Maxay Suuriya uga aamusan tahay xadgudubka lagu hayo hawadeeda?

Warbaahinta Suuriya iyo tan Carabta ayaa xustay aamusnaanta dowladda cusub ee dalkaas ee ku aaddan dagaalka Israa'iil iyo Iiraan iyo isticmaalka hawada Suuriya ee dagaalkan xudduudaha la isaga tallaabayo.

Isticmaalka hawada Suuriya ee Israa'iil iyo Iran si ay isu weeraraan iyo waxyeelada ay u gaysanayaan muwaadiniinta dalkaas iyo hantidooda ayaa waxaa ka aamusan xukuumadda cusub ee Suuriya.

Warbaahinta gudaha iyo tan Carabta ayaa ka faallootay falcelin la'aantan, halka dadka wax falanqeeya ay sheegayaan in Suuriya ay doonayso inay dhexdhexaad ka noqoto oo ay labada dhinacba u aragto cadowgeeda.

Sarkaal Suuriyaan ah ayaa diiday fikradda ah in Axmed Al-Sharaa uu u oggolaaday Israa'iil in ay hawada Suuriya isticmaasho si ay ula socoto gantaallada Iiraan.

Saraakiisha dowladda Suuriya ayaan weli ka hadlin kororka khasaaraha ka dhashay diyaaradaha aan duuliyaha lahayn iyo gantaallada la is waydaarsanayo, kuwaasoo uu ku dhintay hal qof oo rayid ah.

Mareeg Suuriyaan ah oo lagu magacaabo Enab Baladi ayaa daabacday maqaal 15-kii Juneay kaga hadleen aamusnaanta Suuriya ee dagaalka, xitaa markii diyaaradaha Israel iyo gantaalaha Iran ay soo galeen hawadeeda.

Falanqeeye ayaa u sheegay majaladdan in maamulka Suuriya ay go'aansadeen in ay dhexdhexaad ka noqdaan oo ay Israa'iil iyo Iiraanba u arkaan cadowgooda.

Falanqeeyaha ayaa yiri: "Labada dhinacba saaxiib lama aha dadka Suuriya, waxayna labaduba kaalin wax ku ool ah ku leeyihiin xasilloonida darrada Suuriya."

Iran waxa ay taageero muhiim ah u ahayd Bashaar Al-Asad, Israa'iil ayaa iyana boqolaal duqeymo ah ka geysatay Suuriya, waxayna ciidamadeeda milateriga geysay aagga difaaca tan iyo bishii December, markaasoo madaxweynihii hore uu dhacay.

Falanqeeyaha ayaa sheegay in dowladdu aysan u badneyn inay ka jawaabto arrintan haddii aanu si toos ah u beegsan mid ka mid ah dhinacyada.

Wuxuu sheegay in dowladdu ay hadda ku mashquulsan tahay sidii ay xasilooni ugu heli lahayd dalka iyo xoojinta xiriirka ay la leedahay Turkiga iyo dalalka Khaliijka.

Warbaahinta Carabta ee Middle East Eye ayaa sheegtay in Madaxweynaha Turkiga Recep Tayyip Erdogan uu Axmed Shareeco kula taliyay inuusan ku lug yeelan colaadahaas.

Xadgudubyada Hawada

Warbaahinta dowladda Suuriya ayaa baahisay warbixinno ku saabsan xadgudubyada soo noqnoqday oo Israa'iil iyo Iiraan ay ku hayaan hawada dalkaas, iyadoo sheegtay in diyaaradaha aan duuliyaha lahayn iyo gantaallo ay ku dhaceen deegaanno badan oo Suuriya ka tirsan.

Wakaalada wararka ee SANA ayaa sheegtay in diyaarad nooca aan duuliyaha lahayn ay ku dhufatay guri ku yaala magaalada Tartus, waxaana wax yar kadib la xaqiijiyay in qof dumar ah ay u geeriyootay dhaawac soo gaaray.

SANA ayaa sidoo kale sheegtay in diyaaradaha aan duuliyaha lahayn ay ku soo dhaceen guryo ku yaala magaalada Daraca, halka gantaal uu ku dhacay baadiyaha Dimishiq ee u dhow caasimadda, taasoo keentay in god weyn uu dhulka ka qodo.

Aamusnaanta maamulka Suuriya ee xadgudubyadan hawada ayaa soo jiidatay indhaha warbaahinta gudaha iyo kuwa Carabta. Waxay uga digayaan shacabka inaysan u dhawaan qashinka hubka soo dhacay.

Si kastaba ha ahaatee, ilo ka tirsan dowladda ayaa beeniyay sheegashada wargeyska Al-Watan ee ah in Axmed Shariicah uu u ogolaaday Israa'iil inay isticmaasho hawada dalkaas si ay ula socoto gantaalada Iran.

TV-ga Syria oo ah Shabakad Talefishin oo fadhigeedu yahay dalka Turkiga ayaa waxa uu wareeysi la yeeshay falanqeeye sheegay in Syria ay tahay in ay Qaramada Midoobay u soo bandhigto arintaan oo ay la shaqeyso saaxiibadeeda caalamiga ah si looga hortago xadgudubyada ka dhanka ah hawadeeda.

Warbaahinta ayaa sheegtay in dagaalku uu hakiyay duullimaadyadii tagi jiray iyo kuwii ka imaanayay Suuriya iyo gargaarkii la gaarsiin lahaa malaayiin qof oo u baahan.

Warbaahinta Carabta ee Al-Qudus Al-Carabi ayaa sheegtay inay sii kordhayaan walaaca laga qabo in dagaalku uu sii wiiqo dhaqaalaha jilicsan ee Suuriya, iyadoo sheegtay in qiimaha lacagta Suuriya uu hoos u dhacay boqolkiiba toban.