Suurtagal ma tahay in Shiinuhu uu weeraro dalkaan ay Somaliland xiriirka leeyihiin?

Waxa ay ahayd subax kale oo Jimco ah, jasiiradda Taiwan ee Kinmen, oo dhawr kiilo mitir u jirta xeebta Shiinaha, markii seedhiga uu yeedhay.

Dad ku sugnaa xafiiska dawladda hoose oo halkaasi ku yaalla, ayaa dad badan waxa ay damiyeen nalka iyo iyaga oo ku dhuuntaymiisaska hoostooda. Kuwo kalena waxay u carareen meel baabuurta la dhigto oo dhulka hoostiisa ah. Cisbitaal u dhow aaggaasi, shaqaaluhu waxay u yaaceen si ay u caawiyaaan dad ay dhaawacyo soo gaadheen.

Laakiin dhiiggu wuxuu ahaa mid been abuur ah, dhaawacyaduna waxay ahaayeen kuwo ay jilayaal matalayaan. Shaqaalaha dawladda ayaa ka qayb qaadanaya dhoollatusyada millatari oo qasab ah oo la xidhiidha difaaca madaniga ah oo lagu qabtay guud ahaan Taiwan, bishii hore.

Ujeedada ayaa u muuqata jawaab celin ay ka bixinayaan weerarka suurtagalka ah ee Shiinaha.

Shiinaha ayaa in muddo ah wacad ku marayay in uu "dib ula midoobi doono" Taiwan oo hadda iskeed isku maamusha, isaga oo aan meesha ka saarin in awood loo adeegsan karo. Waa khatar sii kordhaysa oo ay Taiwan u aragto mid halis ah. Madaxweyne William Lai, oo xilka la wareegay sannadkii hore, ayaa qayb ka noqday mid ka mid ah dadaalladii ugu xoogganaa ee sannadihii la soo dhaafay la qabtay oo looga go lahaa in lagu xoojiyo difaaca.

Mid ka mid ah caqabadaha ugu waaweyn, waa inuu dadkiisa ka dhaadhiciyo arrintan. Inkasta oo isku daygiiska ku aaddan difaaca dalku uu khasbay in uu taageero dadweyne helo, haddana arrintani waxay dhalisay muran xooggan.

"Waxaan u baahan nahay layligan difaaca ah. Waxaan aamminsan nahay in ay jirto khatar ka imanaysa Shiinaha," ayuu yidhi Ben, oo ah khabiir dhinaca maaliyadda ah oo ka shaqeeya Taipei. "Laakin fursadaha duulaanka Shiinaha waa mid hooseeya, haddii ay dhab ahaantii rabeen inay na soo weeraraan, mar hore ayay sidaas yeeli lahaayeen."

Si la mid ah Ben, dadka intooda badan ee Taiwan - 65% marka loo eego xog-ururrin lagu sameeyay oo uu baahiyay bishii March, Machadka Difaaca Qaranka iyo Cilmi-baadhista Istiraatijiyadeed (INDSR) ee xidhiidhka la leh militariga - waxay aamminsan yihiin in anaay u badneyn in Shiinaha uu weeraro dalkaasi, shanta sano ee soo socota.

Arrintani waxa ay imanaysaa, iyada oo uu Maraykanku ka digay in Taiwan uu ku soo fool leedahay oo khatartu ay tahay "mid soo dhawaatay" islamrkaana Beijing ay diyaar u tahay in ciidankeeda ay awood u leeyiiin in ay soo weeraraan marka la gaadho sannadka 2027-ka.

Diyaar-garowga ciidanka millateriga Taiwan

Lai iyo dawladdiisu waxay inta badan ku celceliyaan odhaah gaar ah si ay u sharaxaan waxa ay iyagu dmaacsan yihiin: "Annaga oo u diyaargarownay dagaal, waxaan ka fogaaneynaa dagaal." Waxay ku nuuxnuuxsadeen in aanay raadinayn khilaaf balse ay isticmaalayaan xaqa ay Taiwan u leedahay in ay dhisto difaaceeda.

Sidoo kale markii ay bilaabeen dib-u-habayn millitari oo ciidanka ay ku sameeyeen, waxay sidoo kale rabaan inay kordhiyaan kharashaadka difaaca 23% sannadka soo socda, iyada oo la gaadhsiinayo NT$949.5bn (£23bn; $31bn), taasi oo ka badan 3% wax-soo-saarka gudaha. Arrintani waxay imanaysaa iyada oo ay cadaadis kala kulmayso Mareykanka oo maalgeliya difaaceeda. Lai wuxuu ballan qaaday in uu kordhin doono 5% marka la gaadho2030ka.

Layli ciidan oo loogu diyaar-garoobayo dagaal

Mid ka mid ah layliyadii abid ugu weynaa, oo la yidhaahdo Leyliska Ciidanka ee Magaalada gudaheeda, ayaa la qabtay bishii hore.

Dhowr maalmood gudahood, magaalo kasta oo weyn oo ku taal Taiwan ayaa isu beddeshay in ay martgeliso dhoolatus ciidan. Dadka degan degmooyinka loo waxay ku qasbanaadeen in aanay guryaha ka soo bixin, halka hoteellada, dukaammada iyo maqaayadahu ay hakad geliyeen ganacsiga. Rakaabku ma fuuli karaan kama na degi karaan tareennada iyo diyaaradaha. Qof kasta oo lagu qabto in uu sharciga baal-maray wuxuu halis ugu jiraa in la ganaaxo

Badhtamaha magaalada Taipei, kooxaha gurmadka iyo mutadawiciinta ayaa ku sameeyay daad gureynta dadka dhaawaca ah, daminta dabka, iyo in ay ku hoos dhuuntaan dhismayaal aad mooddo in lagu garaacay gantaallo. Kooxaha caafimaadka ayaa kala saaray dadkii u muuqda in la soo badbaadiyay, iyaga oo bilaabay in nabarrada ay daaweeyaan.

Qaar ka mid ah dadka reer Taiwan ayaa oggolaaday in ay hadlaan. "Waxay ila tahay in ay wax wanaagsan tahay, sababtoo ah waxaan rumaysan nahay in khatartu sii kordhayso," ayuu yidhi Stanley Wei oo ka tirsan shaqaalaha dawladda hoose.

"Bal u fiirsada sida Shiinuhu noogu hareeraynayo," ayuu yidhi, isaga oo tilmaamaya sida Shiinuhu uu u samaynayo dhoolla-tusyo uu ku hareeraynayo Taiwan, isaga oo adeegsanaya maraakiib dagaal.

"Waxaan aamminsan nahay nabad kuwada noolaanshaha Shiinaha iyo Taiwan, laakiin waxaan u baahan nahay in aan sidoo kale kordhinno difaaceenna," ayuu yidhi Ray Yang, oo ka shaqeeya IT-ga. "Kahor dagaalkii Ukraine, aad uma danaynayn [rajada laga qabo weerar ka yimaadda Shiinaha] Laakiin kaddib markii duullaankii Ukraine dhacay, waxaan bilaabay in aan rumaysto in tani ay dhici karto."

Dood ku taagan in Shiinuhu ku duuli doono Taiwan iyo in kale

In Shiinuhu uu duullaan ku qaado Taiwan iyo in kale waxay ahayd dood ka taagan Taiwan muddo dheer. Laakiin in la is weyddiiyo su'aashan ayaa soo badatay markii dhawaanahan ay sii kordhay xiisadaha dagaalka, gaar ahaan doorashadii William Lai ee sannadkii hore.

Lai, oo ku adkeysanaya in Taiwan aanay waligeed ka mid noqon Shiinaha iyo xisbigiisa Democratic Progressive Party (DPP) ayaa dawladda Shiinaha ay dhalleecaysaa "gooni-u-goosad".

Beijing ayaa ku eedaysay xukuumadda Lai in ay si ula kac ah uga soo horjeedaan iyaga, gaar ahaan marka ay timaaddo dhanka difaaca.

Madaxbannaani kasta oo rasmi ah oo ay Taiwan ku dhawaaqdo waxa ay sare u qaadi kartaa tallaabo millatari oo ka timaada Shiinaha, oo isugu ku doodayo in tallaabo millateri uu adeegsan doono si looga hortago "Gooni-u-gooshada" Taiwan. Lai waxa uu ku adkaysanayaa in Taiwan ay mar horeba tahay qaran madax-bannaan, sidaa awgeedna aan loo baahnayn in si rasmi ah loogu dhawaaqo madaxbannaani.