Halkee ayay iskala qaadeen Israa'iil iyo Xoghayaha Guud ee Qaramada Midoobay?

Xoghayaha Guud ee Qaramada Midoobay, António Guterres, ayaa laga mamnuucay inuu soo galo Israa’iil sababo la xidhiidha qaabkii uu uga hadlay duqeyntii gantaallada riddada dheer ee Iiraan.

Bayaan uu soo saaray, Wasiirka Arrimaha Dibadda ee Israa’iil, Israel Katz, ayaa ku tilmaamay Guterres inuu yahay "Xoghayaha Guud ee Qaramada Midoobay, mid ka soo horjeeda Israa’iil oo taageera argagixisada."

Qoraal uu soo dhigay barta bulshada ee X, oo hore loogu yaqaannay Twitter, kadib markii Iiraan ay ku soo ridday ilaa 180 gantaal Israa’iil, Guterres waxa uu sheegay inuu cambaareynayo "ballaadhinta khilaafka Bariga Dhexe iyo kororka isku dhacyada" wuxuuna ku baaqay in arrimahaasi "ay joogsamaan".

Wuxuu sheegay in gobolka uu si "buuxda" ugu baahan yahay xabad joojin, hase yeeshee kama uusan hadlin weerarka Iiraan si gaar ah.

Bayaan uu soo saaray Arbacadii, Wasiirka Arrimaha Dibadda ee Israa’iil, Katz, ayaa ku dhawaaqay in Xoghayaha Guud ee Qaramada Midoobay uu yahay(shakhsi aan halkan laga rabin, isaga oo sheegay in qofkii "aan si cad u cambaareyn karin weerarka foosha xun ee Iiraan ku qaaday Israa’iil uusan mudneyn inuu cagta saaro dhulka Israa’iil."

Katz waxa uu si gaar ah u dhaleeceeyay Guterres, isagoo ku eedeeyay "siyaasaddiisa ka soo horjeedda Israa’iil tan iyo bilowgii dagaalka.”

Weerarka Talaadadii ee Iiraan ayaa ahaa kii ugu dambeeyay ee weerarro taxane ah oo soo bilowday ku dhawaad sanad ka hor markii Hamas ay weerarro ku qaaday Israa’iil, waxaana dhowaan dagaalladaasi sii xoogeysteen, markii dagaalka Xisbullaah oo ay taageerto Iiraan iyo Israa’iil uu sii baahay.

Israa’iil waxay duullaan milateri ka fulisay Gaza si ay uga jawaabto weerarkii kediska ahaa ee 7-diiOktoobar, koonfurta Israa’iil ay ku qaadeen kooxaha hubeysan ee Hamas, kaas oo lagu dilay ku dhawaad 1,200 oo qof, 251 kalena lagu afduubtay.

Tan iyo weerarkaasi, ololaha milateri ee Israa’iil ka waddo Gaza ayaa, sida laga soo xigtay wasaaradda caafimaadka ee ay maamusho Hamas, sababay dhimashada 41,689 qof.

Intii uu socday isku dhaca, waxaa jiray isku dhacyo dhowr ah oo kale oo u dhexeeyay Israa’iil iyo Qaramada Midoobay oo ku saabsan xaaladda Gaza iyo Daanta Galbeed.

Waxaa sidoo kale jiray khilaaf u dhexeeya Israa’iil iyo Qaramada Midoobay oo ku saabsan doorka hay'adda Qaramada Midoobay ee qaxootiga Falastiiniyiinta, UNRWA.

Bishii Janaayo, Israa’iil ayaa ku eedeysay qaar ka mid ah shaqaalaha hay’addaas in ay ku lug lahaayeen weerarradii 7-dii Oktoobar.

Iyada oo ka jawaabeysa eedeymahaas, hay’adda UNRWA ayaa billowday baadhitaan— waxaana markii danbe dhowr ka mid ah dalalka caalamka ee maalgeliyaa ay hakiyeen taageeradii ay siinayeen hay’addaas, ka hor inta aysan dib u soo celin.

Bishii Agoosto, sagaal shaqaale ah ayaa shaqada laga eryay ka dib markii lagu tuhmay inay ku lug lahaayeen weerarradii 7-dii Oktoobar.

Intii uu socday dagaalka, UNRWA ayaa cambaareysay Israa’iil iyo duqeymaha cirka ee Gaza oo lagu dilay shaqaalaheeda.