Maxaan la ogeyn oo ka dhacay Qasa 12-kii maalmood ee dagaalka Iiraan iyo Israa'iil

Shaki kuma jiro in gantaallada Israa'iil ay ku rideen dhanka Iiraan Juun 13 ay ka jeediyeen indhaha caalamka wixii ka dhacayey Qasa, kaasoo socday muddo 100 maalmood ah.

Dagaalka u dhexeeya Israa'iil iyo Iiraan wuxuu qarxay wax ka yar maalin kadib markii Golaha Guud ee Qaramada Midoobay uu si aqlabiyad leh u ansixiyay qaraar ku baaqaya in si degdeg ah, shuruud la'aan ah, oo joogto ah loo joojiyo dagaalka Qasa, isla markaana la sii daayo dhammaan dadka la haysto.

Xilligaas, mas'uuliyiinta Israa'iil waxay markale jareen internet-ka iyo isgaadhsiinta guud ahaan marinka Falastiin ee Qasa, taasoo ahayd sadex malmood oo xidhiidh ah. Dad badan oo deegaankaas ku nool ayaa cabsi ka muujiyay in masiibada ay muddada 20-ka bilood ah la daala dhacayeen laga sii jeedsan doono, iyo in tirada dhimashadu sii kordhi doonto.

Mas'uuliyiinta caafimaadka ee Qasa waxay sheegeen in militariga Israa'iil ay dileen in ka badan 800 qof oo Falastiiniyiin ah intii lagu guda jiray dagaalka 12-ka maalmood socday ee ay Israa'iil la galeen Iiraan, taasoo ka dhigan in dhimashada Qasa ay dhaaftay 610 qof oo la sheegay inay ku dhinteen Iiraan, sida ay sheegeen masuuliyiinta Tehraan.

Juun 13

Ilo caafimaad ayaa sheegay in 25 Falastiiniyiin ah ay ku dhinteen duqeymo cirka ah oo Israa'iil ka fulisay Marinka Qasa tan iyo waaberigii Jimcaha, halka Isbitaalka Al-Awda uu sheegay in 16 qof ay ku dhaawacmeen weerarro ay fuliyeen diyaaradaha aan duuliyaha lahayn.

Guutada Al-Quds, oo ah garabka milatari ee Dhaqdhaqaaqa Jihaadka Islaamiga ah, ayaa ku dhawaaqday inay qarxiyeen gaadhi ciidan oo Israa'iili ah iyadoo la isticmaalayo waxyaabo qarxa oo laga sameeyay qalab horey uga hadhay ciidanka Israa'iil, waqooyiga Khan Yunis. Waxay sidoo kale shaaciyeen inay qarxiyeen meel miinooyin ah oo ay lahaayeen ciidamada injineeriyada Israa'iil dhanka bari ee Khan Yunis.

Guutada Abu Cali Mustafa, oo ah garabka milatari ee Xisbiga Dadweynaha ee Xoreynta Falastiin, ayaa sheegtay inay hoobiyayaal ku garaaceen koox ciidan Israa'iili ah oo ku sii jeeday xaafadda Shujaaciya ee bariga Magaalada Qasa.

Dhanka kale, Hay'adda UNRWA ayaa ka digtay in yaraanta daawooyinka suuxdinta ee isbitaallada ay sababtay in carruur badani ay toosaan inta lagu guda jiro qalliinkooda, iyadoo Israa'iil lagu eedeeyay inay xayiraad saartay gelitaanka agabka caafimaadka iyo gargarka bani'aadantinimo ee lagama maarmaanka ah.

Juun 14

Duqayn culus oo madaafiicda goobta ah ayaa markale lagu bilaabay Magaalada Qasa, xeryaha qaxootiga ee Jabaliya, iyo Bayd Laaxiya oo ku yaalla waqooyiga Marinka Qasa. Madaafiicda ayaa sidoo kale lagu garaacay agagaarka Isbitaalka Nasser, Jaamacadda Islaamiga ah, iyo tuulada Al-Fakhari ee Khaan Yuunis oo koonfurta ku taalla.

Isbitaalka Nasser ee magaalada Kahan Yuunis ayaa sheegay in ugu yaraan 16 qof lagu dilay duqeymo cirka ah oo Israa'iil habeenkii ka geysatay deegaankaas.

Telefishinka Al-Aqsa ayaa sidoo kale soo xigtay ilo ku sugan Isbitaalka Nasser kuwaasoo sheegay in 40 qof lagu dilay Khaan Yuunis tan iyo waaberigii Sabtidii, iyadoo lagu dilay duqeymo Israa'iil fulisay.

Xamaas ayaa bayaan ay soo saartay ku cambaareysay dilka in ka badan 15 Falastiiniyiin ah oo sugayay caawimaad, waxayna markale ku celisay eedeynta ah in dowladda Israa'iil ay gargaarka iyo gaajada u adeegsaneyso sidii "hub loogu dilo, lagu ceebeyo, looguna xadgudbo dadka rayidka ah ee aan waxba galabsan."

Wasaaradda Caafimaadka ee Gaza ayaa ku dhawaaqday in ugu yaraan 29 qof lagu dilay guud ahaan Marinka Qasa labadii maalmood ee la soo dhaafay iyagoo raadinayay caawimaad.

Ugu danbayntiina TV-ga Al-Aqsa ayaa shaaciyay in tirada shaqaalaha gargaarka ee la dilay ay kor u dhaaftay 66 Falastiiniyiin tan iyo waaberigii Sabtidii.

Wasaaradda Caafimaadka ee Gaza waxay sidoo kale sheegtay in 90 Falastiiniyiin ah la dilay 605 kalena ay ku dhaawacmeen labadii maalmood ee u dambeeyay, iyadoo intaa lagu daray in ugu yaraan 300 qof lagu dilay iyo in ka badan 2,600 kalena lagu dhaawacay meelaha lagu qaybinayo gargaarka.

Juun 15

Mas'uuliyiinta caafimaadka ee Qasa ayaa sheegay in ugu yaraan 41 Falastiiniyiin ah lagu dilay guud ahaan Marinka Qasa Axaddii, shan ka mid ahna lagu dilay meel u dhow laba xarumood oo gargaar bixin ah oo ay maamusho Hay'adda Gargaarka Bani'aadantinimo ee Qasa oo ay Maraykanku taageeraan.

Shaqaalaha caafimaadka ayaa sidoo kale sheegay in duqeyn cirka ah lagu dilay toddoba qof magaalada Beyd Laaaxiya ee waqooyiga Marinka Gasa.

Xeryaha qaxootiga ee Nuseirat ee bartamaha Qasa, shaqaalaha caafimaadka ayaa sheegay in duqeyn Israa'iil ka geysatay guri ku yaalla halkaas ay dishay ugu yaraan 11 qof. Waxay intaas ku dareen in inta kale lagu dilay duqeymo kala duwan oo ka dhacay koonfurta Qasa.

Juun 16

Wasaaradda Caafimaadka ee Marinka Qasa ayaa ku dhawaaqday in ugu yaraan 50 Falastiiniyiin ah lagu dilay Isniintii, kadib duqeymo ay fuliyeen ciidamada Israa'iil, ku dhowaad kala bar dadkaasi waxay ku dhinteen meel u dhow xarun gargaar oo ay maamusho Hay'adda Gargaarka Bani'aadantinimo ee Qasa Mas'uuliyiin ka tirsan Qaramada Midoobay ayaa cambaareeyay hababka Israa'iil taageerto ee lagu gaarsiiyo gargaarka.

Shaqaalaha caafimaadka ayaa sheegay in ugu yaraan 23 qof lagu dilay, 200 kalena lagu dhaawacay meel u dhow xarun gargaar oo ku taalla magaalada Rafah.

Dhinaca dagaalka, Guutooyinka Al-Quds iyo Al-Qassam ayaa shaaciyay in ay beegsadeen cutub ciidan Israa'iili ah oo lugta ah magaalada Abasan ee bariga Khan Yunis. Waxay intaas ku dareen in dagaalyahannadoodu ay arkeen diyaarad Israa'iili ah oo degaysa si ay u daadgureyso dhaawaca.

Juun 17

Hay'adda Gurmadka Rayidka ee Qasa ayaa sheegtay in ciidamada Israa'iil ay dileen in ka badan 50 Falastiiniyiin ah isla markaana ay dhaawaceen 200 kale Talaadadii, xilli weerar lagu qaaday Xarunta World Central Kitchen ee Khan Yunis, koonfurta Marinka Qasa.

Milatariga Israa'iil ayaa sheegay inay baarayaan "wararka sheegaya dhaawacyo kala duwan" oo ka dhashay rasaas ay fureen, iyagoo intaa ku daray inay "arkeen dad isugu yimid meel u dhow gaari gargaar ah oo hakad galay" agagaarka ciidamada Israa'iil.

Sidoo kale, koonfurta magaalada Rafah, Gurmadka Rayidka ayaa sheegay in afar qof lagu dilay rasaas ay fureen ciidamada Israa'iil, halka laba kale lagu dilay duqeyn ka dhacday meel u dhow isbitaal ku yaalla waqooyiga Magaalada Qasa.

Juun 18

Hay'adda Gurmadka Rayidka ee Qasa ayaa ku dhawaaqday in 33 qof lagu dilay rasaasta ciidamada Israa'iil, kuwaas oo ay ku jiraan 11 qof oo gargaar raadinayay bartamaha Qasa.

Gurmadka Rayidka ayaa sidoo kale sheegay in 19 qof oo kale lagu dilay saddex duqeyn oo Israa'iil fulisay Arbacadii, kuwaasoo lagu beegsaday guryo iyo teendho ay deganaayeen dad barakacayaal ah.

Ciidamada Israa'iil ayaa ku dhawaaqay in a sargaalka sare oo lagu magacaabo Stav Halfon, uu ku dhintay hawlgal ka dhacay koonfurta Marinka Qasa.

Dhacdada kale, saddex qof ayaa lagu dilay duqeyn Israa'iil ka geysatay xaafad ku taalla waqooyi-bari Magaalada Gaza Arbacadii.

Wasaaradda Caafimaadka ee Qasa ayaa Arbacadii galabteeda sheegtay in 144 Falastiiniyiin ah la dilay, 560 kalena la dhaawacay 24-kii saac ee lasoo dhaafay.

Juun 19

Hay'adda Gurmadka Rayidka ee Qasa ayaa sheegtay in ugu yaraan 77 Falastiiniyiin ah lagu dilay, oo ay ku jiraan in ka badan 20 qof oo gargaar qaadanayay bartamaha iyo koonfurta Qasa, taasoo ahayd duqeyntii ugu xoogganayd ee Israa'iil toddobaadkan gudihiis.

Hay'addu waxay intaas ku dartay in diyaaradaha aan duuliyaha lahayn ee Israa'iil ay beegsadeen xerada qaxootiga ee Al-Shati oo ku taalla galbeedka Magaalada Qasaa, halkaas oo ay ku dhinteen 23 qof, oo ay carruur ku jiraan.

Wararka ayaa sidoo kale sheegaya in diyaaradaha Israa'iil ay duqeeyeen shan goobood oo kale gudaha magaalada, iyo xaafad la deggan yahay oo ku taalla waqooyiga Jabaliya.

Sidoo kale, 21 qof ayaa la sheegay in lagu dilay meel u dhow xarun gargaar oo ay maamusho Hay'adda Gargaarka Bani'aadantinimo ee Qasa, iyaga oo sugayay gargaar.

Wasaaradda Caafimaadka ee Qasa ayaa sheegtay in 69 Falastiiniyiin ah la dilay, 221 kalena la dhaawacay.

Juun 20

Mas'uuliyiinta Qasa ayaa sheegay in ugu yaraan 44 Falastiiniyiin ah lagu dilay Jimcihii, badankoodna ay ahaayeen dad gargaar raadinayay. Ugu yaraan 25 ka mid ah dadkaasi waxay sugayeen gaadiidka gargaar ah koonfurta Netzarim, bartamaha Marinka Qasa.

Dhanka kale, shaqaalaha gurmadka degdegga ah ee Qasa ayaa sheegay in ugu yaraan 19 qof lagu dilay weerarro milatari oo Israa'iil ka fulisay Qasa Jimcihii, oo ay ku jiraan 12 qof oo lagu dilay guri ku yaalla magaalada Deir al-Balah ee bartamaha Qasa.

Isla waqtigaas, hay'adda UNICEF ayaa ka digtay in shidaal la'aanta haysata ceelasha iyo warshadaha nadiifinta biyaha ee Qasa ay ka dhigan tahay in Marinka Qasa uu wajihi karo "Macaluul ku talo gal ah."

Afhayeenka UNICEF, James Elder, ayaa yidhi: "Carruurtu waxay bilaabi doonaan inay harraad u dhintaan," isagoo intaa raaciyay in oo keliya 40% ka mid ah goobaha biyaha la cabo laga soo saaro ay shaqeynayaan, taasoo aad uga hooseysa heerarka degdegga ah ee loo baahan yahay.

Guutada Al-Quds ayaa sheegtay in dagaalyahannadoodu ay fuliyeen hawlgal "isku dhaf ah", iyagoo beegsaday xarunta taliska iyo maamulka Israa'iil iyo cutub ka tirsan ciidamada gaarka ah ee Khan Yunis. Waxay sidoo kale sheegeen in ay la socdeen diyaarado helikobtaro ah oo qaadayay dhaawaca.

Hawlgal kale oo gaar ah, Guutada Al-Quds ayaa ku dhawaaqday inay dileen askari Israa'iili ah oo ay sheegeen inuu beegsanayay dad rayid ah bariga xaafadda Shujaaciya ee Magaalada Qasa. Waxay sidoo kale xaqiijiyeen in ay "burburiyeen" gaari ciidan Israa'iili ah iyadoo la adeegsanayo waxyaabo qarxa oo culus.

Juun 21

Wasaaradda Caafimaadka ee Qasa ayaa sheegtay in 202 Falastiiniyiin ah lagu dilay, 1,037 kalena lagu dhaawacay labadii maalmood ee lasoo dhaafay, kadib duqeymo Israa'iil fulisay.

Gurmadka Rayidka ee Qasa ayaa sabtidii ku dhawaaqay in ugu yaraan 17 qof ay ciidamada Israa'iil dileen, kuwaas oo ay ku jireen 8 qof oo raadinayay cunto.

Bayaankii Sabtidii, Agaasimaha Kumeelgaarka ah ee Hay'adda Gargaarka Bani'aadantinimo ee Gaza, John Acree, ayaa sheegay in hay'addu "gargaar ballaadhan si ammaan ah oo wax ku ool ah u bixiso, balse aysan buuxin karin baahida dhabta ah maadaama qaybo badan oo Qasa ah ay xidhanyihiin."

Wasaaradda Caafimaadka Qasa ayaa sheegtay Sabtidii in ugu yaraan 450 qof lagu dilay, ku dhowaad 3,500 kalena lagu dhaawacay rasaasta Israa'iil tan iyo markii Hay'adda Gargaarka Bani'aadantinimo ee Qasa ay billowday qaybinta cuntada dabayaaqadii bisha Maarso.

Juun 22

Wasaaradda Caafimaadka ee Qasa ayaa sheegtay in 51 Falastiiniyiin ah lagu dilay, 104 kalena lagu dhaawacay 24-kii saac ee la soo dhaafay, kadib duqeyn ay Israa'iil geysatay.

Gurmadka Rayidka ayaa sidoo kale daabacay sawirrada aaska mid ka mid ah xubnahooda oo ay sheegeen inuu ku dhintay rasaas ay fureen ciidamada Israa'iil.

Ra'iisul Wasaaraha Israa'iil Benjamin Netanyahu ayaa Axaddii sheegay in guulaha laga gaaray dagaalka ka dhanka ah Iiraan ay xoojin doonaan mowqifka Israa'iil ee Qasa, ayna gacan ka geysan doonaan soo celinta la haystayaasha, balse wuxuu intaa ku daray in "waqti dheeri ah loo baahan yahay."

Milatariga Israa'iil ayaa Axaddii ku dhawaaqay inay dib u heleen meydadka saddex la hayste oo lagu dilay Qasa, in ka badan 20 bilood ka dib markii dagaalyahanno ka tirsan Xamaas ay afduubeen.

Dowladda Israa'iil ayaa beenisay warbixin Midowga Yurub uu soo saaray oo sheegaysa inay jebinayso waajibaadkeeda xuquuqda aadanaha ee Qasa iyo Daanta Galbeed, iyadoo warbixinta ku tilmaantay "Fashil damiiri ah oo ku talo gal ah."

Juun 23

Wasaaradda Caafimaadka ee Qasa ayaa sheegtay in 39 Falastiiniyiin ah lagu dilay, 317 kalena la dhaawacay, kadib madaafiic ay Israa'iil ku garaacday Marinka Qasa. Dhanka kale, Gurmadka Rayidka ayaa sheegay in Isniintii ay soo heleen meydadka afar qof oo dhintay.

Dhinaca hawlgallada milatari, Guutada Qassam ayaa sheegtay inay "si dhow ugu toogteen" saddex askari oo Israa'iilin ah bariga Jabaliya, waqooyiga Marinka Qasa. Isla mar ahaantaas, Guutada Al-Quds ayaa sheegtay inay gantaallo la beegsadeen dad isugu yimid agagaarka isbitaalka ciidan ee Abasan, bariga Khaan Yuunis.

Juun 24

Hay'adda Gurmadka Rayidka ee Qasa ayaa Talaadadii sheegtay in ciidamada Israa'iil ay dileen 46 Falastiiniyiin ah oo sugayay gargaar, kuwaas oo ku sugnaa laba goobood oo kala duwan oo ku yaalla bartamaha iyo koonfurta Gaza, waxaana maamula Hay'adda Gargaarka Bani'aadantinimo ee Gaza oo ay taageeraan Israa'iil iyo Maraykanka.

Afhayeenka Gurmadka Rayidka, Mahmoud Basal, ayaa u sheegay wakaaladda AFP in 21 qof lagu dilay, ku dhowaad 150 kalena lagu dhaawacay rasaas Israa'iil ku furtay meel gargaar lagu qeybinayay bartamaha Qasa Talaadadii subax, halka 25 qof oo kale lagu dilay dhacdo kale oo ka dhacday koonfurta Qasa.

Wasaaradda Caafimaadka ee Gaza ayaa sheegtay in 79 Falastiiniyiin ah la dilay, 289 kalena lagu dhaawacay 24-kii saac ee ugu dambeeyay.

Wasaaraddu waxay intaas ku dartay in tirada dadka la dilay tan iyo markii dagaalka dib u billowday 18-kii Maarso ay gaartay 5,759, halka dhaawacyadu ay gaareen 19,807. Tirada guud ee dadka la dilay tan iyo markii dagaalka Qasa qarxay 7-dii Oktoobar waxay gaartay 56,156 qof, halka dhaawacyadu ay kor u dhaafeen 132,239.

Ka dib markii Israa'iil iyo Iiraan ay Talaadadii ku heshiiyeen xabbad-joojin kadib dagaal socday 12 maalmood, Ra'iisul Wasaare Netanyahu ayaa wajahaya baaqyo cusub oo lagu dalbanayo inuu heshiis xabbad-joojin ah la gaadho Xamaas, kadib dagaal socday in ka badan 20 bilood.