Waa kee ninka ay Trump saaxibka yihiin ee ciidanka madaxa banaan gaynaya Haiti si ay ula dagaallamaan burcadda

Taageeraha weyn ee Donald Trump iyo madaxa shirkadda amniga gaarka ah ee lagu magacaabo Erik Prince, ayaa sheegay inuu heshiis 10 sano ah la galay Haiti si uu ula dagaallamo budhcadda dalkaas, kadibna uu door ka qaato dib u habeynta nidaamka ururinta canshuuraha dalkaas.

Wareysi uu siiyay Reuters, ayaa Prince oo hore u maamuli jiray shirkadda Black water, wuxuu sheegay in shirkaddiisa, Vectus Global, ay ka qeyb qaadan doonto naqshadeynta iyo hirgelinta barnaamij lagu canshuuro badeecadaha laga keeno xadka Haiti ay la wadaagto Jamhuuriyadda Dominica, marka xaaladda amni ay degganaato.

Wuxuu sheegay inuu filayo inuu budhcadda kala wareego waddooyinka waaweyn iyo dhulka ay haystaan muddo ku dhow hal sano gudaheed. "Cabir muhiim ah oo guusha ii muujinaya wuxuu noqonayaa marka aad ka kaxaysan karto baabuur caadi ah magaalada Port-au-Prince ilaa Cap Haitian adigoo aan joogsan ama aysan ku istaajin budhcaddu," ayuu Prince ku yiri wareysiga.

Prince kama uusan hadlin inta ay dowladda Haiti bixin doonto kharashka shirkadda Vectus Global, sidoo kalena ma sheegin inta canshuur ah ee uu filayo in laga aruuriyo Haiti.

Madaxweynaha cusub ee golaha kumeel-gaarka ah, Laurent Saint-Cyr, oo la dhaariyay Agoosto 7-tii qeybna ka ah wareejinta qorsheysan ee hoggaanka golaha, kama uusan jawaabin codsiyada faallo. Madaxweynihii hore ee golaha iyo ra'iisul wasaaraha Haiti sidoo kale kama aysan jawaabin codsiyada in ay wax ka dhahaan arrinkaan.

Kaalin is balaadhineed

Tan iyo markii Trump dib ugu soo laabtay Aqalka Cad, Prince wuxuu talooyin siinaayay dalka Ecuador oo ku saabsan sida loola dagaallamo budhcadda, wuxuuna heshiis la galay Jamhuuriyadda Dimuqraadiga ah ee Congo si uu uga caawiyo sugidda ammaanka iyo canshuurta kheyraadka macdanta dalkaas.

"Way adag tahay in la qiyaaso inay si xor ah u shaqeynayaan iyaga oo aan oggolaansho ka haysan maamulka Trump," ayuu yidhi Romain Le Cour Grandmaison, oo ah madaxa barnaamijka Haiti ee hay'adda Global Initiative Against Transnational Organized Crime, oo fadhigeedu yahay Geneva.

Markii wax laga weydiiyay sheegashada Le Cour Grandmaison, afhayeen u hadlay Wasaaradda Arrimaha Dibadda ee Mareykanka ayaa sheegay in aysan u shaqaaleynin Prince ama shirkaddiisa wax shaqo ah oo la xiriirta Haiti.

Sarkaal sare oo ka tirsan Aqalka Cad ayaa isna yidhi: "Dowladda Mareykanka wax xidhiidh ah lama laha shirkadda milatari ee gaarka ah ee ay dowladda Haiti qandaraaska la gashay. Ma maalgelinayno qandaraaskan mana ku lihin wax kormeer ah."

Lama caddeyn in heshiiska Prince uu saameyn ku yeelan doono isbeddelkii hoggaanka Haiti ee dhacay horraantii bishaan.

Khudbaddii Telefishinka ee Agoosto

Khudbad uu jeediyay 7-dii Agoosto oo laga baahiyay telefishinka, madaxweynaha cusub ee golaha kumeel-gaadhka ah, Saint-Cyr, ayaa sheegay inuu soo dhoweynayo taageero dheeraad ah oo caalami ah si loola dagaallamo budhcadda. Wuxuu yidhi: "Waxaan martiqaad u dirayaa dhammaan saaxiibada caalamiga ah inay kordhiyaan taageeradooda, ciidamo dheeraad ahna soo diraan, tababarro badan bixiyaan. Naga caawiya ciidan caalami ah oo awood leh."

Xaaladda Xun ee Haiti

Dhibaatada Haiti ka taagan waxay kasii dartay sannadihii u dambeeyay, iyadoo kooxo hubeysan ay dhul badan qabsadeen weerareenna isbitaallo, saldhigyo booliis iyo xabsiyo. Waxay la wareegeen wadiiqooyin istaraatiiji ah oo ganacsiga muhiimka u ah, waxayna shacabka ka qaadaan lacag baad ah. Hay'adaha xuquuqda aadanaha ayaa ku eedeeyay budhcadda inay fuliyaan xasuuqyo, kufsi, afduub iyo gubid hantiyeed. Qiyaastii kala badh shacabka Haiti ayaa la ildaran cunto yari, halka in ka badan 8,000 oo qof oo ku jira xeryaha barakacayaasha ay wajahayaan gaajo heer macaluul ah.

Canshuuraha iyo Ganacsiga

Haiti waxay horey kala bar dakhligeeda canshuuraha uga aruurin jirtay xadka ay la wadaagto Jamhuuriyadda Dominika. Laakiin budhcadda oo la wareegtay waddooyinka muhiimka ah ayaa curyaamisay ganacsigii, waxayna jareen dakhliga dowladda. Warbixin sanadkii hore ay diyaariyeen dowladda Haiti iyo hay'ado caalami ah ayaa sidaas lagu sheegay. Warbixintu waxay sheegtay in tani ay si weyn u wiiqday awooddii dowladda ee wax ka qabashada dhibaatada ama bixinta adeegyadii aasaasiga ahaa.

Sida laga soo xigtay xogaha kastamyada, Jamhuuriyadda Dominika waa isha ugu weyn ee Haiti ka hesho cuntooyinka muhiimka ah sida badarka, burka, caanaha, biyaha iyo raashiinka kale ee daruuriga ah. Waxyaabaha kale ee Haiti ka soo dejiso Dominika waxaa ka mid ah dharka, alaabta la isticmaalo maalin kasta iyo agabka caafimaadka.

Caqabadaha Shirkadaha Ammaanka

Shirkadaha amniga ee ka shaqeynaya Haiti waxay la kulmaan caqabado culus, maadaama ay jiraan xidhiidho hoose oo u dhexeeya budhcadda, booliiska maxalliga ah, iyo qaar ka mid ah garabyada dowladda. Horraantii sanadkan, koox ka tirsan shirkadda Mareykanka ee Studebaker Defense ayaa joojisay howlgalkoodii Haiti kadib markii laba xubnood laga afduubtay taasoo la rumeysan yahay inay sabab u ahayd mas'uuliyiin booliis ah oo musuqmaasuq ku lug leh, sida uu sheegay New York Times.

Mounir Mahmalat, oo ah isku-duwaha dalalka ee hay'adda Bangiga Adduunka u qaabilsan kooxda ka shaqeysa nuglaanta, colaadda iyo rabshadaha, ayaa sheegay in ay tahay "ku dhowaad mid aan suurtagal ahayn" in si nabad ah loogu raro badeecooyin ama la sugo amniga dadka ka shaqeeya Port-au-Prince.