Madaxweynaha Kuuriyada Koonfureed oo si xeeladaysan u maareeyay kulan dhex maray isaga iyo Trump

Saacado ka hor intii aanu Madaxweynaha Kuuriyada Koonfureed, Lee Jae Myung, la kulmin Madaxweynaha Mareykanka, Donald Trump, ayaa fariin kasoo baxday barta bulshada ee Truth Social ku qoray.

"MAXAA KA SOCDA KUURIYADA KOOFUREED?" ayuu Trump qoray, isagoo tilmaamay "Xil ka tuuris mise Kacdoon" taas oo dad badan u arkeen inay tixraac u tahay dacwadda loo haysto madaxweynihii hore ee Yoon Suk Yeol, oo lagu eedeeyay inuu isku dayay in uu ku soo rogo xukun ciidan bishii Diseembar ee sanadkii hore, taasoo guul-darro ku dhammaatay.

Laakiin Lee wuxuu adeegsaday xeelad diblumaasiyadeed iyo xariifnimo, taasoo ka hortagtay in la kulankiisu uu noqdo mid u ekaada wixii ku dhacay Volodymyr Zelensky madaxweynaha Ukraine ama Cyril Ramaphosaha ee Koonfur Afrika.

Hase yeeshee kulankii uu la yeeshay Trump waxaa si weyn u hadheeyay hadallo badan oo Trump kaga hadlay Kuuriyada Waqooyi, waxaana dhoola-tuskii Lee u muuqday mid aan wax badan ka beddelin arrimaha ganacsiga iyo difaaca. Halkan waxaa ku xusan seddex qodob oo waaweyn:

Qorshihii Lee ee amaanta wuu shaqeeyay

Kooxda Lee waxay ka baqayeen in Trump uu ku canaanto xafiiskiisa, ama uu ku khasbo inuu iska difaaco been-abuur ay faafinayaan xag-jirro dhinaca midig ah.

Fariintii kasoo baxday Truth Social wax yar ka hor kulanka waxay si dhab ah uga dhigtay cabsidooda mid rumoobaysa. Fariintaas ayaa u muuqatay inay la xidhiidho xaaladii ee ka dhalatay xukunkii ciidan ee Kuuriyada Koonfureed bishii Diseembar iyo baadhitaanada dowladdu ku waddo madaxweynihii hore Yoon Suk Yeol, xaaskiisa, iyo xubnihii dowladdiisii hore.

Xagjiriinta midig ee Kuuriyada Koonfureed iyo qaar Mareykan ah ayaa si kulul uga soo horjeeda arrintaas.

Tani waxay ahayd xaaladda ugu cabsi badan ee mas'uuliyiinta Seoul in Lee lagu khasbo inuu iska difaaco sheekooyin been abuur ah. Laakiin markii kulankii la yimid, Trump wuu xusay arrintaas, balse si fudud ayuu uga leexday isagoo sheegay inay tahay "is-faham la'aan".

Qorshihii Lee ee kulanka si cad ayuu shaqeeyay. Wuxuu markiiba ammaanay muuqaalka cusub ee qurxoon ee xafiiska Oval-ka, isagoo Trump ku ammaanay xidhiidhka uu la leeyahay hoggaamiyaha Kuuriyada Waqooyi, Kim Jong Un.

"Waxaad tahay kan kaliya ee horumar gaarsiin kara geeddi-socodka nabadda, Mudane Madaxweyne," ayuu Lee yidhii. "Haddii aad noqoto nabadoon, anigana waxaan noqon doonaa 'garabgal' kaa caawiya."

Lee xitaa wuu kaftamay, isagoo sheegay in laga dhisi karo Trump Tower gudaha Kuuriyada Waqooyi iyo inuu halkaas ku ciyaari karo golf.

Ujeeddada ugu weyn ee kooxda Lee waxay ahayd in madaxweynahooda uu ka tago xafiiska Trump iyadoo xidhiidhku wanaagsan yahay.

Markii weriye weydiiyay Trump su'aal ku saabsan eedeymo la xidhiidha weerarada lagu qaaday kaniisadaha Kuuriyada Koonfureed, Trump wuxuu sheegay inuu "warbixin sirdoon" ka helay, balse wuxuu intaas ku daray "Taas uma ekeyn Kuuriyada Koonfureed."

Trump wuxuu sheegay inay u badan tahay "xantaasi" inay ahayd "isfaham la'aan". Markii Lee sheegay in dowladda ay baadhayso arrintaas, Trump wuxuu yidhi "waxaana hubaa inay xal u heli doonaan".

Lee wuxuu iska ilaaliyay inuu yeesho xaaladdii uu ku dhacday Zelensky kooxdiisuna neef nafis ah ayayba n

Kim Jong Un oo si weyn u muuqda

Inkastoo ay ahayd kulankoodii ugu horreeyay, Trump iyo Lee waxay si xiiso leh uga wada hadleen xidhiidhka Trump la leeyahay Kim Jong Un oo ah cadowga weyn ee Kuuriyada Koonfureed.

Madaxweyne Lee wuxuu si toos ah u bilaabay hadalka, isagoo amaanay xidhiidhka Trump iyo Kim Jong Un, kuna booriyay inuu ka noqdo "nabadoon" gobolkaas.

Lee wuxuu doonayaa inuu la hadlo Kim, si uu u dhiso xidhiidh nabadeed oo waara, balse wuu ogyahay in fursadda Trump u badan tahay dhankiisa.

Trump, oo saddex jeer la kulmay Kim xilligii uu xilka hayay, wuxuu marar badan xusay xidhiidhkooda. Wuxuu horey u yiri: "Waan is jeclaannay aniga iyo Kim xitaa warqado ayaan isdhaafsanay."

"Waqti badan ayaan la qaatay, waxaan ka wada hadalnay arrimo laga yaabo inaanan u baahnayn inaan ka hadalno," ayuu Trump yiri Isniintii. "Si fiican ayaana isu fahanay isaga runtii."

"Waan rejaynayaa in aan Kim Jong Un la kulmo mar kale mustaqbalka dhaw," ayuu intaas raaciyay.

Laakiin su'aashu waxay tahay: Kim Jong Un ma doonayaa inuu la hadlo midkood?

Kuuriyada Waqooyi waxay marar badan diiday dedaallada Lee uu ugu jiro wadahadal, waxayna iska indho-tirtay isku dayo Mareykanku ku doonayo inuu dib u billaabo xidhiidhka. Inkastoo aysan si buuxda albaabka u xidhin marka la eego Trump, haddana waxay sheegtay in shuruudihii hore aysan shaqeyn doonin Kuuriyada Waqooyi ma dooneyso inay ka tagto hubkeeda nukliyeerka.

Hadda waxaa laga sugayaa Seoul iyo Washington inay ka gudbaan caqabadahaas.

Ganacsiga, Difaaca iyo arrimo aan xal loo helin

Ajandaha kulanka Lee ee Aqalka Cad waxaa ugu sarreeyay ganacsiga iyo difaaca, balse wax heshiisyo dhab ah lagama gaadhin labadaas arrimood.

Seoul waxay ku guuleysatay in hoos loo dhigo cashuurihii Mareykanku saaray badeecooyinka Kuuriyada Koonfureed ilaa 15%, kadib markii Trump ka hanjabay inuu ka dhigi doono 25%. Taas beddelkeeda, Seoul waxay ballanqaadday inay $350 bilyan ka maalgelin doonto Mareykanka – $150 bilyan oo ka mid ahna waxay geyn doontaa dhismaha maraakiibta.

Kuuriyada Koonfureed waa dalka labaad ee ugu weyn ee maraakiibta dhisa dunida, marka laga reebo Shiinaha, xilli dhismaha maraakiibta Mareykanka uu hoos u dhacayo.

Wax yar kadib kulanka Aqalka Cad, shirkadda Korean Air waxay ku dhawaaqday inay iibsanayso 103 diyaaradood oo Boeing ah.

Laakin canshuuraha laga qaado badeecadaha Kuuriyada Koonfureed lama dhimi doono mar dhow. "Waxaan u maleynayaa inaan heshiis ka gaadhay" ganacsiga, Trump ayaa u sheegay suxufiyiinta kulanka ka dib, isagoo aan bixin faahfaahin dheeri ah. "Dhibaatooyin qaar ayay kala kulmeen, laakiin ma'aana beddelin fekerkayaga."

Kulanka ayaa sidoo kale wax yar ka taray arrimo kale oo qodax leh oo ku saabsan xidhiidhka labada dal.

Isniintii, Trump waxa uu dhinac maray su'aal ku saabsaneyd in ciidamada Mareykanka laga soo saaro Kuuriyada Koonfureed – fikraddaasi oo la sheegay in Aqalka Cad uu ka baaraandegay xilli Trump uu marar badan ku eedeeyay Kuuriyada Koonfureed in ay ka faa'ideysaneyso ilaalinta Mareykanka oo aysan bixin lacag ku filan oo dhanka difaaca ah.

Sidoo kale Isniintii, Trump waxa uu dul istaagay fikradda ah in uu Maraykanku loo ogolaado in uu lahaado qaybta dhulka ee saldhigga hawada ee Osan Air Base, oo ku yaalla koonfurta Seoul, oo ay si wada jir ah u maamulaan Maraykanka iyo Kuuriyada Koonfureed.

Laakiin qaar ka mid ah dammaanadda in Lee uu ka helay Trump, ugu yaraan, waa isbahaysiga dhaqaale ee ka dhexeeya dalalkooda. Mareykanka iyo Kuuriyada Koonfureed ayaa "midba midka kale uga baahan yahay" ganacsi, ayuu Trump u sheegay saxafiyiinta isagoo jooga Lee.

"Waan jecelnahay waxay sameeyaan, waan jecelnahay alaabtooda, waan jecelnahay maraakiibtooda, waxaan jecelnahay wax badan oo ay sameeyaan," ayuu yidhi. Dhanka kale Kuuriyada Koonfureed waxay u baahan tahay saliid iyo gaas, Mareykankuna wuu ka ganacsan lahaa kuwa iyaga la jira, ayuu raaciyay.