Ardayda Afrikaanka ee Lubnaan: 'Welwel ayaan ku joognaa jaamacadda'

Farai waa 27 jir ka soo jeeda dalka Zimbabwe, jaamacad ku taal Beirut ayuu dhiganayay. Miiskii uu buugaagta saaran jiray hadda waxaa u saaran baasaboorkiisa, lacag iyo waraaqihii uu ku safri lahaa.

“Hadii ay dhacdo in aan degdeg ku safro, waxaan sameystay qorshe”, ayuu yiri Farai oo aan magaciisa beddelnay si aan loo aqoonsan.

Bishii September ayuu ku soo laabtay Lubnaan si uu dhameeyo sanadkii ugu dambeeyay darajada labaad jamacadda ee cilimiga makaanikaal injineering.

Magaalada Harare ayuu fasax ku tagay, wuxuuna rajeynayay soo laabashadiisa in dagaalka istaago. Balse ilaa dagaalka Gaza markii uu bilowday si joogta ah ayey Israel iyo Xisbullah isu weerarayeen.

Lubnaan waxay la kulantay dagaalkii ugu dhimashada badnaa ku dhawaad 20 sano. Sida laga soo xigtay Qaramada Midoobay ku dhawaad 120,000 ayaa dagaalka ku barakacay.

Milteriga Israel waxay sheegeen in weeraro cusub ay ku qaadeen koonfurta Lubnaan iyo gobolka Beqaa kaas oo ujeedkiisu yahay in la burburiyo kaabayaasha Xisbullah.

Xisbullah waxay sheegtay in ay garab taagan yihiin Falastiin halka Israel-na ay ku doodeyso in ay dooneyso in ka caawiso shacabkeeda in ay guryahooda ku soo laabtaan.

Mareykanka, UK, Australia, France, Canada iyo India ayaa kula taliyay dadkooda in ay ka baxaan Lubnaan sida ugu dhaqsiyaha badan.

Ardayda Afrikaanka waxay BBC-da u sheegeen in ay hadda wajahayaan xaalad adag oo ah in ay sii joogaan Lubnaan oo duqeynta Israel ku socoto ama in ay qaaradda ku laabtaan.

Arday gaareysa ilaa 90 oo ka soo jeeda Afrika ayaa magaalada Beirut ku jooga barnaamij deeq waxbarasho.

Waqtiga ugu badan Farai waxaa uu ku qaadan jiray waxbarasho iyo in uu saaxiibadii waqti la qaato balse hadda waxa kaliya uu guriga kaga baxo waa marka uu soo gadanayo waxyaabaha aasaasiga ah. Dhawaan ayuu guriga keensaday cuntooyinka muhiimka ah sida rootiga, baastada iyo biyaha.

Inta badan casharada waxaa laga dhigay internetka. Marka uu tago xarunta jaamacadda xaaladda waa mid xanuun badan.

"Qofkasta waa uu naxsan yahay. Xitaa habkii aan ku xiriiri jirnay ma ahan sidii hore” ayuu yiri Farai.

Barnaamijka deeqda waxbarasho ee ardayda Afrikaanka ee Jaamacadda Mareykanka ee Bejrut waxaa uu siiyaa ardayda caalamiga fursad in ay dalkooda ku laabtaan kaddibna ay internetka casharada ku qaadanayaan. Ardayda qaar ayaa sheegay in aysan taas suuragal aheyn.

Sharon Atyang waa 27 jir ka soo jeeda Uganda, waxay hadda jaamacadda ka dhigataa shahaadada master-ka ee cilmbiga horumarinta bulshada. Waxay noo sheegtay in internetka iyo korontada ay dhibaato ka jirto taasna ay tahay caqabad.

Adele oo aan magaciisa beddelnay si aan loo aqoonsan waxa ay ka soo jeeda dalka Cameron. Waxay noo sheegtay in aysan waxbarashada ku dhameysan Karin dalkeeda.

“Dalkeyga kuma sameyn karo tababarada caafimaad, waana qeyb ka mid ah waxbarashadeydada jaamacadda” ayey tiri Adele.

Qalabkiisa wuu xirxirtay. hadi lasoo weeraro Beurit waa diyaar. “Waxwalba waa ii diyaar hadii ay noqoto in aan hadda baxo”

Arday badan oo Afrikan ah ayaa deeqdan waxbarasho wax ku barta. Ururka MasterCard waxay sheegeen in ay si joogto ah ula socdaan ardayda.

Afhayeen u hadlay jaamacadda waxa uu sheegay in ay ardayda la xiriiraan oo ay siiyaan taageerada ay u baahan yihiin

Sharon waxay sheegtay in qolkeeda Beirut ay ka maqleyso dhawaqa iyo guuxa diyaaradaha dagaalka Israel ee dulmaraya magaalada.

“Anigoo ku jira qol ay ka socotay muxaadaro ayaan maqlay albaab jabay, waan orday, laakiin ma jirin meel aan galo. Kaddib musqusha ayaan ku dhuuntay” ayey tiri Sharon.

Waxay kaloo sheegtay in arday badan ay weydiisteen macalimiintooda in waqti loogu daro xilliga ay dhameyn lahaayeen qoraaladii laga sugayay.

Qaar ka mid ah dowladaha Afrika ayaa bilaabay in ay dadkooda soo qaadaan. Dowladda Kenya way soo qaaday dadkeeda. Dad lagu qiyaasay 26,000 oo u dhashay Kenya ayaa ku sugan Lubnaan.

Bishii la soo dhaafay afhayeen u hadlay wasaaradda arrimaha dibadda Itoobiya, Nebiyu Tedla, ayaa BBC u sheegay in ay si dhow ula socdaan xaaladda ayna diyaarinayaan qorshooyin dadka lagu soo qaadayo. Wuxuu kaloo sheegay in 150,000 oo u dhashay Itoobiya ay joogaan Lubnaan, intooda badan waa jaariyado.