Maxay tahay hadal-heynta ku saabsan wejiga atoore ka tirsan jilayaasha ugu caansan Hollywood-ka?

Wakiilka atoore Bruce Willis ayaa beeniyay wararka sheegaya in xiddiga filimaanta uu iibiyey xuquuqdii wajigiisa.

Todobaadki hore waxaa si weyn loo hadal hayay in Willis uu heshiiskii ugu horeeyay ee noociisa ah oo uu wajigiisa ka iibiyay shirkad lagu magacaabo Deepcake oo sameysa waiyada been abuurka ah.

Si kastaba ha ahaatee, afhayeen u hadlay jilaaga ayaa BBC-da u sheegay in uusan wax iskaashi ah ama heshiis ah la lahayn shirkaddasi.

Dhanka kale wakiilka shirkadda Deepcake ayaa sheegay in jilaa Willis uu weli leeyahay xuquuqda wejigiisa.

Willis ayaa bishii Maarso ku dhawaaqay inuu ka fadhiistay jilista filimada ka dib markii laga helay xanuunka aphasia, oo ah xanuun saameeya hadalka.

Shirkadda Deepfakes waxay isticmaashaa sirdoonka macmalka ah iyo tignoolajiyada barashada mashiinka si ay u abuuraan muuqaalo dhab ah oo inta badan loo adeegsado dadka caanka ah ama siyaasiyiinta.

Jilayaasha aan hadda ka qeyb qaadan jilista filimada, tignoolajiyadaas waxay awood u leedahay inay weli la sii isticmaali karo wajiyadooda iyadoo uu qof kale jilayo filimka.

27-kii Sebtembar, wargeyska Daily Mail ayaa sheegay in heshiis uu dhexmaray jilaa Willis iyo shirkadda Deepcake.

"Bruce Willis oo laba jeer ku guulaystay abaalmafrinta Emmy ayaa wali ka soo muuqan kara filimada ka dib markii uu xuquuqd wajigiisa ka iibiyay  shirkadda Deepcake," ayaa lagu daabacay wargeyska

Sheekada waxaa hadana soo qaatay Telegraph iyo dhowr warbaahin oo kale.

"Bruce Willis waxa uu noqday xiddigii ugu horeeyay ee Hollywood ka tirsan ee iibiya xuquuqdiisa si uu u ogolaado in wajigiisa loogu isticmaalo shaashadaha." Ayay qortay Telegraph. Laakiin taasi uma muuqato.

Maxaa ka run ah in waji macmal ah oo uu leeyahay Bruce Willis sannadkii hore loo isticmaalay in lagu abuuro xayeysiis loogu talagalay Megafon, oo ah shirkad isgaarsiineed oo Ruushka laga leeyahay.

Farsamada loo isticmaalay xayaysiisyada waxaa sameeyay shirkadda Deepcake, taasoo nafteeda ku sifaysa shirkad ku takhasustay sameynta waxyaabaha macmalka ah ama wajiyada been abuurka ah.

Shirkadda Deepcake ayaa BBC-da u sheegtay inay si dhow kooxda Willis ugala shaqeysay xayeysiinta.

"Waxa uu xaqiiqdii sameeyay ayaa ah in uu na siiyay ogolaanshahiisa (iyo macluumaad badan) si aan u samayno mataankiisa oo dhanka dhijitaal ka ah," ayay yiraahdeen.

Shirkaddu waxay sheegtay in ay leedahay maktabad gaar ah oo ay ku jiraan dad caan ah, soo-saarayaal iyo shakhsiyaad taariikhda galay.

Si kastaba ha ahaatee, wakiilka Willis ayaa sidan u sheegay BBC, "Fadlan ogow in Bruce uusan wax iskaashi ama heshiis ah la lahayn shirkaddan Deepcake."

BBC-da ayaa waydiisay wakiilka Bruce Willis in wax uun wada shaqeyn ah ay dhexmartay shirkadda Deepcake iyo isaga balse BBC-da ayaanan weli wax jawaab ah helin wakiillka.

Warbixin ay soo saartay shirkadda Deepcake ayay ku sheegtay in wararka sheegaya in ay iibsatay xuquuqda wejiga Bruce Willis ay tahay mid aan sax ahayn.

"Wararka ku saabsan xuquuqda Bruce waa khalad… Bruce qofna kama uusan iibin wax xuquuq ah, isagaa ayaa iska leh, "wakiil ka tirsan shirkadda ayaa sidaasi yiri.

Jahwareerka ayaa muujinaya sida ay tignoolajiyadani u cusub tahay – iyadoo aysan jirin sharciyo cad oo ku xeeran.

Isticmaalka sirdoonka macmalka ah ayaa wuxuu u muuqdaa inuu yahay isbeddel sii kordhaya. Jilaaga Darth Vader James Earl Jones ayaa dhawaan ka fariistay jilniinka, balse codkiisa ayaa weli la isticmaamlaa.

Respeecher, oo ah shirkad kale oo isticmaasha sirdoonka macmalka ah, ayaa lagu soo waramayaa inay adeegsatay agab kayd ah si ay ugu celceliso codadka Vader.

Dadka qaar ayaa waxay ka walaacsan yihiin been-abuurka qotada dheer ee adeegsiga sirdoonka macmalka ah iyagoo ka cabsi qaba inay la wareegto shaqada jilayaasha. Waxaa sidoo kale jira walaac laga qabo in jilayaashu ay lumin karaan xakameynta wejiyadooda iyo codadkooda.