Waa kuma Siyaasiga miisaanka culus ee taageeray aqoonsiga Somaliland

Mid ka mid ah madaxda la soo doorto ee Maraykanka ee saamaynta leh ayaa madaxweynaha Maraykanka Donald Trump ka dalbaday in aqoonsi heer waddan la siiyo Somaliland oo tan iyo 1991 baadigoob ugu jirto inay ictiraaf hesho.

Ted Cruz oo ah mudane ka tirsan xisbiga Jamhuuriga ee uu madaxweynahana ka tirsan yahay, lagana soo doorto gobolka Texas wuxuu codsigiisa u diray qoraal uu ku bilaabay sidii Somaliland ay madaxbanaanideeda ku qaadatay 1960 iyo hadda halka ay taagan tahay.

"Somaliland waxay noqotay saaxiib muhiim u ah Maraykanka dhinaca amniga iyo diblomaasiyadda, taasoo ka caawinaysa Maraykanka horumarinta danaha amniga qaranka ee Geeska Afrika iyo meelo kaleba. Waxay ku taal meel istaraatiiji ah oo ah gacanka Cadmeed, iyadoo u dhow mid ka mid ah marinnada badda ee ugu mashquulka badan adduunka. Waxay leedahay ciidamo hubaysan oo tayo leh, waxayna gacan ka geysataa la dagaalanka argagixisada iyo hawlgalada burcad badeeda ee gobolka" ayuu yiri Cruz.

Isagoo ku salaynaya codsigiisa siyaasadaha Maraykanka ee gobolka ayuu soo qaatay Ted Cruz xiriirka Taiwan iyo Somaillamd u dhaxeeya, siu u uga dhaadhiciyo Maraykanka in Somaliland ay u noqon karto bahwadaag sax ah.

"Waxaa u suurto gashay in xafiiska wakiilka Taiwan laga furo xarunta Hargeys, ayagoo dhanka kalena doonaya inay xiriir adag la yeeshaan Israa'iil oo ay taageeraan heshiiska Abraham. Waxay soo jeedisay inay martigeliso joogitaanka ciidamada Maraykanka meel u dhow badda cas oo ku taal gacanka cadmeed, waxayna u furan tahay Somaliland heshiisyada macdanta muhiimka ah ee taageeraya wax soo saarkeena. Iskaashiga Maraykanka iyo Somaliland waa mid adag, wuuna sii xoogaysanayaa" ayuu sii raaciyey Cruz.

Wuxuu intaa ku daray in dhinacyada ka so horjeeda ay cadaadis xoog leh saarayaan, ayadoo sababtuna ay tahay kaalinta yar ee ay ku leedahay baghwadaagnimada Maraykanka iyo xulafadiisa.

"Xisbiga Shuuciga ah ee Shiinaha (CCP) ayaa adeegsanaya cudud dhaqaale iyo mid diblamaasiyadeed si uu Somaliland ugu ciqaabo taageerada ay u hayso Taiwan, iyo sidoo kale inuu wiiqo taageeradaas. Dawladda Soomaaliya waxay door nasiib darro ah ku lahayd dadaalladaas: Bishii April 2025, CCP wuxuu diyaariyey in Soomaaliya laga mamnuuco dadka sita Baasaboorka Taiwan si ay ugu gudbaan Somaliland, iyo taageerada Shiinuhu u fidiyaan Soomaaliya waxa ka faa'iidaysanaya kooxaha Somaliland-diidka ah ee ku hawlan sidii loo dumin lahaa qaranimadeeda".

"Inkastoo ay khatarahaas wajahayso, misna Somaliland waxaa weli ka go'an in ay xiriir dhow la yeelato Maraykanka, waxaanay si firfircoon ugu hawlan tahay horumarinta iskaashiga milatari, dadaalada la dagaalanka argagixisada, iyo iskaashiga dhaqaalaha iyo ganacsiga. Si taas loo sameeyo oo loo gaaro saamaynta ugu weyn iyo faa'iidada ugu weyn ee danaha amniga qaranka Mareykanka, waxay u baahan tahay maqaam dawladeed. Waxaan idinka codsanayaa inaad aqoonsigaas siisaan" ayuu ku yiri qoraalkiisa senator Ted Cruz oo ka mid ah siyaasiyiinta xisbiga Jamhuuriga ee miisaanka leh.

Ted Cruz Waa sharci yaqaan wax ku soo bartay jaamacadda Harvard, Wuxuuna markii ugu horreysay ku soo biiray aqalka Senetka 2013, xiriirka uu la leeyahay Donald Trump-na wuxuu ahaa mid gabi dhacleynayey, ayadoo labada nin ay si aan qarsoodi lahayn isku dhaafsanayeen hadallo kulul.

Laakinse wuxuu ka mid ahaa siyaasiyiintii ogolaaday inuu mar labaad tartamo Trump horraantii sannadkii 2024.

Cruz kaliya ma aha ee waxaa jira siyaasiyiin kale oo Maraykan ah oo xafiisyo dawladeed haya, kuwaasoo u ololeynaya in Somaliland la aqoonsado, waxaana ka mid ah Scott Perry.

Scott Perry wuxuu ka tirsanaa aqalka Koongareeska 2023-2024, gaar ahaan guddiga arrimaha dibadda, wuxuuna dabayaaqada sannadkii hore aqalka horgeeyey xeer cusub oo u ololaynaya in Somaliland loo aqoonsado dal madax-bannaan.

Hindise Sharciyeedka oo tirsigiisu yahay 10402 waxa uu hoosta ka xariiqayaa xasiloonida Somaliland ee tobanaanka sano socotay, ka go'naanta dimuqraadiyadda, iyo muhiimadda istiraatijiyadeed ee Geeska Afrika oo ah sababaha ugu muhiimsan ee aqoonsiga Maraykanka.

Dhowr sano ka hor waxaa Maraykanka booqday madaxweynihii hore ee Somaliland Muuse Biixi oo ay caawinaysay hay'adda cilmi barista Heritage oo ah hay'ad aad ugu dhow xisbiga Jamhuuriga

Sharcigan ayaa ku jira marxaladda koowaad ee habraaca sharci dejinta. Waxaa Congress-ka la geeyay Diisambar 12, 2024.

Somailland waxay muddooyinkii dhawaa galangal xoog leh ugu jirtay sidii ay u soo jiidan lahayd Maraykanka, ayadoo wasiirka arrimaha dibadda uu dhawaan Maraykanka tegey siu u taageero ugu raadiyo ictiraafka.

Wasiiru-dawlaha arrimaha dibadda ee Soomaaliya Cali Cumar (Cali Balcad) ayaa bartiisa X wuxuu soo dhigay qoraal ku qoran luqad diblomaasiyadeed, isagoo yiri "Geeska Afrika wuxuu ku sugan yahay meel isgoys ah. Xagjirnimo, abaar, dagaal iyo qalaalqal loo gaysanayo ganacsiga dunida ayaa dalbanaya iskaashi ee ma aha kala qoqobnaan. Soomaaliya iyo Maraykanka waxayna awoodaan, ayna tahay inay si wadajir ugu istaagaan difaacidda deganaanshaha, dimoqaraadiyadda, iyo barwaaqada la wadaago".