په پام کې ده، حماس به پر پنجشنبه درې یرغمل شوي اسرائیلیان او پنځه تایلنډیان خوشي کړي

اسرائیلي چارواکي وايي، په پام کې ده، چې حماس به پر پنجشنبه په غزه کې درې یرغمل شوي اسرائیلیان او پنځه تایلنډیان خوشي کړي.

د دوو ملکي ښځو، ۲۹ کلنې اربیل یهود او اګام بیرګر نومونه د یوه ۸۰ کلن سړي ګادي موسیس تر څنګ یاد شوي، چې اسرائیليان دي او د حماس له بنده به خوشي شي.

که دغه بهیر بشپړ شي، دا به په غزه کې د اوربند هوکړې یوې برخې په توګه د یرغمل شویو اسرائیلیانو درېیمه ډله وي، چې خوشي کېږي. د اسرائیلي یرغمل شویو کسانو بدل کې ۱۱۰ فلسطیني بندیان د اسرائیل له زندانونو خوشي کېږي.

بل لور د تایلنډي یرغمل شویو کسانو نومونه تر اوسه نه دي یاد شوي. د دوی خوشي کېدل د حماس یواړخیز ګام دی او د اوربند هوکړې برخه نه بلل کېږي. رپوټونو کې ویل شوي، دا کسان کرنیز کارګر دي، چې له اسرائیله تښتول شوي وو.

د تایلنډ حکومت وايي، د دې هېواد شپږ کسان تر اوسه په غزه کې ساتل شوي.

واچارا سریوان، بنناوت سیتو، ساتیان سواناخم، نتاپونګ پنټا، پونګساک تنا او سوراساک لامنا د دې کسانو نومونه یاد شوي دي. تایلنډي چارواکي وايي، داسې فکر کېږي، چې دوه نور یرغمل شوي تایلنډیان سودتیساک رینتالاک او سونتیا اواکخراسري مړه شوي دي.

اربیل یهود

۲۹ کلنه اربیل یهود د اکتوبر ۷ مې بریدونو پر مهال په سویلي اسرائیل کې له خپل کوره تښتول شوې وه.

د بې درکه او یرغمل کسانو د کورنیو فورم مسوولینو په وینا دا له خپل ملګري اریل کونیو سره یو ځای تښتول شوې وه، چې له خپل ورور ډېویډ کونیو سره تر اوسه یرغمل ساتل کېږي.

د دې د ورور ډولیو یهود په هکله لومړی فکر کېده، چې یرغمل نیول شوی، خو د مړي له موندل کېدو وروسته یې اسرائیلي چارواکو مړینه تائید کړه. اربیل د اشکول سیمې په ساینس، تکنالوژۍ او فضايي څېړنو مرکز کې دنده درلوده.

ګادي موسیس

۸۰ کلن ګادي موسیس هم له نیراوز سیمې تښتول شوی و، چې ده پکې د کرنیز ماهر په توګه کار کاوه. په هغه برید کې د ده ملګرې ایفرت کاتز وژل شوې وه.

په سپتمبر کې د نوموړي کورنۍ ټایم اف اسرائیل ورځپاڼې ته ویلي و، چې د ۲۰۲۳ کال په حماس پروپاګند ویډیو کې د نوموړي له لیدل کېدو وروسته د هغه په هکله هېڅ معلومات نه لري.

اګام بیرګر

۲۰ کلنه سرتېرې اګام بیرګر له ناهال اوز پوځي کمپه تښتول شوې وه، چې له غزې سره پر پوله پروت مرکز دی. دا په هغو ویډیويي کلیپونو کې لیدل کېده، چې حماس خپرې کړې.

د یرغمل او بې درکه کسانو د کورنیو فورم مسوولینو په وینا دې په پوځي مرکز کې د څارونکې دنده درلوده او د اکتوبر له ۷مې دوې ورځې مخکې هلته رسېدلې وه.

د هغو ۱۱۰ فلسطیني بندیانو نومونه، چې د اسرائیل له زندانونو خوشي کېږي، تر اوسه نه دي یاد شوي، خو داسې فکر کېږي، چې لږ تر لږه ۳۰ ښځې او ماشومان هم په کې شامل دي او داسې کسان هم پکې شته، چې په عمري زندان سزا محکوم شوي دي.

د دوی خوشي کېدل د هغې هوکړې برخه کې د بندیانو خوشي کولو درېیمه ډله ده، چې د جنورۍ پر ۱۹مه پلې شوه. له دې مخکې له اسرائیلي زندانونو د ۲۹۰ فلسطینیانو خوشي کېدو بدل کې ۷ ښځې خوشې شوې دي.

اسرائیل حکومت وايي، تمه کېږي، د څلورو نارینه وو خوشي کېدو پړاو به پر راتلونکې شنبه پیل شي.

د ۲۰۲۳ کال اکتوبر پر اوومه نېټه د حماس یوه ناڅاپي برید بدل کې، چې ۱۲۰۰ کسان پکې ووژل شول او ۲۵۱ کسان یرغمل شول، اسرائیلي ځواکونو د حماس له منځه وړلو کمپاین پیل کړ.

په غزه کې د حماس تر کنټرول لاندې عامې روغتیا وزارت مسوولین وايي، تر اوسه په غزه کې د اسرائیلي ځواکونو بریدونو له کبله ۴۷ زره ۳۱۰ کسان وژل شوي دي.