Kumanaan reer Israa'iil ah oo ka banaan baxay Qorshaha Netanyahu ee la wareegitaanka Qaza iyo Falastiiniyiin Gargaar raadinayay oo la dilay

Kumanaan dibad baxayaal ah ayaa isugu soo baxay waddooyinka Tel Aviv, fiidnimadii Sabtida iyaga oo ka mudaharaadaya qorshaha ra'iisul wasaare Benjamin Netanyahu ee sii waditaanka dagaalka Qaza ee muddada labada sano ah socday, iyaga oo dalbanaya in sida ugu dhakhsiiyaha badan loo dhammeeyo dagaalka, loona sii daayo lahaystayaasha.

Mudaharadaayaasha ayaa sitay calaamado iyo sawiro lahaytayaasha Israa'iil ee Qaza, waxaana ay dowladda ka dalbadeen sidii ay uga howlgali lahayd sii dayntooda.

Sida ay tabisay wakaalada wararka AFP, tirada ka qayb galayaasha ayaa lagu qiyaasay tobanaan kun, halka golaha qoysaska lahaytayaasha ay sheegeen ilaa 100,000 oo qof ay ka qayb qaateen mudaharaadka.

Shahar Mor-Zehero oo ehel la ah mid kamid ah lahaytayaasha la dilay ayaa wakaalada oo soo xiganaysa ay tiri ''Waxaynu ku soo gabagabaynaynaa farriin toos ah oo ra'iisul wasaare Benjamin Netanyahu ku socoto: haddii aad isku daydo inay qabsato qayb kamid ah Qaza oo la haytayaashana la dilo, weynu kugu soo raadsanaynaa magaalada, inta lagu jiro ololayaasha doorashada iyo dhammaan wakhti kasta iyo goob walba.

In kasta oo aysan dowladdu soo bixin qiyas rasmi ah oo ah tirada ka qayb galayaasha, waxaa ay u muuqataa inay aad uga badan yihiin tirooyinkii ka qayb isku soo baxyadii ka dhanka ahaa dagaalka.

Xafiiska ra'iisul wasaaraha ayaa ku dhawaaqay Jimcihii in golaha ammaanka oo ah tiro yar oo golaha wasiirada ay go'aamiyeen qabsashada Qaza, oo ballaarinaysa howlgalka milatari ee dhulka falastiiniyiinta iyo digniinaha milatari ee khatarta galinaysa lahaystayaasha.

Ra'yi ururin ayaa muujinaysa in tiro badan oo reer Israa'iil ah ay taageerayaan in sida ugu dhakhsiiyaha badan loo dhammeeyo dagaalka si loo sii daayo tirada harsan 50 lahaystayaasha ah. Saraakiisha Israa'iil ayaa aaminsan in ku dhowaad 20 lahayste ay weli nool yihiin.

Dowladda Israa'iil ayaa wajahaysa dhaleecayn uga imaanaysa gudaha iyo dibadda oo ay ku jiraan qaar kamid ah saaxiibadeeda Yurub ee la xiriirta ku dhawaaqitaanka milatari ee sii ballaarinaya dagaalka.

Golaha wasiirada oo fadhigoodu dhan yahay ayaa la filayaa in ay arrintan ansixiyaan Axada.

Falastiiniyiin la dilay iyaga oo raadinaya Gargaar

Ilaha caafimaad ee Falastiiniyiinta ayaa ku dhawaaqay kororka tirada dhimashada ee la keenayo isbitaalada marinka Qaza tan iyo subaxnimadii Axada oo haatan gaartay ilaa iyo 47, oo ay ku jiraan 40 qof oo sugaya gargaar.

Laanta difaaca rayidka Falastiiniyiinta ayaa sheegtay in ciidamada Israa'iil ay rasaas la beegsadeen muwaadiniin isugu soo baxay meel ku dhow goob lagu qaybiyo gargaarka.

Israa'iil iyo warbaahinta Falastiin ayaa tabiyay in duqaymaha Israa'iil ee Qaza lagu dilay laba kamid ah wiilasha walaalka Khalil al-Hayya, madaxa kooxda wadaxajoodka Xamaas ee marinka Qaza.

Xamaas weli ma soo saarin xaqiijin rasmi ah ee dhab ahaanshaha wararkan.