Sidee madaxweynaha Iiraan uga badbaaday dil uu sheegay inay "Israa'iil soo maleegtay"

Tucker Carlson oo ah wariye Mareykan ah ayaa wareysi la yeeshay madaxweynaha Iran Masoud Pezeshkian. Labo maalin ka hor ayuu sii sheegay in uu soo saarayo wareysiga. Madaxweyne Pezeshkian wuxuu u sheegay wariyaha in Israa'iil ay isku dayday in ay "disho" xilli uu kulan ku jiray. Wuxuu sidoo kale sheegay madaxweynaha in aysan jirin caqabad Mareykanka ka joojineysa in uu Iran maalgashi ku sameeyo.

Mar uu ka jawaabayay su'aal uu weydiyay Mr. Carlsen oo aheyd, "Israa'iil miyaa isku dayday in ay disho madaxweynaha Iran?" waxa uu Mr. Pezeshkian ku jawaabay, "Haa, way isku dayeen, si xoog leh ayeyna isugu dayeen, balse waa guuldareysteen".

Kaddib waxaa uu weydiiyay wariyaha in uu hubo isku dayga dilkaas. Mr. Pezeshkian waxa uu ku jawaabay in Israel ay "isku dayda oo ay qaaday tallaabo" lagu dilayo. Wuxuu kaloo intaas ku daray in xilligaas uu ku jiray kulan la xiriira wixii la sameyn lahaa.

Sida uu sheegay Mr. Pezeshkian "waxay duqeeyeen goobta iyagoo raacayay xogta ay hayeen balse hadii taada aysan gelin waxba ma dhacayaan." Faahfaahin intaas ka baxsan ma uusan sheegin madaxweyne Pezeshkian.

Ali Larijani oo ah la taliyaha hoggaamiyaha dalka sidoo kalena xubin ka ahaa EDC oo ah gole awood leh oo u dhexeeya golaha ilaalada iyo baarlamaanka ayaa "shaaca ka qaaday" halka uu ka dhacayo kulanka Golaha Sare ee Amniga Qaranka, wuxuuna doonayay "in la dilo hoggaamiyayaasha, lana duqeeyo balse taasi ma dhicin".

Madaxweynaha Iran waxa uu yiri, " kama baqayo in la i dilo anigoo difaacaya dalkeyga iyo xorriyadeyda, balse taasi ma keeneysaa xasilooni"?

Kaddib Tucker waxa uu weydiyay madaxweynaha in dagaalka Mareykanka uu hakad galay, marka sidee u aragtaa in tani lagu xalin karo ama sidee ku dhamaaneysaa?

Mr. Pezeshkian waxa uu sheegay in Iran aysan dagaalka bilaabin "ma dooneyno in dagaalka sii socdo." Pezeshkian wuxuu sidoo kale sheegay, "ilaa markii ay dowladda shaqada bilwoda, halku-dheggeenu wuxuu markasta ahaa in la sii wado nabada dalalka gobolka".

Mr. Carlsen waxa uu weydiiyay, Iran waxay joojisay wadashaqeyntii kala dhexeysay hay'adda caalamiga ee Atoomikada iyo Tamarta adduunka, ma jirtaa si ay kula socdaan naaxinta yuraaniyamka, ma jirtaa hab ama ma tahay mid u ogolaaneysa dalalka in ay xaqiijiyaan in aadan dhiseynin hub nukliyeer ah?

Mr. Pezhekian oo ka jawaabayay su'aashaas ayaa sheegay in dalkiisa oo wadahadalada arrintaas meel dhexe u mareyso oo uu socdo wadaxaajoodka, loona sheegay in Isreal aysan soo weerareyn, hadana Isreal ay duqeysay iyadoo la fadhiyo miiska wadahadalka.

Mr. Pezhekian wuxuu kaloo sheegay in duqeynta Mareykanka ay sababtay "waxyeelo halis ah" iyo burbur soo gaaray goobaha nukuliyeerka, isagoo intaas ku daray, "ilaa inta aan ka galeyno ma fahmin wax kale, waa in ay sugaan ilaa inta aan anaga ka galeyno".

Mar uu ka jawaabayay su'aal ku saabsaneyd haddii Iran ay diyaar u tahay in ay ka harto barnaamijkeeda nukliyeerka si loo gaaro nabad, waxa uu ku jawaabayay madaxweynaha Iran, "Benjamin Netanyahu ayaa abuuray fakar ah in Iran ay dooneyso hubka nukliyeerka balse Iran marna ma dooneyn, waxaana diyaar u nahay in aan cadeyno balse nidaamkaas hab dhaqankooda ayey ku burburiyeen".

Waxaa la weydiyay madaxweynaha Iran hadii la soo saaray Fatwa ka dhan ah madaxweynaha Mareykanka Donald Trump. Waxa uu ku jawaabay ilaa iyo inta uu ogyahay in aysan jirin cid laga soo saaray Fatwa, taasna shaqo kuma lahan dowladda balse waxay dolwadda cambaareysaa una aragtaa wax aan la aqbali karin aflagaadada diimeed iyo in la caayo culumada. Pezeshkian wuxuu sheegay in Fatwooyinkaas aysan xiriir la laheyn Mareykanka iyo madaxweynahooda.

Mr. Carlsen ayaa weydiiyay hadii Iran ay taageertay sidii lagu khaarijin lahaa madaxweynaha Mareykanka.

Masoud Pezzekian wuxuu ku jawaabay, "Waa waxba kama jiraan". Tani waa waxa uu doonayo Netanyahu in uu ku abuuro maskaxda dadka Mareykanka, kuna riixo Mareykanka in uu xasillooni-daro ka abuuro gobolka.

Tucker wuxuu kaloo weydiiyay, "Marka ay dhammaadan wadahadalada diblomaasiyadeed ee Mareykanka in la qaadayo canaqabateynta, shirkadaha Mareykanka ay maalgashan doonaan Iran, gobolkana ay nabad ka jiri doonto"?

Mr. Pezeshkian wuxuu sheegay in uu rumeysan yahay in maalgashatada Mareykanka ay imaan karaan Iran oo ay geliyaan hantidooda, ma jirto wax u diidaya maalgashatada Mareykanka in Iran ay maalgeliyaan balse wuxuu sheegay in Israa'iil aysan ogolaaneyn in gobolka uu xasillooni helo. Wuxuu kaloo sheegay Mr. Pezeshkian in uu aaminsan yahay in madaxweynaha Mareykanka Trump uu awood u leeyahay in uu gobolka dajiyo, Israa'iil-na geliyo booskeeda ama waxa uu ku dhacayaa dabinka Netanyahu iyo doonistiisa xun oo ah in gobolka ay ka socdaan dagaallo aan dhammaad laheyn.

Ugu dambeyntii wariyaha waxa uu weydiyay hadii dagaal weyn dhaco in Iran ay kaalmo dhaqaale iyo mid militeri ka filaneyso saaxiibadeed Ruushka iyo Shiinaha?

Waxa uu ku jawaabay madaxweynaha Iran in uu aaminsan yahay Alle iyo in ay awoodaan in ay difaacaan naftooda, madaxbannaanidooda iyo dalkooda.