso 2021Ardeyda jaamacadda Golis ee badbaadiya xoolaha ay ilmaha ku qaloocdaan

   Ardayda wax ka barata kulliyadda xanaanada xoolaha ee jaamacadda Golis ee magaalada Hargaysa ayaa in dhaweyd ba wadeen adeegyo cusub oo ay ku kala badbaadinayaan xoolaha sida rabi ugu talo galay u dhali kari waaya marka shinkoodu dhamaado oo xoola dhaqataduna aad ugu riyaaqeen arrintaas.

   Weriye Cabdillahi Jaamac ayaa warbixintan ku eegaya.

5. 6 Maarso 2021Soomaaliya oo shaacisay kiisas hor leh oo ku saabsan cudurka Karoona

   Soomaaliya ayaa maanta diiwaangelisay 191 qof oo hor leh oo laga helay cudurka Karoona halka iyo 20 qof oo kale ay u dhinteen cudurka.

   Wasaaradda caafimaadka ayaa sheegtay in saacadihii u dambeeyay cudurka laga baaray 1,669 qof.

   Waxaa maalmihii u dambeeyay si kordhayay tirada dadka u dhimanaya cudurka Covid-19 ee Soomaaliya, sida ku cad xog ay baahisay wasaaradda caafimaadka ee Soomaaliya.

   Guud ahaan kiisaska cudurka waxay gaarayaan 8,041 halka dhimashadu ay tahay 294.

6. 6 Maarso 2021Madaxweyne Deni oo ka hadlay weerarkii lagu qaaday xabsiga Boosaaso

   Madaxweynaha Puntland Siciid Cabdullaahi Deni ayaa sheegay in khasaare uu ka dhashay weerarkii lagu qaaday xabsiga weyn ee magaalada Boosaaso.

   “Dabcan khasaare waa dhacay maxaabiista qeyb kamid ah wey ku guuleystaan inay ka fakiyaan..waxaas Ilaahey mahaddiis ah in falkii dhacay lala sugin inta uu waaggu ka baryaayo oo laha daba tagay in badana laga soo qabtay qaar badana ay halkaas ku dhinteen”

   Deni ayaa intaas ku daray in uu socdo howlgal lagu soo afjaryo weerarka isla markaana ay si buuxda uga warbixin doonaan marka lasoo gabagabeeyo.

   Siciid Deni ayaa hadalkan sheegay xilli maanta uu shir jaraa’id ku qabtay magaalada Boosaaso halkaas oo ay ciidamada ka wadaan howlgallo kadib weerarka Shabaab ay ku qaadeen xabsiga.

   Dagaalkan ayaa daba socday weerar ay xubno ka tirsan Al-shabaab ay ku qaadeen Xabsiga weyn ee magaalada Boosaaso.

   Al-Shabaab ayaa sheegatay in ay xabsiga Dhexe ee Boosaaso ka sii daayeen ilaa 400 oo maxbuus oo ka xirnaa. Xabsigan waxaa ku jiray xubno ka tirsanaa Al-Shabaab iyo daacish oo horay loogu riday xukunno kala duwan.

   Intooda badan ayey maamulka Puntland sheegeen in lagu qabtay dagaallo Puntland iyo Al-Shabaab dhex maray 216-kii.

7. 6 Maarso 2021Dagaal u dhexeeyay Shabaab iyo ciidamada Puntland oo ka dhacay Boosaaso

   Waxaa duleedka magaalada Boosaaso ee gobolka Bari, oo ka tirsan maamulka Puntland ka dhacay dagaal hubka culus la isu adeegsaday oo u dhaxeeyay ciidamada Puntland iyo xoogag ka tirsan Al-Shabaab, sida ay saraakiil u sheegeen BBC-da.

   Dagaalkan ayaa daba socday weerar ay xubno ka tirsan Al-shabaab ku qaadeen Xabsiga weyn ee magaalada Boosaaso.

   Al Shabaab waxay sheegtay in 400 maxaabiis oo ku xirnaa xabsiga ay sii daayeen.

   Dowladda ma aysan xaqiijin tirada maxaabiista ka baxsatay halkaas balse la qabtay qaar kamid ah kooxdii weerarka soo qaaday.

   Booliska waxay sheegeen inay baarayaan waxa ka dhacaay xabsiga.

8. 6 Maarso 2021Mo Faarax oo ku guuleystay tartan ka dhacay Jabuuti

   Dalka Jabuuti waxaa lagu soo gabagabeeyay tartan dhanka orodka ah oo ka socday dalkaas.

   Waxaana kaalinta koowaad ku guuleystay Maxamed Faarax oo ka socday Britain halka kaalinta labaad uu galay Bashiir Cabdi oo ah nin Soomaali ah oo matalayay dalka Belgium.

   Waxaana kaalinta saddexaad uu galay Muumin Buux oo ka socday Jabuuti.

   Tartankan waxaa soo qabanqaabiyay xiriirka tartamada orodka ee Jabuuti.

   Tartamadan waxaa ka qeybgalay waddamo dhowr ah oo ay kamid yihiin Kenya, Soomaaliya, Itoobiya, Britain iyo Belgium.

9. 6 Maarso 2021Faahfaahin ku saabsan qaraxii xaley ka dhacay Muqdisho

   Ugu yaraan 10 qof ayaa ku dhimatay halka ugu yaraan 30 qofna ay ku dhaawacmeen qarax xaley ka dhacay makhaayadda Luul Yemeni oo ku taalla meel u dhaw dekadda Muqdisho.

   “Khasaaraha meesha ka dhacay waa ilaa 10 qof oo dhimasho ah iyo soddomeeyo dhaawac ah sida aan tirada ku heyno” ayuu yiri Afhayeenka booliska Soomaaliya Sadiiq Aadan Cali.

   Waxaa saaka deggan xaaladda goobtii uu xaley qaraxa ka dhacay.

   Dadkii ku dhaawacmay qaraxa ayaa loo qaaday cibsitaallada magaalada Muqdisho.

   Al shabaab ayaa sheegatay mas’uuliyadda qaraxaas isla markaana uu bartilmaameedku ahaa xubno ka tirsan dowladda oo ku sugnaa makhaayadda.

10. 6 Maarso 2021

    Asalaamu Calaykum.

    Subax wanaagsan. Kusoo dhawaada tebinta tooska ah ee BBC Somali. Maanta oo Sabti ah waxaan idin kugu soo gudbinaynaa wararkii ugu dambeeyay ee Soomaalida iyo caalamka.