महाराष्ट्रात बंदुकीचं लायसन्स किती जणांकडे आहे? बंदूक लायसन्स कसं मिळतं?
फोटो स्रोत, Getty Images
गेल्या आठवड्यात पंजाबमधील प्रसिद्ध गायक सिद्धू मुसेवाला यांची निर्घृण हत्या झाली. त्यांच्यावर एके-47 चे तब्बल 30 राऊंड फायर झाले होते. या घटनेत त्यांच्या गाडीच्या काचेची अक्षरश: चाळण झाली.
मात्र त्याआधी सिद्धू मुसेवालासुद्धा शस्त्राचा वापर करायचे आणि लोकांनाही ते शस्त्र बागळण्यासाठी उद्युक्त करत असत असा त्यांच्यावर आरोप होता.
गोळीबार करतानाचे मुसा यांचे दोन व्हीडिओ व्हायरल झाले होते. यातल्या एका व्हीडिओत ते बर्नालाच्या बडबर फायरिंग रेंजमध्ये कथितरित्या रायफलने गोळीबार करताना दिसतात.
मे 2020 मध्ये संगरूर आणि बर्नालामध्ये सिद्धू आणि आणखी नऊ लोकांवर या प्रकरणी गुन्हा दाखल झाला.
दुसऱ्या व्हीडिओत सिद्धू मुसेवालाच्या संगरूरच्या लड्डा कोठी रेंजमध्ये पिस्तुलाने गोळ्या चालवताना दिसत आहे. दोन्ही व्हीडिओ लॉकडाऊनच्या काळातले आहेत.
पोलिसांनी आधी आपत्ती व्यवस्थापन अधिनियमाअंतर्गत सिद्धू मुसेवालांवर गुन्हे दाखल केले आणि नंतर हे दोन्ही गुन्ह्यांमध्ये आर्म अॅक्टची कलमं जोडली गेली
याआधी फेब्रुवारी 2020 मध्ये मानसा पोलिसांनी हत्यारांच्या वापराला उत्तेजन दिल्याच्या आरोपखाली मूसेवाला यांच्या विरोधात गुन्हा दाखल केला होता.
यानंतर मुसेवाला आपलं गाण, 'गभरू ते केस जेडा संजय दत्त ते' या गाण्यामुळे वादात अडकले होते. या गाण्यामुळे पंजाब क्राईम ब्रँचने त्यांच्याविरोधात गन कल्चर आणि हिंसेला उत्तेजन दिल्याच्या आरोपाखाली गुन्हा दाखल केला होता.
16 जुलै 2020 साली रिलीज झालेल्या 'संजू' गाण्यात सिद्धू मुसेवालांनी आपल्या विरोधात दाखल झालेल्या आर्म अॅक्ट केसची तुलना अभिनेते संजय दत्त यांच्याविरोधातल्या केसशी केली होती. सिद्धू मुसेवाला : स्वतःची संजय दत्तशी तुलना, बंदुका मिरवणं ते 30 गोळ्या झाडल्याने मृत्यूपर्यंत...
ऑलिम्पिक नेमबाज आणि वरिष्ठ पोलीस अधिकारी अवनीत कौर सिद्धू यांनी आपल्या फेसबुक अकाउंटव्दारे सिद्धू मुसेवाला यांना सल्ला दिला होता.
फेब्रुवारी 2020 साली त्यांच्या एका स्टेज शोमध्ये सिद्धू मुसेवालांनी म्हटलं होतं की, "माझ्या कोणत्याही गावात आजवर ड्रग्सचा उल्लेख आहे का? वेबसीरिजमध्ये दाखवलेली हिंसा पाहा. तुम्हीही बंदुका देणं बंद करा, लायसन्स देणं बंद करा, दारूचे गुत्ते बंद करा."
कोणत्या राज्यात किती शस्त्र?
सिद्धू मुसेवाला प्रकरणानंतर आम्ही शस्त्राचा परवाना असलेल्या लोकांच्या आकडेवारीचा आम्ही आढावा घेतला.
तरीही शस्त्रधारी परवाना असलेल्या लोकांची एक यादी समोर आली आहे. केंद्रीय गृहमंत्रालयाने 2018 मध्ये जारी केलेल्या आकडेवारीनुसार भारतात एकूण 35,87,016 लोकांकडे शस्त्रांचा परवाना आहे.
या आकडेवारीत सगळ्यांत आघाडीवर उत्तर प्रदेश राज्य आहे. उत्तर प्रदेशात 12,88,459 लोकांकडे शस्त्रांचा परवाना म्हणजेच लायसन आहे. त्या खालोखाल पंजाब, मध्य प्रदेश, हरयाणाचा नंबर लागतो.
महाराष्ट्रात 88,018 लोकांकडे शस्त्राचा परवाना आहे. तर बिहारचा नंबर सगळ्यांत शेवटचा आहे. बिहारमध्ये 80,858 लोकांकडे शस्त्राचा परवाना आहे.
शस्त्राचा परवाना कोणाला आणि कसा मिळतो?
शस्त्राचा परवाना Arms Act 2016 नुसार मिळतो. त्यासाठी तब्बल 14 फॉर्म भरावे लागतात. ज्या ठिकाणी शस्त्राचा परवाना मिळतो तिथल्या अधिकाऱ्यांकडे हा अर्ज करावा लागतो.
एखाद्या नागरिकाला त्याच्या जीविताला धोका आहे असं वाटत असेल तर ती व्यक्ती शस्त्राच्या परवान्याचा अर्ज करू शकते. त्यासाठी पोलीस ठाण्यात FIR द्यावा लागतो. भारतात हा परवाना मिळवण्याची प्रकिया खूप लांबलचक आहे
त्यासाठी पोलीस उपअधीक्षकांच्या नावाने ऑनलाईन अर्ज करावा लागतो. अर्ज मिळाल्यावर त्याच्या व्यक्तीच्या विरोधात गुन्हा दाखल नाही ना याची पडताळणी करण्यात येते.
ज्या व्यक्तीला परवाना हवा आहे त्या व्यक्तीची इत्यंभूत माहिती काढली जाते. ती व्यक्ती भांडकुदळ आहे का, त्याचा रेकॉर्ड कसा आहे याची माहिती शेजाऱ्यांकडून घेतली जाते.
ज्या व्यक्तीला परवाना हवा आहे त्याची मुलाखत पोलीस उपायुक्त घेतात. त्या व्यक्तीची शारीरिक आणि मनोवैज्ञानिक तपासणी करण्यात येते.
फोटो स्रोत, Getty Images
लायसन्सची बंदूक तरच मिळते
बंदूक का हवी या प्रश्नाचं उत्तर कायम स्वसंरक्षण असं असतं. बरेचदा ते मान्य केलंही जातं. जंगली प्राण्यांपासून संरक्षण मिळवण्यासाठी सुद्धा बंदूकीचा परवाना मिळतो.
मुलाखत घेतल्यानंतर पोलीस उपायुक्त तो अहवाल NCRB ला आणि गुन्हे शाखेला पाठवतात.
सगळ्या अटींची पूर्तता झाल्यावर पोलीस उपायुक्त किंवा पोलीस अधीक्षक शस्त्राचा परवाना देऊ शकतात.
शस्त्राचा परवाना मिळाल्यानंतर मग ती व्यक्ती संबंधित कंपन्यांकडे जाऊन शस्त्र मिळवू शकते. शस्त्र खरेदी करून त्याची नोंदणी करू शकते.
सिद्धू मुसेवाला प्रकरणानंतर या सगळ्या बाबी पुन्हा एकदा ऐरणीवर आल्या आहेत.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
