Maxaan ka ognahay ilaa iyo haatan ciidamada la wareegay madaxtooyada Sudan?

Ciidmamada Suudaan ayaa sheegay in ay dib u qabsadeen qasriga madaxtooyada ee dalkaasi oo ay muddo gacanta ku hayeen ciidammada gurmadka degdegga ah RSF.

Xarunta madaxtooyada ayaa ku taal bartamaha Khartoum, halkaasi oo ay sidoo kale ku yaallaan inta badan wasaaradaha dawladda iyo hay'adaha maaliyadda - ciidamada ayaa ku sii siqayay maalmihii la soo dhaafay kaddib dagaallo qadhaadh oo ay la galeen xoogagga ka soo horjeeda ee RSF.

Tallaabadan ayaa loo arkaa guul taariikhi ah maaddaama qabsashada qasriga madaxtooyadu uu leeyahay muhiimad weyn oo taariikhi ah iyo mid siyaasadeed.

Nabil Cabdallah, oo ah afhayeenka ciidanka, ayaa TV-ga dowladda ka sheegay in militariga ay la wareegeen xaruntaasi iyo dhismayaasha wasaaradaha ee aaggaasi ku yaalla.

"Ciidamadeennu waxay gabi ahaanba burburiyeen dagaalyahannada cadowga iyo agabkii dagaal ee ay wateen, waxayna ka qabsadeen qalab iyo hub fara badan," ayaa uu Cabdalla hadalkiisa raaciyay.

"Waxaan xaqiijineynaa in aan sii wadi doono dagaalka ilaa guusha laga gaadhayo."

Muuqaalo iyo sawirro la soo dhigay baraha bulshada oo ay BBC-du xaqiijisay ayaa muujinaya askar aad u faraxsan oo qoryahooda lulaya, oo samaynaya raynyan iyo jilba-joogsanaya u muuqda in ay xamdi-naqayaan.

RSF ayaa wali ka sii dagaallamaysa qaybo ka mid ah magaalada. Laakin dib u qabsashada qasriga madaxtooyada oo noqonaysa guul istaraatiijiga ah ayaa sidoo kale loo arkaa astaan muujinaysa u dhammaadka RSF ee gacan ku haynta magaalo-madaxda.

Ciidanka gurmadka degdegga ah ayaan weli wax war ah ka soo saarin.

Khartuum waa goobtii uu ka bilowday dagaalka sokeeye ee markii dambe ku baahay dalka intiisa kale.

Bishii Abriil ee sannadkii 2023-kii ayay ahayd markii xooggaga RSF ay si degdeg ah u qabsadeen xarunta madaxtooyada iyo inta badan caasimadda dalka Suudaan, wakhti yar uun ka din markii uu dagaalku qarxay. Laakiin Ciidanka Suudaan ee hubeysan ayaa dhowrkii bilood ee la soo dhaafay dib ugu soo laabtay iyaga oo ku soo dhawaanayay madaxtooyada kuwaasi oo ku socda Wabiga Nile.

Xoogagga ka amar qaata jeneraalka la yidhaahdo Maxmed Xamdaan (Dagalo) ayaa gacanta ku hayay magaalada caasimadda ah iyo inta badan galbeedka dalkaasi, tan iyo markii uu dadaalku qarxay.

Dadka ka faallooda arrimaha dalka Suudaan ayaa tallaabadan u arka mid soo muhiim u ah colaadda sokeeye ee dalkaasi ka taagan in muddo ah. Tani waxay noqon kartaa waqti muhiim u ah dagaalka sokeeye ee arxan darada ah ee Suudaan, laakiin ma joojin doono. Laba sano oo colaado ah ayaa abuuray dhibaato bini'aadantinimo oo aad u weyn waxayna dalka u kala jabtay laba qaybood, oo u dhexeeya aagagga ay ka taliyaan ciidanka iyo RSF-ta.

Muuqaal a duubay Sabtidii, ayaa hoggaamiyaha RSF waxa uu ku sheegay in uu difaacan doono madaxtooyada isaga oo sidoo kale ku gooddiyay weerarro hor leh oo ka dhan ah magaalooyin dhowr ah oo yaalla dhinaca waqooyiga.

Colaadda u dhexaysa ciidanka iyo xoogagga gurmadka degdegga ah (RSF) ayaa galaaftay tobanaan kun oo qof, malaayiin kalena waxa ay ku qasbeen in ay guryahooda ka barakacaan, iyada oo macuushu ay baahday tan iyo markii dalkaasi uu cagaha la galay dagaal sokeeye.