Waxa ay ku kala duwan yihiin soonka Muslimiinta iyo Masiixiyiinta oo sanadkan isku soo aaday

Lent iyo Ramadan ayaa isku soo aaday sanadkan iyagoo isaga mid ah tiro maalmo ah. Lent ayaa billowday February 14 wuxuuna dhammaanayaa March 28 iyadoo Muslimiintu ay bilaabeen maalmaha soonka ee 29 ama 30 ah.

Asalka soonka ee Masiixiyiinta...

Soon-qaadku waa muddo 40-maalmood ah oo ay dad badan oo Masiixiyiin ahi ku xasuustaan dhacdooyinkii ka dhashay dhimashadii Ciise Masiixi, Nebi Ciise NNKH, kaas oo noloshiisii iyo wax baridiisii ay aasaaska u ahayd diinta Kiristaanka.

Masiixiyiintu waxay rumaysan yihiin in tani ay ka dhigan tahay alle barigii Nabi Ciise, oo ay aaminsan yihiin inuu meel bannaan ah u aaday inuu soomo 40 maalmood.

Waa xilli fikir iyo cafis la is waydiisanayo, wakhtigaas oo ay Masiixiyiintu isu diyaarinayaan inay u dabaaldegaan inta lagu guda jiro ciidda Easter-ka, taasoo dhacaysa dhammaadka Soonfurka.

...Muslimiintana

Ramadaan waa magaca Carabiga ee bisha sagaalaad ee taariikhda Islaamka. Muhiimad gaar ah ayey u leedahay Islaamka.

Bishan gudaheeda ayay Muslimiintu rumeeyeen aayadaha Qur’aanka Kariimka ah kitaabka barakaysan ee Islaamka iyo in bishan lagu soo dajiyey Nebi Muxamed NNKH.

Inta lagu jiro muddadaas, Muslimiinta waxaa lagu dhiirigelinayaa inay soomaan oo ay bixiyaan sadaqo, muujiyaan naxariis iyo dulqaad, iyo xoojinta xiriirka Eebbe.

Waxyaabaha ay isaga mid yihiin Ramadan iyo Lent

Soonka iyo xakameynta nafta:

Soonka ayaa udub-dhexaad u ah labada bulshoba, inkastoo dhaqanku kala duwan yahay. Leny, Masiixiyiintu waxay Jimcihii ka soomaan hilibka waxayna muddo 40 maalmood ah yareeyaan cunnada. Si la mid ah taas, Ramadaanka inta lagu guda jiro, Muslimiintu waxay ka af-xirtaan cunidda, cabidda, sigaarka iyo galmada ilaa qorraxdu ka dhacayso.

Cibaadada:

Labada buldhoba waxay dhiirrigeliyaan cibaadada. Waxay dadka ku dhiirrigelinayaan u dhowaanshaha Ilaahay iyo baryadiisa.

Wax wada qeybsiga iyo sadaqada:

Labadaba Lent iyo Ramadan waxay diiradda saaraan sadaqada iyo in wax lala wadaago dadka saboolka ah. Waxay dhiirrigeliyaan deeqsinnimada iyo xoojinta is dhexgalka bulshada.

Sida Lent iyo Ramadan ay ku kala duwan yihiin?

Muddada iyo jadwalka:

Lent ayaa socda ilaa 40 maalmood, laga bilaabo 14ka February ilaa 30-ka March. Dadka Kirishtaanka ah ma soomaan maalinta Axadda. Dhanka kale, Ramadan ayaa hal bil socda, wuxuuna noqon karaa 29 ama 30 maalmood, iyadoo lagu saleynayo kalendarka Islaamka.

Qaabka soonka:

Inkastoo labadanba uu soon ku lug leeyahay, haddana qaabka ayaa kala duwan. Soomidda bisha Ramadan waxay ka mid tahay afarta tiir Islaamka, waana tiirka afaraad.

Tiirarka kale waa iimaanka, salaadda, sakada iyo xajka.

Soomidda Ramadan ayaa micnaheedu yahay cibaado. Muslimiinta ayaa cuna suxuur kahor salaadda subax.

Inta maalinta lagu guda jiro, looguma talogalin Muslimiintu inay wax cunaan amaba ay wax cabaan xitaa biyo amaba ay galmo sameeyaan, marka maqrib la gaaro waxay cunaan cunno la dhoho afur.

Si kastaba, Muslimiinta qaar ayaa laga dhaafay soonka, hase yeeshee ay dib kasoo gudi karaan. Tan waxay inta badan quseysaa haweenka uurka leh amaba naas-nuujinaya, kuwa caadadu u joogto, dadka xanuunkan ee soonku caafimaadkooda saameynayo amaba dadka safraya. Taas beddelkeed, waxaa loo oggol yahay inay soomaan isla tirada maalmihii ay soonka dhaafeen amaba ay quudiyaan qof sabool ah.

Balse soonka Lent, dadka Masiixiyiinya ayaa sooma mid u dhow kan Muslimiinta. Waxaa keliya soomi kara dadka sida adag u aaminsan diintaas. Dadka soomaya ayaa loo oggol yahay inay cunaan hal mar cunno culus.

Waxaa sidoo kale ka mamnuuc ah cunidda hilibka, balse kalluunka iyo noocyada kale ee hilibka ayaa la cuni karaa.

Waxaa sidoo kale iyagana looga baahan yahay inay sameeyaan acmaal sida ay fareyso diintooda.