"Maanta si qurux badan ayaad u labisan tahay" Ma dharkii Zelensky ayaa dhaliyay dooddii dhex martay isaga iyo Trump?

Waxaa uu ahaa wixii ugu horreeyay ee Madaxweyne Donald Trump yiri markii madaxweynaha Ukraine Volodymyr Zelensky uu kasoo baxay gaarigii uu la socday markii uu yimid Aqalka Cad Jimcihii.

"Maanta si qurux badan ayaad u labisan tahay," ayuu yiri Trump mar uu salaamayay, asagoo ula jeeday funaanaddii madoobeyd ee nooca militariga ahayd ee Zelensky, ee lagu qurxiyay calaamadda gaashaanta ah ee Ukraine.

Zelensky ayaan badanaa xiran suudadka isku joogga ah, shaatiyada galluusyada leh iyo qoorxirka - xataa markii ay jiraan shirar muhiim ah oo uu la leeyahay hoggaamiyeyaasha dunida iyo markii uu khudbad ka jeedinayo Kongareeska Mareykanka – laga soo bilaabo markii sida buuxda uu Ruushku usoo weeraray dalkiisa 2022.

Hoggaamiyaha Ukraine ayaa sheegay in dookhiisa dharka militari uu muujinayo inuu taabacsan yahay askarta dagaalka kala soo horjeeda ciidanka Ruushka ee ku sugan furimaha dagaalka.

Laakiin arrintan waxaa muddo dheer dhibaato ku qabay dadka dhaliila taageerada Mareykanka uu siiyo Ukraine, waxaana ka dib sanado ay noqotay mowduuc ay ka hadleen qaar ka mid ah dhaliilayaasha garabka midig, arrintan ayaana si weyn u soo ifbaxday oo caalamka oo idil dadka dareenkooda soo jiidatay intii lagu jiray kulankii dooda dhaliyay ee Jimcaha ee xafiiska Oval, oo Zelensky uu la yeeshay Trump iyo madaxweyne kuxigeenka Mareykanka, JD Vance.

Su'aal uu weydiiyay wariye reer Mareykan ah Zelensky ayaa ayaa lagu eedeeyay inuu xushmad darro kula kacay kulanka maaddaama uusan soo xiran suud, taas ayaana durba baddashay jawiga qolka, sida laga soo xigtay wariyeyaal ka tirsan BBC oo goob joog ahaa.

Waqti gaaban ka dibna, arrimo intaasi kasii ballaaran oo la xiriira ixtiraam iyo mahadnaq ayaa kiciyay muran qeyru-caadi ah, kaas oo madaxweynaha Mareykanka iyo madaxweyne ku-xigeenka ay ku canaanteen ninkaasi isbahaysiga la leh ee kasoo jeeda Yurub kaamaradaha telefishinada ee caalamka hortooda.

Markii kulanka loo furay su'aalaha wariyayaasha, mid ka mid ah su'aalaha ayaa waxaa weydiiyay Brian Glenn, wariyaha ugu sareeya ee Aqalka Cad uga soo warrama warbaahinta muxaafidka ee Real America's Voice.

"Maxaad usoo xirnan wayday suud?" ayuu weydiiyay Glenn. "Waxaad joogtaa heerka ugu sarreeya ee xafiiska dalka, oo waxaad diiddan tahay inaad xirato suud."

"Ma leedahay suud?" ayuu sii raacay. "Dad badan oo reer Mareykan ah ayaa ka walaacsan inaadan ixtiraamin sharafta xafiiskan."

Su'aalaha weerarka ah ayaa muujiyay waqtiga markii madaxweynaha Ukraine – oo ilaa markaas u muuqday inuu si diblomaasiyadeed, oo xitaa saaxiibtinimo leh, ula wada hadlaayay Trump – uu markii ugu horreysay u muuqday mid daallan oo carooday.

"Anigu waxaan xiran doonaa kostyum ka dib markii dagaalkan uu dhammaado," ayaa Zelensky ku jawaabay. (Ereyga "suud" waxaa lagu turjumi karaa afka Ukraine "kostyum").

Madaxweynaha Ukraine ka dib wuxuu weerar afka ah ku qaaday wariyaha.

"Waxaa laga yaabaa wax la mid ah midkaaga, haa. Waxaa laga yaabaa wax ka wanaagsan, ma aqaan," ayuu yiri, iyadoo qosol uu ka dhacay qolka. "Waxaa laga yaabaa wax ka jaban."

Su'aasha Glenn waxay muujisay cabasho muddo dheer jirtey oo ka dhex taagnayd siyaasadda MAGA ama Ka Dhig Mareykanka Mid Weyn Mar Kale, halkaas oo qaar ka mid ah dadka – sida JD Vance – ay ku doodaan in hoggaamiyaha Ukraine uusan muujin wax mahadnaq ah ama ixtiraam ku filan oo uu u hayo Mareykanka, kadib saddex sano oo taageero milateri ah.

Wariye hore oo ka shaqeyn jiray talefishin maxali ah oo ku yaala Dallas oo si fiican loogu bartay inuu qeyb ka yahay bahda muxaafidiinta shaqadiisa uu ka qabtay kanaal kale oo taageersan Trump oo la yiraahdo Right Side Broadcasting Network darteed, ayaa sheegay in Glenn uu yahay taageere aan gabban oo uu leeyahay Trump. Sanadkii hore, wuxuu u sheegay Politico inuu "si buuxda u taageersan yahay Madaxweyne Trump iyo ajandaha America First ee mudnaanta kowaad siinta Mareykanka."

Sidoo kale, waxaa la sheegay in uu xiriir shukaansi la leeyahay Marjorie Taylor Greene, xildhibaanadda muxaafidka ah ee ka soo jeedda Georgia ee ka tirsan Kongareeska oo ah mid ka mid ah taageerayaasha ugu afka dheer ee Trump.

Glenn ayaa qolka u joogay inuu qeyb ka ahaa wariyeyaasha Aqalka Cad, oo ah koox wariyayaal ah oo kasoo warrama madaxweynaha inta lagu jiro dhacdooyinka rasmiga ah ayadoo kooxdaasi ay matasho warbaahinta guud ee intaasi kasii ballaaran.

Maamulka Trump ayaa todobaadkan la wareegay maamulka kooxdaasi wariyeyaasha ah asagoo kala wareegay ururka saxafiyiinta, isagoo sheegay in ay siin doonaan siyaabo dheeraad ah oo lagu heli karo"codad cusub."

Real America's Voice, oo la aasaasay 2020, waa warbaahin talefishin oo garabka midig taabacsan balse aan aad caan u ahayn, taas oo ka mid ah dhowr kanaal oo taabacsan Trump ah oo soo baxay sanadihii ugu dambeeyay. Martideeda iyo soo jeediyeyaasheedu waxay faafiyeen aragtiyo shaki leh oo ku saabsan mowduucyo kala duwan, oo ay ku jirto doorashadii madaxweynaha ee 2020, kacdoonkii Capitol ee 2021 iyo QAnon.

Barnaamijyada shabakadda waxaa ku jira dadka leh magacyada waaweyn ee siyaasadda Maga qaarkood, oo ay ku jiraan Steve Bannon, la-taliyihii ugu sarreeyay ee hore ee Trump, Ted Nugent oo ahaa heesaa sare oo isu beddelay falanqeeye siyaasadeed, iyo Charlie Kirk, aasaasihii ururka muxaafadka ee Turning Point. BBC ayaa la xiriirtay shabakadda si ay aragti uga hesho.

Ka dib murankii Xafiiska Oval, Glenn ayaa boggiisa internetka ku soo qoray inuu "si aad ah ugu danqado dadka Ukraine," laakiin wuxuu sheegay in xirasho la'aanta suudka ee Zelensky ay muujisay "ixtiraam la'aantiisa gudaha laabtiisa ku jirta" ee uu u hayo Mareykanka.

Difaacyayaasha Zelensky ee onlaynka ayaa soo dhigay sawirro muujinaya Winston Churchill oo xiran dhar caadi ah intii lagu jiray Dagaalkii Labaad ee Adduunka.

Sawirrada xilligaas waxay muujinayaan hoggaamiyaha Britain oo xirnaa dhar u eg shaar iyo surwaal isku dhaggan mar uu kulamo la yeeshay madaxweynaha Mareykanka ee waqtigaas, Franklin Roosevelt, waxaana sidoo kale ku jiray marar uu xirnaa dhar milatari iyo suudad waqtiyo uu la kulmayay hoggaamiyeyaasha caalamka.

Ka dib su'aashii Glenn, shirkii saxaafadda ayaa si degdeg ah ugu socday su'aal ku saabsan in Mareykanku uu sii wadi doono u dirista hubka Ukraine. Dhammaadkii jawaabta, Trump ayaa ku soo laabtay su'aasha suudka.

"Anigu waxaan jeclahay dharkaaga," ayuu asagoo qosolaya ku yiri, oo isaga oo tilmaamaya Zelensky, wuxuu yiri, "waxaan u maleynayaa inuu si qurux badan u labisan yahay."

Iyadoo aan la arkin, dhaqanka Trump wuxuu u muuqday inuu ka yara duwan yahay sidii hore, sida ay wararku sheegayaan. Shabakadda wararka Mareykanka ee Axios ayaa sheegtay in ka hor kulanka, shaqaalaha Aqalka Cad ay codsadeen in Zelensky uu xirto suud, isla markaana ay ka xumaadeen markii uusan xiran.

Si kastaba ha ahaatee, labada hoggaamiye ee caalamka ayaa sii waday inay su'aalaha uga jawaabaan, si guud ahaan xushmad leh ama guud ahaan aan xushmad lahayn, ku dhawaad 20 daqiiqo oo kale ka hor intii aysan dhicin dooda geyru caadiga ahayd, kadib markii uu hadalka soo dhexgalay madaxweyne ku-xigeenka Mareykanka, JD Vance.

Vance ayaa marar badan ka hadlay "ixtiraam" – isagoo Zelensky ugu yeerayay "Mudane Madaxweyne," halka hoggaamiyaha Ukraine uu ugu yeeray "JD" – uuna yiri: "Waxaan u maleynayaa in ay xushmad darro tahay inaad soo gasho Xafiiska Oval oo aad isku daydo inaad arrintan ku kala saarto warbaahinta Mareykanka horteeda hadda."

Dooddu waxay sii xumaanaysey tan iyo markaas. Zelensky oo aan suud xiranayn ayaa durba laga saaray Aqalka Cad, iyadoo xiriirka u dhexeeya labada dal uu gaaray heer hoose oo cusub intii dagaalka Ukraine uu socday oo dhan markii loo eego.