Anas Al-Sharif: Geeridii weriyaha Al Jazeera iyo dardaarankii uu ka tegay

Akoonka wariyaha Al-jazeera ee Anas Al-Sharif ayaa xalay saqdii dhexe waxaa la soo dhigay dardaaran uu barta X ugu talo galay, kaas oo uu ku yiri "Tani waa dardaarankayga iyo farriinteyda kama dambaysta ah. Haddii ay arayadan kusoo gaaraan, ogow in Israa'iil ay ku guuleysatay dilkeyga iyo inay i aamusiiso.

Dardaaranka loo nisbeeyey, ee ku taariikhaysan 6-da Abriil, 2025, Al-Shariif wuxuu leeyahay: "Waxaan ku noolaa xanuunka dhammaan faahfaahintiisa, waxaanan dhadhamiyey xanuunka iyo khasaaraha marar badan, iyadoo ay taasi jirtana, weligey kama laba labeyn inaan runta siday tahay u sheego, anigoon been ka sheegeyn amaba barxeyn.

Daqiiqado ka hor dhimashadiisa Al-Shariif ayaa sii daayay warbixintii ugu dambeysay ee uu kaga hadlayo dagaalka Qasa, wuxuuna yiri "Duqeymahaasi waa kuwo aan joogsanayn, muddo labo saacadood ah waxaa sii xoogeysanayay gardarrada Israa'iil ay ku hayso magaalada Qasa.

Agaasimaha isbitaalka Al-Shifa ee magaalada Qasa ayaa ku dhawaaqay dhimashada shan Falastiiniyiin ah oo ku dhintay weerar ay Israa'iil ku qaadday teendho ay ku jireen saxafiyiin oo ku dhow albaabka isbitaalka.

Dadka dhintay waxaa ku jiray weriyeyaasha Aljazeera Anas al-Sharif iyo Mohammed Qreiqeh, iyo sidoo kale sawir qaadayaasha Aljazeera Ibrahim Daher iyo Moamen Aliwa, iyo darawalkii diyaaradda Mohammed Noufal. Wariye Mohammed Sobh ayaa sidoo kale la dhaawacay, sida ay sheegtay wakaaladda wararka Falastiin ee WAFA.

Kadib weerarkii lagu qaaday teendhada saxafiyiinta, ciidamada Israa'iil ayaa bayaan ay soo saareen ku qirtey in ay bartilmaansadeen Shariif, iyaga oo sheegay in ay beegsadeen "Hoggaamiyaha Xamaas Anas Sharif, oo iska dhigaya wariye Aljazeera." Milatarigu waxa ay ku eedeeyeen in uu hoggaaminayay "Ururka Xamaas iyo isku dubaridka weerarrada gantaalaha ee ka dhanka ah rayidka iyo ciidamada Israa'iil.

Waxa uu ku micneeyay in howlgalka loo adeegsaday saanado sax ah, iyadoo ay barbar socdeen tallaabooyin uu ku tilmaamay in lagu yareynayo waxyeellada dadka rayidka ah, oo ay ku jiraan ilaalinta hawada iyo uruurinta xogo dheeraad ah.

Maxay Al Jazeera ka tiri?

Dhankeeda, Shabakadda Warbaahinta Aljazeera ayaa cambaareysay "dilka qorsheysan ee loo geystay wariyaasheenna Anas Al-Sharif iyo Mohammed Qraiqeh, iyo sawir qaadayaasha Ibrahim Zaher iyo Mohammed Noufal," sida lagu sheegay bayaan ay soo saartay subaxnimadii Isniinta.

Bayaanka ayaa u qornaa sidan: "Dilka wariyeyaasheenna ay u geysteen ciidamada guumeysiga Israa'iil waa weerar cusub, bareer ah oo cad oo lagu hayo xorriyadda saxaafadda...Amarka lagu dilay Anas al-Shariif, oo ka mid ahaa saxafiyiinta geesiga ah ee Qasa iyo saaxiibbadiis waa isku day quus ah oo lagu doonayo in lagu aamusiyo codadka iyadoo la filayo in la qabsado Qasa. Ciidanka xoogga dalka iyo dowladda ayaa mas'uul ka ah beegsiga iyo dilka kooxdooda.

Agaasimaha Al Jazeera English, Salah Negm, oo isna saakay la hadlay BBC ayaa sheegay inaysan "la yaab lahayn" in Israa'iil ay al-Sharif ku sheegto inuu xubin ka ahaa Xamaas, balse wuxuu leeyahay "waxba ma aysan caddeyn".

Wuxuu sheegay in "wax laga xumaado" ay tahay in Israa'iil ay sii waddo inay weriyeyaasha Qasa ugu yeerto "argagixiso".

Negm ayaa sheegay in Al Jazeera ay ka war heyso taariikhda iyo tababarka weriyeyaasheeda, "waanan ognahay natiijada ay na siinayaan, waxaana ka eegeynaa dhowr meel, oo ay ku jiraan waxa aad BBC kusoo tebineysaan".

"Waxaan saxaafadda ku jiray ilaa 40 sano... waxaana arkay dad tebinaya dagaallo waxaana jiray dhibbaneyaal, balse ma aha dil bareer ah sidan oo kale, dadka uu dilka ka go'an yahayna way baxsadaan iyagoo aan la ciqaabin".

Wuxuu sheegay in tan ay weriyeyaasha siineyso "ka go'naanshaha sii wadidda shaqooyinkeenna".

Waa kuma Anas al-Shariif?

Anas Al-Shariif waxa uu sannadkii 1996-kii ku dhashay Xerada Jabalia ee Waqooyiga Marinka Qasa, wuxuuna ka mid ahaa weriyeyaasha ugu caansan Al jazeera tan iyo markii uu dagaalka qarxay bishii October ee sannadkii 2023-kii.

Al-Shariif ayaa had iyo jeer ka soo muuqday muuqaallo toos ah oo laga soo tebiyo meelaha ku dhow goobaha la duqeeyay ama khadadka lagala xiriiro, isaga oo gudbin jiray muuqaallo toos ah.

Bishii Disembar 2023, wuxuu aabbihiis, Jamaal Al-Shariif (65 jir) ku waayay bam lala beegsaday guriga qoyska, ka dib wuxuu sii watay shaqadiisa saxafinnimo.

Al-Shariif ayaa ka warbixiyey beegsiga asxaabtiisa oo ay ku jiraan Ismail al-Ghoul iyo Rami al-Rifi, kuwaas oo lagu dilay duqeyn cirka ah oo lagu qaaday xerada qaxootiga Shaati sanadkii 2024-kii.

Al-Shariif wuxuu ahaa xaasle, wuxuuna ka tegay wiil iyo gabadh. Bishii Jannaayo, xaaskiisa ayaa bartiisa Instagram-ka ee la xaqiijiyay soo dhigtay sawir isaga iyo labo carruur ah oo uu dhalay.