اوکرايين ادعا کړې چې د روسیې په پوځي لیکو کې "پاکستاني کرایي سرتېري" هم شته خو پاکستان دا ردوي

د اوکرايين ولسمشر ولوديمیر زېلېنسکي ادعا کړې چې د روسیې په پوځي لیکو کې د پاکستان او چین په ګډون د ګڼو نورو هېوادونو "کرایه کړي پوځيان" هم د اوکرايين پر ضد جنګېږي.

ښاغلي زېلېنسکي د یکشنبې په ورځ (اګست ۴/زمری ۱۳) پر خپله اېکس‌پاڼه لیکلي چې دی په 'ووفچانڅک' سیمه کې د خپلو پوځي مرکزونو او سرتېرو لیدو ته ورغلی و. په وینا یې، ده هلته له قومندانانو سره یې د جګړې پر لومړۍ کرښه د روان وضعیت، د ووفچانڅک د دفاع او د ډرون او نورو پوځي اکمالاتو په اړه خبرې وکړې.

ښاغلي زېلېنکسي پر خپله اېکس‌پاڼه په دغه بیان کې همدا راز ادعا کړې چې په دې سیمه کې مېشتو اوکراييني پوځيانو ورته وویل چې د روسیې له لوري د پاکستان، چین، اوزبکستان، تاجکستان او د ځينو افریقايي هېوادونو "اجیر/کرایه کړي پوځيان" هم د اوکرايين پر ضد جګړه کوي.‌

ولودیمیر زېلېنسکي ویلي چې "موږ به یې ځواب ووایو."

بي‌بي‌سي په خپلواکه توګه د اوکراييني ولسمشر دا ادعا نه شي تایيدولی. خو تر دې مخکې هم داسې رپوټونه وو چې ګواکې روسیه د ځينو نورو هېوادونو خلک په خپل پوځ کې ګماري چې د اوکرايين پر ضد جګړه کې برخه ورسره واخلي.

پاکستان څه وايي؟

که څه هم نورو یادو هېوادونو لا د ښاغلي زېلېنسکي دغو څرګندونو ته کوم غبرګون نه دی ښکاره کړی خو پاکستان یې دا تور رد کړی چې ګواکي پاکستانیان دې هم په دې جګړه کې ښکېل وي.‌

د پاکستان بهرنیو چارو وزارت په یوه خبرپاڼه کې ویلي چې اوکرايين په رسمي‌ ډول پاکستان ته داسې څه کله نه دي ویلي او نه هم اوکرايیني چارواکو د خپلو ادعاو د اثبات لپاره کوم شواهد وړاندې کړي دي.‌

د پاکستان د بهرنیو چارو وزارت همدا راز ویلي چې پاکستان به له اوکرايين سره دا موضوع "راپورته کوي" او "سپيناوی" به ترې غواړي.

په خبرپاڼه کې راغلي چې پاکستان د ملګرو ملتونو د اصولو له مخې، د خبرو او ډېپلوماسۍ له لارې د اوکرايين کشالې د حل غوښتونکی دی.

تر دې وړاندې هم داسې ګڼ رپوټونه خپاره شوي چې ګواکې د ځينو هېوادونو اوسېدونکي د روسیې په ملاتړ د اوکرايين پر ضد جګړه کې برخه لري.

د ۲۰۲۴ کال په مې میاشت کې بي‌بي‌سي په یوه څېړنیز رپوټ کې وموندله چې ښايي روسیه د کیوبا هېواد خلک په خپل پوځ کې ګماري چې د اوکرايين په خلاف جګړه کې برخه ورسره واخلي.

تر دې مخکې د ۲۰۲۴ کال په فبروري میاشت کې ځينو هندي کورنیو ادعا وکړه چې ګڼ ځوانان یې د "مرستندوی وظیفې" په پلمه "په دوکه" د اوکرايين او روسیې جګړې ته لېږل شوي چې هلته د روسیې په پوځي لیکو کې د اوکرايين خلاف جګړه وکړي.

د یادولو ده چې روسیې په ۲۰۲۴ کې داسې یو قانون جوړ کړ چې پر بنست یې، هغه زندانیان به نور له قانوني چلند سره نه مخ کېږي او جرمي دوسیې به یې وتړل شي چې د اوکرايين پر ضد جګړه کې برخه اخیستل ومني.

د دغه قانون موخه د روسیې په پوځي لیکو کې د سرتېرو د کمي پوره کول ښودل شوې.