د نجونو تړلي ښوونځي؛ دیني عالمانو او حامد کرزي یي یو ځل بیا د پرانیستو غوښتنه کړې

افغانستان کې د دیني عالمانو له منځه دا ځل د ختیځې حوزې سلګونو عالمانو په یوه غږ د طالبانو له حکومته وغوښتل چې له شپږم ټولګي پورته د نجونو ښوونځي پرانیزي.

دوی په کونړ ولایت کې سره غونډه شوي وو او یو شمېر قومي مشرانو هم په دې غونډه کې برخه اخیستې وه.

د ولي والله په نوم یوه ګډون کوونکي د طالبانو حکومت ته په خطاب سره وویل، په هېڅ پلمه دې نجونې له تعلیمه نه بې برخې کوي.

ولي والله وايي:" د فساد د ختمېدو په نوم باندې دې د ټول ملک دغه وګړي له تعلیمه نه ګرځوي. ځکه مونږ زنانه ډاکټرې ته اړتیا لرو."

همدارنګه یوه بل ګډون کوونکي ګل میران د نجونو تعلیم د هغوی اسلامي او انساني حق وګاڼه او وویل: "دا زمونږه حق دی، باید په اسلامي بڼه او اسلامي اوصول پر بنسټ د ښځو ښوونځي خلاص شي چې مونږ د نړیوالو له پړې ووځو. "

له دې مخکې د بېلابېلو غونډو له لارې د افغانستان یو شمېر نورو دیني عالمانو هم د طالبانو له حکومته غوښتي و چې د ټولو نجونو ښوونځي پرانیزي.

د افغانستان پخواني ولسمشر حامد کرزي د کونړ د عالمان غونډه او غوښتنه ستایلې ده او ده هم ورسره غبرګه کړې چې د طالبانو حکومت باید د نجونو ښوونځي پرانیزي.

ښاغلي کرزي په خپل ټویټر پاڼه کې لیکلي: "د هېواد پرمختګ او ابادي د نجونو او هلکانو په تعلیم پورې تړلې ده او له اسلامی سرپرست حکومت نه غواړي چې پدې اړه د هېواد د علماوو او مشرانو غږ ته احترام وکړي او د نجونو ښوونځي بیرته پرانیزي څو په دې توگه د پردیو شوم اهداف ناکام او خپل خلک او هېواد د روښانه راتلونکې خاوندان کړو. "همدارنګه د ملګرو ملتونو پراختیايي پروګرام په ډاګه کړې چې د افغانستان ۷۰ سلنه وګړي نالوستي دي خو دا هم مني چې افغانان د پرمختګ ښه پوهه لري.

په کوردننه دیني عالمانو او یو شمېر سیاستمدارانو د طالبانو پرېکړې ته خپل مخالفتونه په ډاګه کړي او د طالبانو له خوا ښوونځیو ته د نجونو نه پرېښودو پرېکړې له کوره بهر په نړیواله کچه پراخ او سخت غبرګونه را پارولي دي.

د بشري حقونو د څار ټولنې ویلي و چې ښوونځيو ته د نجونو نه پرېښودل يې نه يوازې دوى ته، د دوى کورنيو او هم د افغانستان راتلونکي ته خورا بدې پايلې لري.

دا تېر مارچ طالبانو ويل د نجونو ښوونځي پرانيزي خو د پرانيستو پر ورځ ترې په شا شول، او ويل یې تر بل امره دې نجونې کورونو کې وي.