Sida aad dheeha jirkaaga u ilaalin karto xilliga Soonka

Bisha barakaysan ee Ramadan ayaa ah bil sanadkiiba mar ay soomaan Muslimiinta, waana bil cibaado badan ay la yimaadaan.

Muslimiinta ayaa maalinkii oo dhan ka dheeraanaya cunnada iyo cabitaanka ilaa gabbalku ka dhaco.

Soonka ayaa waxaa uu sidoo kale fursad noo siinayaa inaan fahanno xanuunka iyo dhibaatada haysata malaayiinka qof ee la nool faqriga iyo gaajada.

Hasa yeeshee dadka qaar ayaa waxaa ku dhaca fuuq bax, hurdada oo ku yaraata iyo cunadda oo uusan si fiican u qaadan.

Arrimahan ayaa waxay dhammaan saameynayaan jirka qofka iyo dheehiisa inta lagu guda jiro bisha barakeysan ee Ramadan.

Dr. Muneeb Shah waxaa uu caan ka yahay barta Tik Tok waxaa uu ku takhasusay cudurrada maqaarka ama jirka iyo daryeelkiisa.

Dr. Muneeb Shah ayaa soo jeedinaya in dadka ay daryeel dheeraad ah siiyaan jirkooda xilligan lagu guda jiro bisha barakeysan ee Ramadan.

Isagoo u warramayay BBC-da, waxa uu yiri, “Markii aan koray, ma jirin saaxiibbo badan oo Koonfurta Aasiya ka soo jeeda iyo Muslimiin badan oo sooman.

"Mid ka mid ah waxyaabaha ugu waaweyn ee looga faa'iiday baraha bulshada ayaa ah in meel kasta oo aad adduunka ka joogtid aad ka heli karto dad kula mid ah dhanka khibradda."

Tan iyo markii uu soo dhigay muuqaalkiisii ​​​​ugu horreeyay ee TikTok 2020, Dr. Shah waxa ku soo taxmay oo ku soo xirmay in ka badan 1.7 milyan oo taageerayaal ah wuxuuna noqday dhakhtarka maqaarka ee dadka ugu badan ay ku xiran yihiin baraha Internet-ka.

Sida uu sheegay Dr. Shah, ujeeddadiisu waa in uu beeniyo khuraafaadka ku saabsan daryeelka maqaarka iyo in uu muujiyo saamaynta togan ee Ramadaantu ku yeelan karto maqaarka ama jirka qofka.

"Dhibaatooyin badan oo maqaarka ah, sida cudurka psoriasis iyo finanka, ayaa loo yaqaan cudurrada caabuqa, cilmi-baarisyada qaarkood waxay muujinayaan in dadka sooma inta lagu jiro Ramadaanka ay dhab ahaantii ku yar yihiin cudurka psoriasis," ayuu yiri.

Muxuu Dr. Shah ku taliyay in aad jirkaaga daryeesho inta lagu jiro Ramadaanka, maxay yihiin talooyinkiisa ugu sarreeya?

Fuuq-baxa jirka qofka sooman

Inta lagu jiro Soonka, maqaarkaagu wuxuu si fudud u lumin karaa qoyaan wuuna fuuqbaxi karaa, sidaa darteed Dr. Shah, oo qudhiisa sooman ayaa kula taliyay dadka inay isticmaalaan waxyaabaha qoya jirka sida kareemada.

"Shan jeer oo aad tukato maalintii oo aad dhaqdo wejigaaga ka hor salaad kasta waxay runtii qallajin kartaa maqaarka dadka qaarkood," ayuu yiri.

"Waa inaad marsatid wax qoyan sida kareemada ka dib markaad wejigaaga dhaqdo, sababtoo ah runtii waa muhiim, haddii kale lakabka sare ee maqaarkaaga waxyeello ayaa soo gaari karta" ayuu yiri Dr. Shah.

Cun cunno isu dheellitiran

Sida laga soo xigtay Dr. Shah, 'Dadka qaarkood waxay yiraahdaan maqaarkooda ayaa ka sii dara inta lagu jiro Ramadaanka, sababtoo ah cuntada ay cunaan ayaa si weyn isu beddesha Ramadaanka. Marka la eego, waxa muhiimka ahi waa waxa aad samayso marka aad afureyso.

Cunista cunto culus marka aad afureyso iyo marka aad suxuuraneyso, iyo cunista waqti xaddidan, waxay jirkaaga ka saari kartaa cunto nafaqo leh. Tani waxay saameyn xun ku yeelan kartaa maqaarkaaga.

Dr. Shah wuxuu ku taliyay in aan cunno wax kasta oo aan jecelnahay marka aan afureyno, laakiin dhexdhexaadnimadu waa furaha. Cuntooyinka shiilan wax lug ah kuma laha finan, laakiin cunista wax kasta oo badan ayaa sababi kara finan.

"Waxaan cunnaa cuntooyin shiilan oo badan marka aan afurayo, uma maleynayo inay si xun u saameynayso maqaarkayga, balse dadka qaar ayaa u arka in waxyaabaha shiilan ay dhab ahaantii saameynayaan maqaarka.

Ramadaankaaga ka dhigo mid sahlan

Inta lagu jiro Ramadaanka, cuntada iyo waqtiyada hurdada ayaa si weyn isu beddela, markaa dadku waa inay hab-nololeedkooda u hagaajiyaan si habboon.

Laakiin Dr. Shah ayaa sheegay in marka la eego daryeelka maqaarka, xilliga Ramadan aad iska isticmaali kartaa waxyaabihii horey aad jirkaaga u isticmaali jirtay.

Waxaa jira fikiro khaldan oo ah in xilliga bisha Ramadan aadan isticmaali karin kareemadii aad horey u isticmaali jirtay, ayuu yiri.

"Laakiin waxaan filayaa inaad weli isticmaali karto waxyaabaha aad jirka marsato ee caadiga ah iyo muraayadaha qorraxda markaad sooman tahay."

Dr. Shah ayaa ku talinaya in la maro saddex tallaabo oo ku saabsan daryeelka jirka.

Nadiifinta jirka, in qofka ka dib uu marsado kareem islamarkana uu la socdo marxaladda daryeelka jirkiisa.

Sida Dr. Shah, Farah Ferrero waxay sidoo kale la wadaagtaa talooyinka daryeelka maqaarka taageerayaasheeda baraha bulshada.

Khiladi, oo 29 jir ah, kana soo jeeda magaalada Leicester ee dalka UK, ayaa aaminsan inay jiraan macluumaad badan oo khaldan oo online ka ah oo ku saabsan daryeelka maqaarka inta lagu jiro Ramadaanka halkaas oo lagugu sheego inaad isticmaasho waxyaabaha qaar balse taasi ha dhageysan oo ha sameyn.

"Qaar ka mid ah dadka waxaa ay iska ilaaliyaan in ay isticmaalaan kareemada jirka xilliga lagu guda jiro bisha Ramadan ," ayay tiri.

Farah waxay sidoo kale ku talinaysaa in la labnlaabo nadiifinta jirka inta lagu guda jiro bisha Ramadaanka.