Maxaa kasoo baxay kulankii degganaa ee Trump iyo Mamdani?

Madaxweynaha Maraykanka Donald Trump ayaa kula kulmay Aqalka Cad duqa cusub ee la doortay ee New York Zohran Mamdani oo ay wada qaateen kulankii lagu tilmaamay inuu noqon doono is-mariwaagii siyaasadeed ee sanadka, balse markii dambe noqday kulan amaan isku qirad labada dhinac ah.

Khudbadiisii guusha doorashada duqa cusub ee isku tilmamaay Dimuqraadi hantiwadaag ah ayaa ku tilmaamay Trump ''kaligii taliye''

Waxaana kulankii Jimcaha kahor afhayeenka madaxweynaha ay ku tilmaantay booqashada Mamdani ''shuuci imaanaya Aqalka Cad''.

Balse iyaga oo isdhinac taagan gudaha Aqalka Cad ayaa labada nin codkoodu uu noqday mid si lama filaan ah u deggen oo isu dhow.

Marar badan ayaa labaduba ay muujiyeen danaha ay wadaagaan ee la xiriira wax ka qabashada dhibaatada sicir bararka iyo la qabsiga qiimaha maciishada ee magaalada New York. Waxaa ay ahaayeen kuwo marar badan dhoolacadeynaya, Trump ayaa u muuqday in uu la qoslayo si'aalaha wariyayaasha ka weydiinayaan weeraradii siyaasada ee Mamdani uu u jeedinayay dhankiisa.

Dabacsanaanta kulanka ayaa u muuqatay inay lama filaan ku ahayd falanqeeyayaasha siyaasada, balse ay sidoo kale muujisay in labada dhinacba ay fahmayaan in xallinta dhibaatooyinka la qabsiga qiimaha nolosha ay muhiim u tahay guushooda siyaasadeed.

Waa arrin la sugayo inuu sii jiri doono is-afgaradkan marka uu Mamdani xilka la wareego 1-da Janaayo.

Ilaa waqtigaas, ''Anigu waan u sacbin doonaa'' ayuu yiri Trump.

Trump oo bogaadin buuxda muujiyay

Isfahamku waxa uu muuqday isla markii y bilaabeen inay saxaafadda la hadlaan.

Iyaga oo la hadlayay warbaahinta kadib kulan gaar ah, ayaa Mamdani uu ka taagnaa Trump midigta, isaga oo gacmaha isku haysta, halka madaxweynaha uu fadhiyay. Luuqadda jirkoodu waxay ahayd mid deggan – gaar ahaan Trump.

Trump ma uusan weerarin Mamdani, taa beddelkeedna dhowr jeer ayuu ammaan u jeediyay.

Madaxweynuhu waxa uu muujiyay rajo ah in Mamdani uu noqon doono "guddoomiye aad u wanaagsan."

Waxaana markii dambe, uu ku daray inuu "hubo in uu shaqo fiican qaban karo."

Ka weecashada su'aalaha la xiriira jihaadka iyo fashiistaha

Mamdani iyo Trump ayaa is-weydaarsaday eedeyn siyaasadeed intii lagu jiray ololaha doorashada duqa magaalada. Wariye ayaa xasuusiyay labadooda in Trump uu Mamdani ugu yeeray "shuuci," halka Mamdani uu madaxweynaha ugu yeeray "kaligii taliye."

Labadooduba waxa ay ka weecdeen su'aalahaas hore, waxayna dib ugu laabteen hadallo ammaano ah. Trump xitaa waxa uu u oggolaaday Mamdani inuu ka jawaabo su'aal ahayd inuu madaxweynaha u arko "faashiist.aha"

"Waa hagaag, waxaad si fudud u dhihi kartaa haa," ayuu Trump yiri isaga oo gacanta si fudud ugu dhufanaya kuna qoslaya. "Waa ay ka sahlan tahay inaad sharaxdo."

Markii uu ku soo dhowaaday Trump dhaleeceynta siyaasadaha Mamdani ayaa ahayd markii uu yiri: "Wuxuu leeyahay aragtiyo waxyar ka fog."

Trump waxa uu iska diiday su'aal weerar ah oo bahwadaagtiisa xildhibaanada Jamhuuriga Elise Stefanik ay ku sheegtay Mamdani "jihaadiste".

"Ma u malaynaysaa inaad hadda la taagan tahay 'jihaadiste'?" ayaa la weydiiyay.

"May, uma malaynayo," ayuu Trump si dhakhso ah uga jawaabay.

Ku xirnaanshaha asal ahaan ee New York

Mamdani iyo Trump waxa ay wadaagaan hal shay: labaduba waa reer New York, waxayna ka soo jeedaan Queens. Trump waxa uu ku dhashay Jamaica Estates, halka Mamdani uu degan yahay Astoria.

Waxay wadaagaan "jacayl la wadaago" oo ay u qabaan magaalada, sida uu Mamdani sheegay.

"Magaaladan waxay noqon kartaa mid cajiib ah – haddii uu guul weyn gaaro, aad baan ugu farxi doonaa," ayuu yiri oo ka hadlayay magaalada uu ku dhashay.

Waxa uu soo jeediyay madaxweynuhu in haddii nolol siyaasadeed oo kala duwan ay jiri lahayd, inuu isaguba jeclaan lahaa inuu noqdo duqa New York.

Diirad saarida nolosha la awoodi karo

Qayb ka mid ah muuqaalka is-afgaradka leh ee laga arkay labada dhinac ayaa ah inay labaduba diiradda saareen arrimaha qiimaha nolosha.

Trump waxa uu ku guuleystay dib u doorashada isaga oo si joogto ah uga hadlayay sicir-bararka sare ee 2024 dadkana ka caraysiiyay. Wuxuu isku dayay inuu muujiyo farriin xasilooni dhaqaale ah.

Intii uu ololaha ku jiray, Mamdani waxa uu xooga saaray hoyga la awoodi karo, wuxuuna soo jeediyay in hoos loo dhigo kordhinta kirada guryaha qaarkood.

Wuxuu sheegay inay Trump ka wada hadleen sidii loo gaarsiin lahaa reer New Yorker helitaanka nolol la awoodi karo.

Markasta oo la weydiiyo su'aal ku saabsan kala duwanaanshahooda, Mamdani wuxuu hadalka ku soo celinayay arrintan.

Su'aal ku saabsan Bariga Dhexe isaga oo ka jawaabaya, ayuu sheegay in codbixiyayaashu ka rabeen "dagaallada aan dhamaadka lahayn" iyo in hoggaamiyayaashu wax ka qabtaan "dhibaatooyinka kharashaadka nolosha."

Dhanka sharci fulinta iyo socdaalka, ayay sidoo kale heleen meel ay ku kulmaan. Mamdani wuxuu sheegay inay ka wada hadleen hawlgallada socdaalka ee dawladda dhexe, isaga oo gudbiyay cabashooyinka dadka deegaanka. Laakiin Trump waxa uu yiri waxay ka hadleen dambiyada wax ka badan socdaalka.

"Isagu ma rabo inuu arko dambiyo, aniguna ma rabo," ayuu yiri Trump. Wuxuu intaasi ku daray inuusan "shaki badan" ka qabin inay labada nin is-fahmi doonaan.

Xitaa waxa uu sheegay inuu ku nabad heli lahaa inuu ku noolaado New York uu Mamdani hoggaamiyo.

Caqabad istaraatiijiyada ah ee Jamhuuriga

Is-dhexgalka wanaagsan ee muuqday Jimcihii ayaa laga yaabaa inuu dhib ku noqdo Jamhuuriga oo raba inay Mamdani ka dhigaan wajiga xisbiga dimuqraadi hantiwadaag ah doorashada dhexe ee 2026.

Horraantii bishan, Jamhuuriyiinta ayaa ku dhibtooday, halka Dimuqraadiyiintu ay ku guulaysteen boosas muhiim ah. Ma cadda in hadal hayntu ay socon doonto.

Jamhuuriyiintu waxa ay qorshaynayaan inay ku muujiyaan Mamdani qof ka soo horjeeda booliiska, ooka soo horjeeda suuqa xorta ah, iyo inuu yahay mid ka soo horjeeda Israa'iil — sida lagu sheegay warbixin ay qortay Axios. Laakiin muuqaalka saaxiibtinimada ee xafiiska Oval-ka ayaa wiiqi kara istaraatiijiyaddaas.

Madaxweynuhu isaga oo ammaamaya Mamdani, wuxuu yiri inuu aaminsan yahay in duqa cusub ''ka yaabin doono qayb kamid ah dadka muxaafidka "