Qaraxyo waaweyn oo xalay ka dhacay Beyruut

Israa'iil ayaa duqaymo cusub ka geysatay koonfurta Beyruut ka dib markii ciidanka Israa'iil ay soo saareen amarro cusub oo dadku uga baxayaan koonfurta Beyruut, sababo la xiriira in "xarumaha iyo saldhigyada Xisbullah" ay ku yaalaan halkaas.

Wakaaladda wararka ee Lubnaan ayaa sheegtay in "diyaaradaha dagaalka ee Israa'iil ay 4 weerar oo khasaare geystay ay ka fuliyeen duleedka koonfureed ee Beirut."

Wararka ugu horeeya ayaa sheegaya in weeraradan lala beegsaday kaalin shidaal.

Wariyaha BBC-da Anna Foster, ayaa sheegtay in qaraxu uu ahaa mid aad u weyn.

Wararka hordhaca ah ee laga helay weerarka ayaa sheegaya in qaraxa lala bartilmaameedsaday kaalin shidaal sida ku cad khariirad ay soo bandhigigeen ciidanka Israa’iil, waxaa sidoo kale la arkayay dad badan oo qaxaya sida uu wariye Foster sheegay.

Wariyaha ayaa dhanka kale tilmaamay inay muuqatay saameynta burburka ka dhashay duqeynta inkasta oo laga yaabo in si ulakac ah loo bartilmaameydsaday goobtaas.

Nafisa Kohnavard, oo ah wariyaha Bariga Dhexe uga warranta BBC World Service, kuna sugan Beirut, ayaa soo sheegtay inay maqashay ugu yaraan lix qarax oo xooggan oo ka dhacay Beirut.

"Daruuro qiiq ah ayaa kor u kacayay xaafadaha koonfureed, halka diyaaradaha aan duuliyaha lahayn ay duulayaan cirka," ayay tiri wariye Kohnavard.

Wariyaha BBC-da Nafisa, ayaa barteeda X, ku daabacday muuqaal ay ku duubtay taleefankeeda gacanta waxa ayna tiri: “Ma fileyn tan markii aan muuqaalka duubayay oo aan mobilka gacanta ku hayay, xilligaas oo uu qarax weyn dhacay,”… Beirut.

Warbaahinta Lubnaan ayaa sidoo kale sheegtay in laba weerar lala beegsaday goobo ku yaalla deegaanka Choueifat, oo u dhow garoonka diyaaradaha, sida ay sheegeen warbaahinta maxalliga ah, halka saddex weerar oo kalena ay ku dhaceen goobo kale oo ku yaalla agagaarka garoonka.

Wariye Kohnavard, ayaa hadalka ku dartay, “in Beirut ay caadi ka noqotay xaaladdaan habiinkii xalay ahaa” sidoo kalena diyaaradaha aan duuliyaha lahayn ay dul wareegayeen dhanka kalena ay jireen digniino ay dirayeen ciidamada Israa’iil ayna xigeen qaraxyo gilgilay magaalada.

Avichay Adraee, afhayeenka ciidamada Israel ee warbaahinta Carabta, ayaa qoraal ku daabacay bartiisa X, waxa uuna yiri: "Ciidanka Israa'iil waxay beegsanayaan bartilmaameedyada argagixisada Hezbollah ee Beirut."

Ciidamada Israel ayaa sheegay in dhismayaasha ku yaala Burj el-Barajneh ay beegsan doonaan "dhawaan" iyagoona dadka ka agdhaw faray inay isaga fogaadaan ilaa 500 oo mitir.

Goobta ay digniinta ka soo saareen ayaana u dhaw garoonka diyaaradaha, waxaana goobo badan oo garoonka ka agdhaw lagu garaacay gantaalo ay Israa’iil leedahay.

Xisbullah waxa ay awood xoogan ku leedahay xaafadaha koonfureed ee Beirut, halkaas oo muddooyinkii danbe lala beegsanayay duqeymo.

Xisbullah dhankoodu waxa ay weerarro ku qayaan waqooyiga Israa’iil iyagoona sheegay inay gantaalo ku rideen saldhig ciidanka circa ah oo u dhow magaalada Haifa.

Afhayeenka Militariga Israel, Daniel Hajari ayaa sheegay in 440 ka mid ah dagaalyahanada Xisbullah la dilay tan iyo markii uu bilowday duulaanka dhulka ee Israel ay ku qaaday koonfurta Lubnaan habeenkii isniinta ee lasoo dhaafay.

Waxa uu sheegay in ay ku jiraan 30 ka mid ah madaxda xisbiyada.

Dhinacooda, Xisbullah ma aysan sheegin tirada xubnaha la dilay.

Saacado ka hor, ra’iisul wasaaraha Israa’iil Benjamin Netanyahu ayaa khudbad uu jeediyay wuxuu kaga hadlay weerarkii gantaalada oo ay Iiraan ku qaadday dalkiisa horaantii toddobaadkan.

Wuxuu ku tilmaamay "mid ka mid ah weerarradii gantaallada ballistic-ga ee ugu weynaa taariikhda."

Isagoo hadalkiisa sii wata ayuu yiri: “Ma jiro waddan adduunka ka mid ah oo aqbali doona weerar caynkan oo kale ah oo lagu qaado magaalooyinkiisa iyo muwaadiniintiisa, Israa’iilna ma aqbali doonto.

"Israa'iil waxaa ku waajib ah oo ay xaq u leedahay inay is difaacdo oo ay ka jawaabto weerarradaan, waana sameyn doonnaa."