طالبانو د شخصي پوهنتونو لپاره کانکور ازموینه کې د نجونو نوملیکنه ځنډولې

د طالبانو حکومت په افغانستان کې شخصي پوهنتونو ته امر کړی چې د کانکور ازموینې لپاره تر "امرثاني" پورې نجونو ته د نوم لیکنې اجازه ور نه کړي.

په افغانستان کې د شخصي پوهنتونونو ټولنې هم بي بي سي پښتو ته ومنله چې د طالبانو لوړو زدکړو وزارت د یوه مکتوب له لارې ورته ویلي چې د کانکور ازموینې لپاره د نجونو نوملیکنه داوس لپاره وځنډوي.

د دغې ټولنې یو چارواکی وايي، ټاکل شوې سبا یکشنبه د همدې مکتوب او بندیز په اړه له طالب چارواکو سره خبرې وکړي.

د طالبانو د لوړو زدکړو وزارت په مکتوب کې ویل شوي"د وزارت د مشرتابه شورا د پرېکړې له مخې په ګرمو سیمو کې عمومي کانکور د روان کال د سلواغې له اتمې تر ۲۱ او د متفرقه کانکور د کب له۲۰مې د وري یا حمل ۴مې واخیستل شي."

د همدې مکتوب په بله برخه کې ویل شوي "د یادونې وړ ده چې د اناثو یانې ښځو محصلانو نوم لیکنې ته تر دویم اطلاع پورې اجازه نشته.

په مکتوب کې دا یادونه هم شوې چې" که څوک له دې پرېکړې سرغړونه وکړي، قانوني چلند به ورسره کېږي."

د افغانستان په سوېل کې د یوه شخصي پوهنتون مشر هم بي بي سي پښتو ته ومنله چې دغه مکتوب ورسېدلی او ورته ویل شوي چې "امرثاني" پورې د کانکور ازموینې لپاره د نجونو نوملیکنه ونه کړي.

د طالبانو د لوړو زدکړو وزارت ویاند هم بي بي سي ته د دغه مکتوب پخلی کړی دی.

ضیا هاشمي وايي "دا د هغه عمومي مکتوب برخه ده چې له مخې یې تر امري ثاني پورې په پوهنتونونو کې د ټولو نجونو زدکړې ځنډېدلي دي."

په افغانستان د شخصي پوهنتونونو لپاره له دولتي هغو بېل کانکور ازموینې اخیستل کېږي چې د څار چارې یې د لوړو زدکړو وزارت په غاړه لري. هر کال د شخصي پوهنتونونو لپاره د کانکور د اخیستو نیټه هم د لوړو زدکړو وزارت په همغږۍ ټاکل کېږي.

د تېر ډیسمبر پر شلمه د طالبانو لوړو زدکړو وزارت په دولتي او خصوصي‌ پوهنتونونونو کې د نجونو زدکړې وځنډولې، چې دې پرېکړې یې په کور دننه او بهر پراخ غبرګونونه پارولي دي.

له هغه بندیز وروسته د امریکا، بریتانیا، فرانسې، جرمني، کاناډا، جاپان، هالنډ، ناروې، اسپانیا، سویزرلېنډ او اروپايي ټولنې بهرنیو چارو وزارتونو په ګډون ګڼو هېوادو په یوه ګډه ویناپاڼه کې طالبانو ته خبرداری ورکړی، چې دا پرېکړه به یې له دوی سره د اړیکو پر څرنګوالي اغېز وکړي.

د طالبانو لوړو زدکړو وزیر ندا محمد ندیم وروسته وویل، په پوهنتونونو کې د طالبانو د حکومت له خوا وړاندیز شوي "اصلاحات نه پلي کېدل" نو اړ شول چې د ځنډېدو پرېکړه یې وکړي.

طالبان وايي، د نجونو پر زدکړو بندیزونو یې لنډمهالي دي او "نوی چاپیریال" ورته برابروي خو د ځینو وېره بیا دا ده چې ښايي طالبان د خپلې مخکېنۍ واکمنۍ په څېر یو ځل بیا نجونې او ښځې له زدکړو او کار منع کړي.