Shan arrimood oo laga helay dokumentiyada sirta ee laga soo dusiyey Mareykanka

Tobaneeyo dukumenti oo sir ah oo Mareykanka laga helay ayaa la faafiyey oo hadda ku dhex wareegaya internet-ka. Sawirrada dokumentiyadan ayaa ilaa iyo bishii Febraayo ka soo muuqday barnaamij farriimaha lagu wadaago.

Dokumentiyada sirta oo u badan kuwo militari qaarkood waxaa ku calaamadeysneyd ‘sir aad u weyn’ iyada oo dukumentiyadaasi intooda badan ay faahfaahinayaan dagaalka Ukraine iyo macluumaad ku saabsan Shiinaha iyo xulafada Mareykanka.

Saraakiil ka tirsan Pentagon-ka Mareykanka waxay xaqiijiyeen in dokumentiyadaasi sirta ee la sheegay in internet-ka lagu faafiyey ay sax yhiin.

BBC-da iyo warbaahinnada kale ayaa dib u eegis ku sameeyey qaar ka mid ah dokumentiyadaasi natiijooyinka ugu muhiimsan oo uga soo baxay waxay noqotay sida tan:

Ciidamada Reer-Galbeedka ee ka howlgala Ukraine

Dokumenti ku taariikheysan 23-ka March, waxaa lagu sheegay in tiro yar oo ka mid ah ciidamo gaar ah oo waddamada reer galbeedka ka socda ay ka dagaallamayaan gudaha Ukraine, inkasta oo dukumentigaasi aan lagu sheegin halka ay ciidamadaasi ka dagaallamayaan.

UK ayaa la sheegay iney ka joogaan 50 askari, halka waddamada Lativia ay (17), Franasiiska (15), Mareykanka (14) iyo Netehrland (1) ciidamo ka joogaan.

Dawladaha reer galbeedka ayaa sida caadiga ah ka gaabsada inay ka hadlaan arrimahan xasaasiga ah, balse faahfaahintan ayaa u muuqata mid u marqaati kaceysa Moscow, oo bilihii la soo dhaafay ku doodaysay ineysan dagaal kula jirin Ukraine oo keli ah balse ay ciidamada NATO la dagaallamayaan.

Dokumenti kale ayaa sheegaya in guuto ka mid ah ciidamada Ukraine ay u diyaar garoobeen howlgal ay toddobaadkan billaabayaan. Waxaana lagu faahfaahiyey taangiyada, hubka iyo dabbaabaadka ay ciidamadaasi isticmaalayaan oo ay Ukraine ugu deeqeen xulafada reer galbeedka.

Waxaa kale oo dokumentiyadaasi lagu sheegay in dagaalka Ukraine ay Ruushka uga dhinteen ama uga dhaawacmeen 223,000 oo askari halka Ukraine ay 131,000 askari ay waxyeello dhimasho iyo dhaawac isugu jira soo gaartay.

Masar oo qorsheyneysa inay si qarsoodi ah Ruushka u siiso gantaallo

Wargeyska Washington Post ayaa helay dukumenti kale bartamihii bishii Febraayo, kaasoo ay ku ogaadeen in Masar ay qorsheyneyso inay 40,000 oo gantaallo ah Ruushka si qarsoodi ah ugu dirto.

Wargeyska ayaa sheegay in Madaxweyne Abdul Fatah al-Sisi uu u sheegay mas'uuliyiinta in ay xafidaan sirta ku aaddan wax soo saarka iyo daabulka shixnadaha "si looga fogaado dhibaatooyinka reer galbeedka".

Bishii Jannaayo, wakaaladda wararka ee Reuters ayaa sheegtay in saamiga Ruushka ee soo dejinta qamadiga Masar uu kor u kacay 2022, taasoo bixisay sharraxaad waafi ah.

Washington oo ah dowladda Masar dhinaca amniga ka taageerta, taageeradaasi oo ku kacayso $1 bilyan oo doollar sanadkii, ayaa Qaahira u dirtay digniin ku saabsan taageerada ay qorsheynayaan iney Ruushka siiyaan.

Hase yeeshee, sarkaal ka tirsan dowladda Masar oo aan magaciisa la shaacin oo u warramay mid ka mid ah warbaahinta dalka Masar wuxuu dokumentiga Masar eedeynaya ku tilmaamay ‘Mid been abuur ah’, isaga oo sheegay in Masar ay dagaalka Ukraine dhexdhexaad ka tahay.

Kuuriyada Koonfureed oo ay ka go’an tahay iney hub geyso Ukraine

Dokumenti soo gaaray BBC ayaa tilmaamaya in Kuuriyada Koonfureed ay go’aansatay iney iibiso hub ay Ukraine isticmaasho.

Warbixinta oo ku saleysan xogta sirdoonka, ayaa faahfaahin ka bixisay wadahadal xasaasi ah oo lala yeeshay la taliyayaasha amniga qaranka.

Kuuriyada Koonfureed ayaa ku dhiirratay iney go’aan ka gaarto cadaadiska Mareykanka uga imaanaya ee ah in hub lagu taageero Ukraine iyo siyaasaddooda ku dhisan dal dagaal ku jira inaan la hubeyn.

Xukuumadda Seoul waxay in muddo ah ka caga jiideysay iney Ukraine hubeyso iyada oo ka cabsi qabto iney Ruushka siyaasad ahaan isaga hor yimaaddaan.

Shiinaha oo bishii Febraayo sameeyay tijaabada gantaalaha Hypersonic

Wargeyska Washington Post waxaa kale oo uu ogaaday in Beijing ay 25-kii Febraayo tijaabisay gantaalaha Hypersonic uu noociisu yahay DF-27 oo gawaarida lagu rakibo.

Gantaalkaasi oo 12 daqiiqo ku jaray masaafo dhan 2,100km sida dokumentiga uu wargeysku heay ku cad.

Wargeysku wuxuu intaa ku daray in gantaalka uu Shiinaha tijaabiyey uu awood u leeyahay inuu jiiro hannaan la difaac ah gantaalaha baalistic-ka ee Mareykanka.

Sida oo kale waxaa jirta falanqyen tilmaameysa faahfaahin ku saabsan markab dagaal iyo gantaal cusub oo la riday bishii Maarso kaasoo kor u qaadi doono awoodda militari ee Shiinaha.