Dalkii ugu horeeyey ee shaaciyey aqoonsiga Falastiin oo ku dhawaaqay taariikhda uu aqoonsan doono

Dowladda Australia ayaa ku dhawaaqday qorshe ay Falastiin dal ugu aqoonsaneyso bisha soo socota ee Sabtembar kaddib markii tallaabooyin tan la mid ah ay hore ugu dhaqaaqeen dalal ay ka mid yihiin UK, Faransiiska iyo Canada.

Raysalwasaaraha Australia, Anthony Albanese, waxa uu sheegay in ay ogaadeen in ay ka go'an tahay madaxda Falastiin in hubka la dhigo, lana qabto doorashooyin guud, lana sii wado xaqa ay Israel u leedahay in ay jirto.

"Xalka labo dal oo daris ah waa rajada ugu fiican bani'aadanka ee lagu joojinayo dagaalka Bariga Dhexe, laguna dhameynayo dagaalka, dhibaatada iyo macluusha Gaza," ayuu yiri raysalwasaaraha.

Isreal waxaa ku sii kordhaya cadaadiska la saarayo ee looga doonayo in ay soo afjarto dagaalka Gaza, waxay sheegeen hadii Falastiin la aqoonsado in taasi ay u noqoneyso "abaalmarin la siiyo argagixisada".

Ilaa iyo sabtigii, shan qof ayaa macluul iyo nafaqo-daro ugu dhimatay Gaza taas oo tirada guud ee geerida ka dhigeysa 217 sida ay sheegtay wasaarada caafimaadka Gaza.

Waxay sidoo kale wasaaradu sheegtay in tirada guud ee la dilay ilaa iyo markii uu bilowday weerarada Israel sanadkii 2023-kii ay ka badan tahay 61 kun oo qof.

Israel waxay bilowday weerarada Gaza kaddib markii Xamaas ay 7-dii Oktoobar isla sanadkaas weerar qaaday. Weerarkaas Xamaas waxaa la sheegay in ay ku dhinteen ku dhawaad 1,200 oo qof, waxaana la qafaashay 251 kale.

Madaxda Falastiin ee maamulo qeybo ka mid ah dhulka Israel ay haysato ee Daanta Galbeed ayaa mar sii horreysay sheegtay in Falastiin oo dal loo aqoonsado ay muujineyso taageerada ay u hayaan dadkeeda iyo sida ay uga go'an tahay.

Raysalwasaare Anthony Albanese wuxuu sheegay in go'aanka la gaaray ka dib markii dowladiisa ay ka heshay madaxweynaha Falastiin Mahmoud Abbas in Xamaas aysan kaalin ku yeelan doonin mustaqbalka dal Falastiin ah.

Tallaabadan ayaa sidoo kale ku soo aaday kaddib wadahadalo uu la yeelanayay madaxda dhigiisa ee dalalka Faransiiska, UK, New Zealand iyo Japan afar iyo tobankii habeen ee la soo dhaafay sida uu sheegay Mr. Albanese.

"Fursad ayaa halkan ka muuqata, Australia waxay bulshada caalamka kala shaqeyneysaa in ay taasi ka faa'ideysato," ayuu u sheegay warbaahinta.

Axadii la soo dhaafay, dibadbax lagu taagerayay Falastiin waxaa ka qeybgalay tobanaan kun oo taageerayaal ah kuwaas oo socod ku maray buundada Harbour ee Sydney. Dadka ayaa dibadbaxa dhigay maalin kaddib markii ay ogolaatay in la qabto maxkamada.

Mareykanka ayaa cadeeyay in uu taasi ogolaaneyn, waxa uuna aaminsan yahay hadii Falastiin dal loo aqoonsado in taasi ay abaalmarin siineyso Xamaas.

Dhammaadkii toddobaadka, madaxweyne ku xigeenka Mareykanka JD Vance ayaa ku celiyay in Mareykanka aysan qorshaha ugu jirin in uu aqoonsado dal Falastiin ah isagoo sheegay in aysan ka jirin halkaas dowlad shaqeyneysa.

Shir jaraa'id uu qabtay Axadii raysalwasaaraha Israel, Benjamin Netanyahu, ayaa dhaliilay dalalka qorsheynaya in ay aqoonsadaan dal Falastiin ah.

"In dalalka Yurub iyo Australia ay arinkan degdeg u sameeyaan… waa niyad jab – dhabtii waa ceeb"," ayuu yiri Mr. Netanyahu.

"Way ogyihiin waxay ay sameyn lahaayeen hadii meel u dhow Melbourne ama ku dheggan Sydney uu ka dhici lahaa weerarkan naxdinta leh. Waxay ila tahay in ugu yaraan aad sameyn laheydeen waxa aan sameyneyno,"

Cadaadis ayaa maalimihii u dambeeyay la saaray kaas oo looga horjeeda qorshaha Israel ay ku qabsaneyso Gaza. Safiirada dalalka u fadhiya Qaramada Midoobay ayaa cambaareeyay tallaabadan uu Netanyahu ku sheegay in tahay "tan ugu fiican" ee lagu dhameyn karo dagaalka.

Sanadkii la soo dhaafay dalalka Spain, Ireland iyo Norway ayaa Falastiin u aqoonsaday dal iyagoo rajeynaya in taasi ay dhiirogeliso xabad-joojin dhexmarta Israel iyo Xamaas.

Falastiin waxaa hadda dal u aqoonsan 147 dal oo ka mid ah 193-da xubnood ee Qaramada Midoobay. Hadda waxay Qaramada Midoobay ku fadhidaa Falastiin dal korjoogto ah oo go'aanada la gaaro aan cod ku laheyn.