د اسرائیلو پوځ وايي د يوه بل يرغمل مړی يې موندلی دی

اسرائیلي پوځ ویلي، د یوه بل یرغمل شوي اسرائیلي وګړي جسد یې موندلی دی. اسرائيلي چارواکو د دغه کس نوم ران بيجامين ياد کړی دی.

۵۳ کلن بیجامین د اکټوبر په اوومه د غزې پولې ته څېرمه پر بایسکل سپور و چې د حماس غړو پر اسرائیل برید وکړ.

د اسرائیلو د پوځ ویاند دانیال هیګاري وايي، "د اسرائیلي یرغمل شوي ران بیجامین جسد د پوځي عملیاتو پر مهال موندل شوی دی. هغه واده کړی و او دوه اولادونه یې لرل. ران د اکټوبر په اومه له خپلو دوستانو پر بایسکل چکر ته وتلی و چې د حماس د ترهګرو له خوا په بې رحمۍ ووژل شو او د هغه جسد یې غزې ته ولېږداوه. د دغو څلور کسانو مړي تر موندلو او پېژندلو وروسته اسراییل ته لېږدول شوي او هلته به خاورو ته وسپارل شي."

د ران بيجامين د جسد تر موندل کېدو یوه ورځ وړاندې د دريو نورو اسرائيلي یرغملو مړي هم موندل شوي وو.

مسوولینو ويلي وو، موندل شوي مړي د شاني لویوک، امیت بیوسکیلا او ایتژاک ګیلیرینتیر په نومونو پېژندل شوي دي.

اې ډي ایف چارواکي وايي، دا کسان د اکتوبر پر ۷مه وژل شوي او مړي یې غزې ته لېږدول شوي وو. د ځايي رسنیو په رپوټونو کې ویل شوي، چې دا مړي د حماس په یوه تونل کې موندل شوي دي.

د یادونې ده، چې د حماس په بریدونو کې چې ناڅاپه یې د اسرائیل دننه وکړل، تر ۱۲۰۰ پورې کسان وژل شوي وو. حماس وسله وال له هغو بریدونو وروسته ۲۵۲ اسرائیلیان د یرغمل په توګه غزې ته لېږدولي وو.

د اسرائیلو لومړي وزیر بنیامن نتنیاهو د مړو موندل کېدو خبر ''زړه ماتونکی'' بللی دی. نوموړي په دې هکله وویل، ''موږ به خپل ټول یرغمل کسان بېرته راوړو، که ژوندي وي او که یې مړي وي.''

ای ډي ایف ځواکونو بیا په دې تړاو یوه اعلامیه کې ویلي، دغه درې مړي یې د شپنیو عملیاتو په ترڅ کې موندلي دي. دوی زیاتوي په غزه کې له نیول شویو ''ترهګرو یې د تحقیقاتو په ترڅ کې'' معلومات تر لاسه کړي وو.

حماس تر اوسه د یرغمل شویو کسانو د جسدونو د موندلو په اړه څه نه دي ویلي، خو د جمعې په ورځ د حماس پوځي څانګې وویل چې یرغمل شوي کسان به یوازې د خپلو خلکو د باعزته تبادلې له لارې خوشې شي.

په نومبر کې د یوې هوکړې له مخې حماس ۱۰۵ یرغمل شوي اسرائیلیان د یوې اوونۍ اوږده اوربند او له اسرائیلي زندانونو د د ۲۴۰ فلسطیني زندانیانو خوشي کېدو بدل کې پرېښوول.

تر اوسه معلومه نه ده، چې د نادرکه یرغمل شویو کسانو له ډلې یې څومره ژوندي پاتې دي.

په تېره نومبر میاشت کې د یوې هوکړې له مخې، حماس د یوې اونۍ اوربند او د اسراییل له زندانونو څخه د ۲۴۰ فلسطیني بندیانو د خوشې کولو په بدل کې ۱۰۵ یرغمل شوي اسرائیلیان خوشې کړل.

دا لا څرګنده نه ده چې له حماس سره په بند کې د شته اسرائیلي یرغملو له ډلې څو تنه یې لا ژوندي دي.

په قاهره کې د اوربند او د یرغمل شویو کسانو د خلاصون په هدف پیل شوې خبرې اترې اوسمهال په ټپه ولاړې دي. پر اسراییل د حماس له لوري د اکټوبر د اومې تر برید وروسته پر غزې د اسراییل په بریدونو کې شاوخوا ۳۵ زره فلسطینیان وژل شوي چې ډېره برخه یې ولسي وګړي دي.

ملګري ملتونه وايي، له دوو میلیونو ډېر فلسطینیان د خوراکي توکو له سخت کمښت سره مخامخ دي چې بېړنیو سرپناوو او نورو بشري مرستو ته اړتیا لري.