افغانستان کې د کانکور ازموینو پایلې اعلان شوې؛ هېڅ ښځینه پکې نشته
د عکس سرچینه، MOHE
په افغانستان کې د طالبانو حکومت د ازموینې ادارې د ۱۴۰۲ لمریز کال کانکور ازموینو پایلې نن دوشنبه اعلان کړې.
د طالبانو حکومت د ریس الوزرا اداري مرستيال د ۱۴۰۲ کال د ازموينې پايلو د اعلان په مراسمو کې وويل، سږ کال په ازموينه کې د ګډون کوونکو شمېر "د تېرو کلونو په پرتله زيات دی."
خو روښانه نه ده چې دغه شمېر څرنګه ډېر شوی، ځکه سږ کال د کانکور په ازموینه کې هېڅ نجلۍ یا ښځینه ته د ګډون اجازه نه وه ورکول شوې او په پایلو کې یې هم نجونې نه نشته.
دا لومړی ځل دی چې په کانکور کې نجونې له ګډون منع کړل شوې دي.
د مولوي عبدالسلام حنفي په وینا "سږ کال د کانکور ازموینې هېڅ ګډونوال ناکام او یا هم بې پایلې شوی نه دی، بلکې ټول ګډونوال په بېلابېلو پوهنځيو کې جذب شوي دي."
د ازموینو ملي ادارې مشر عبدالباقي حقاني په وینا سږ کال په کانکور ازموینه کې شاوخوا ۸۸ زره کسانو ګډون کړی وو چې په پنځو برخو کې تر ۸۲ زره کسانو ډېر ګډون وال بریالي شوي دي. ځینې کسان نیمه لوړو زدکړو ته بریالي شوي دي.
ښاغلی حقاني وايي تېر کال د کانکور ۴۰ زره او ۸۳۹ ګډونوال دولتي پوهنتونونو ته جذب شوي وو، خو سږ کال ۴۴زره او ۳۳۶ دولتي پوهنتونونو ته جذبېږي چې د تېر کال پرتله څه باندې درې زره کسان پکې زیات دي.
سږ کال په افغانستان کې نجونو ته د کانکور ازموینې کې د ګډون اجازه ور نه کړل شوه او یوازې نارینه وو پکې ګډون کړی وو.
د کانکور د پایلو پنځه برخې
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د کانکور کمېټې ویلي، سږ کال د کانکور پایلې په پنځو برخو ویشل شوي، چې "عالیه، خامسه، مدرسه، نیمه لوړې زدکړې او عمومي کانکور" څانګې دي.
د کانکور ازمونیو د پایلو اعلان له مخې د فراه ولايت اوسېدونکي محمود د ٣٥٩ نمرو په ترلاسه کولو سره لومړى مقام خپل کړى او د کابل طبي پوهنتون د طب پوهنځي ته یې لار موندلې ده.
د کابل اوسېدونکي عباس د ۳۵۷ نمرو په ترلاسه کولو دویم ځای او د کابل اوسېدونکی عبدالباسط د ۳۵۵ نمرو په ترلاسه کولو سره درېیم ځای نیولی دی.
محمد طه د میدان وردګو له ولایته د علماوو د عالیه درجې اول نومره او سید عبدالله د نیمروز اوسېدونکی د علماوو خامسه درجې اول نومره اعلان شوي دي.
د طالبانو د حکومت چارواکي وايي، خصوصي پوهنتونونو ته هم د تېر کال پرتله ډېر کسان ور پېژندل شوي دي.
د ازموینو ملي ادارې مشر عبدالباقي حقاني په وینا تېر کال دا شمېر څه باندې اتلس زره وو، خو سږ کال تر ۳۱ زرو کسانو اوښتی.
