नरेंद्र मोदींची उद्धव ठाकरेंवर नाव न घेता राममंदिराच्या मुद्द्यावरून टीका?

पंतप्रधान नरेंद्र मोदींनी नाशिकमध्ये झालेल्या सभेत उद्धव ठाकरे आणि शिवसेनेंवर नाव न घेता टीका केली आहे.

"गेल्या दोन तीन आठवड्यांपासून काही बोलघेवडे लोक राममंदिराविषयी काहीही बरळत आहेत. त्यांनी सुप्रीम कोर्टावर आपला विश्वास ठेवायला हवा," असं नरेंद्र मोदींनी म्हटलं आहे.

दोन दिवसांपूर्वी उद्धव ठाकरेंनी मुंबईत एका कार्यक्रमात बोलताना 370 प्रमाणेच आता सरकारनं राम मंदिराचा निर्णय घ्यावा असं म्हटलं होतं. मुंबईत एका कार्यक्रमात त्यांनी हे विधान केलं होतं.

16 जूनला उद्धव ठाकरेंनी पुन्हा एकदा आयोध्याचा दौरा केला होता. त्यावेळी पत्रकारांशी बोलताना उद्धव ठाकरे यांनी नरेंद्र मोदी सरकारनं याबाबत अध्यादेश काढावा अशी मागणी केली होती.

नरेंद्र मोदींनी नेमकी टीका काय केली आहे?

"नाशिकबरोबर प्रभू श्रीरामाचं नावंही जोडलं गेलेलं आहे. मला तुम्हाला आज अजून एक गोष्ट सांगायची आहे, गेल्या दोन-तीन आठवड्यांपासून काही बोलघेवड्या, बडबड करणाऱ्या लोकांनी राममंदिर विषयावरून वाट्टेल ते बरळायला सुरुवात केली आहे. देशातल्या सर्व नागरिकांनी भारताच्या सुप्रीम कोर्टाप्रती सन्मान राखला पाहिजे.

हे प्रकरण सुप्रीम कोर्टात प्रलंबित आहे, यावर चर्चासुनावणी सुरूआहे, सुप्रीम कोर्ट सातत्याने वेळ काढून बाबी ऐकून घेत आहे, मग मला कळत नाही की हे बोलघेवडे लोक कुठून उगवले आहेत. या प्रकरणी ते खोडा का घालत आहेत. आपला सुप्रीम कोर्टावर विश्वास असला पाहिजे. आपला बाबासाहेब आंबेडकरांनी दिलेल्या संविधानावर विश्वास असला पाहिजे. भारताच्या न्यायप्रक्रियेवर आपला विश्वास असला पाहिजे. यामुळेच मी आज नाशिकच्या पवित्र भूमीवर, मी या बोलघेवड्या लोकांना हात जोडून विनंती करतो, की देवासाठी, प्रभू श्रीरामासाठी तरी डोळे बंद करून भारताच्या न्यायप्रक्रियेवर विश्वास ठेवा."

नरेंद्र मोदींच्या भाषणातले ठळक मुद्दे

- नरेंद्र मोदींनी मराठीत भाषणाला सुरुवात केली.

- छत्रपती उदयनराजेंनी माझ्या डोक्यावर छत्र ठेवलंय, हा सन्मान आहे आणि ही जबाबदारीसुद्धा आहे. त्याची इज्जत ठेवण्यासाठी मी माझं जीवन पणाला लावेल यासाठी मला आशिर्वाद द्या.

- जे यात्रेला जाऊन येतात त्याला नमस्कार केल्यास त्याला अर्धं पुण्य मिळतं. मी पण इथे देवेंद्रजींसारख्या यात्रीला नमस्कार करायला आलो आहे. 4000 किमीच्या या यात्रेत त्यांना आशीर्वाद प्राप्त झाले आहेत. अध्यात्मिक आणि सामर्थ्याच्या चेतना त्यंनी जागविल्या आहेत.

- जिथे जिथे माझी नजर जातेय तिथे तिथे लोक उपस्थित आहेत. देवेंद्र फडणवीस आणि त्यांच्या टीमला आशीर्वाद देण्यासाठी जनसागर लोटलाय.

- मी महाराष्ट्रातील राजकीय विद्वानांना आवाहन करतो, की ते तत्कालीन घटनांवर लिहितातच. पण त्यांनी महाराष्ट्राच्या राजकारणावर लिहायला हवं.

- या महाराष्ट्रात कुणी मुख्यमंत्री, कुणी सरकार सलग पाच वर्षं चालवलं आहे, तर ते एक वसंतराव आणि दुसरे देवेंद्र फडणवीस आहेत. दोनच उदाहरणं आहेत.

- आता पुन्हा एकदा देवेंद्रजींच्या स्थिर सरकारचा फायदा जनतेने उठवला पाहिजे.

- पूर्ण बहुमत नसताना देवेंद्रजींनी 5 वर्षं यशस्वी सरकार चालवलं.

- राजकारणातल्या विद्वानांना कळत नाही, पण जनतेप्रती समर्पण केल्याचा फायदा देवेंद्रजींना मिळालाय. मलाही मिळाला होता. राजकारणी विद्वानांना ते कळणार नाही.

- साठ वर्षांत पहिल्यांदा एक सरकार दुसऱ्यांदा दुप्पट ताकदीने पुन्हा सत्तेत आलं. जनता ताकद देते तेव्हा सरकारलाही ताकदीने काम करता येते. 100 दिवसांत याची प्रचिती पाहिली का? ही तुमचीच ताकद आहे.

- महाराष्ट्रात लोकांमध्ये जाऊन पाच वर्षांच्या कार्याचा हिशोब दिला. देवेंद्रजींनी रिपोर्ट दिला. महाराष्ट्राला सामाजिक स्थिरता मिळाली, सद्भाव मिळाला. आधुनिक इ्न्फ्रास्ट्रक्चर मिळालं.

- महाराष्ट्रातील भगिनींना मुद्राऋण आणि रोजगार योजनांतून संधी मिळाली. बंजारा जातीच्या आवाज ऐकला गेला.

- हे रिपोर्टकार्ड फक्त पाच वर्षांमध्ये मिळालंय असं नाही. भाजपचं सरकार नेहमीच आपल्या कार्याचा हिशोब देतं.

- देशाच्या विकासाची गती वाढेल.

- आम्ही महाराष्ट्रातल्या देशातल्या शेतकऱ्याला पीएम किसान सन्मान निधीचा लाभ आम्ही देऊ, 20 हजार करोड रुपये शेतकऱ्यांच्या खात्यात गेले आहेत.

- घराघरात पाणी पोहोचवू म्हटलं होतं, त्याच्यावर काम सुरू आहे.

- देशातल्या 500 कोटींपेक्षा जास्त पशुधनाला संसर्गापासून वाचवण्यासाठी लसिकरण काम सुरू आहे.

- देशाच्या लष्कराला सशक्त करण्यासाठी आवश्यक प्रत्येक पाऊल उचलले. तिन्ही लष्करी दलांमधल्या योग्य ताळमेळासाठी दशकांपसून चर्चा सुरू होती. पण आम्ही त्यासाठी पद निर्माण केलं.

- 2009 मध्ये 1 लाख 76 हजार बुलेटफूट जॅकेटं लष्करानं मागितली होती. त्याशिवाय आपले जवान लढत होते. भाजप सरकार आल्यावर आम्ही बुलेटप्रूफ जॅकेट खरेदीची परक्रिया सुरु केली. शिवाय त्यांची निर्मिती नाशिकमध्ये सुरू केली. आता त्याची निर्यातही करत आहोत.

- आम्ही महारा्ष्ट्राबरोबरच देशाला वचन दिलं होतं जम्मू- काश्मीर आणि लडाखच्या अडचणींसाठी प्रयत्न करू. आज आम्ही ते स्वप्न पूर्ण करण्यासााठी पाऊल टाकलेलं आहे. हा केवळ सरकारचा निर्णय नाहीये तर 130 कोटी भारतीयांचा निर्णय आहे.

- आता घोषणा द्यायच्यात - 'हमें हिंदुस्थानिओंको नया कश्मीर बनाना है.. वहा फिरसे एक बार स्वर्ग बनाना है', चला, काश्मीरच्या जखमांवर मलम लावू या.

- दिल्लीच्या चुकीच्या धोरणांमुळे काश्मीरला त्रास झालाय, ते बदलायचंय. तिथले तरुण, माता भगिनी या हिंसेतून बाहेर पडण्यासाठी मनाने तयार झाले आहेत.

- शरद पवारांना शेजारी देश आवडतो, त्यांना तो कल्याणकारी वाटतो, पण संपूर्ण महाराष्ट्र जाणतो, दुनियेला माहितीये की आतंकी फॅक्टरी कुठे आहे, त्यांच्या झुंडी कुठून येतात.

- सावरकारांनी प्रत्येक दुःख हसतमुखाने झेलण्याचे संस्कार आपल्याला दिलेत, प्रत्येकाला सन्मानासह जगण्याचीसाठी प्रेरणा दिली आहे.

- यंदाच्या 2 ऑक्टोबरला महात्मा गांधींच्या 150 वी जयंतीच्या निमित्ताने प्लास्टिकमुक्ती करायची आहे.

- माझ्या शेतकरी बांधवांना पाण्यासाठी झगडावं लागणार नाही, महाराष्ट्र पाणी संपन्न झालं की उपलब्ध होणाऱ्या संधींना कुणी रोखू शकत नाही.

- नाशिकला डिफेन्स इनोव्हेशन सेंटर बनण्यासाठी काम चालू आहे.

- महाराष्ट्रात लोडशेडिंग पुन्हा होऊ नये म्हणून भाजप सरकार येणं खूप खूप गरजेचे आहे.

- गेल्या दोन तीन आठवड्यांपासून काही बडबड करणारे लोक राममंदिराविषयी काहीही बरळत आहेत. त्यांनी सुप्रीम कोर्टावर आपला विश्वास ठेवायला हवा.

1.55 - मुख्यमंत्री देवेंद्र फडणवीस यांच्या भाषणातील ठळक मुद्दे

जय भवानीचा जय शिवाजीचा जयघोष करून मुख्यमंत्र्यांनी भाषणाला सुरुवात केली.

- मोदींनी माझ्यासारख्या सोशल इंजिनिअरिंगमध्ये न बसणाऱ्या कार्यकर्त्याला मुख्यमंत्रीपदी संधी दिली.

- पाच वर्षं प्रामाणिकपणे काम केलं. आमच्यावर एकदाही भ्रष्टाचाराचा आरोप राज्यात झाला नाही.

- आपलं दैवत महाराष्ट्राची 12 कोटी जनता आहे. काँग्रेस राष्ट्रवादी त्यांना विसरली. म्हणून जनतेने त्यांना घरी बसवलं.

- मला सगळीकडे लोकांचा प्रचंड प्रतिसाद लाभला. अपेक्षेपेक्षा जास्त आशीर्वाद दिला.

- मराठवाड्यासारख्या दुष्काळग्रस्त भागातून मला कोल्हापूर पूरग्रस्त भागासाठी लोकांनी मला साडेतीन कोटी रुपयांचे चेक दिले. महाराष्ट्रातल्या जनतेचे कसे आभार मानू.

- पवार म्हणाले, मुख्यमंत्री हिशोब देतायंत. आम्ही आमच्याकडे तपासनीस ठेवतो. पण आम्ही सेवक आहोत. आम्ही जनतेत जाऊन हिशोब देतो. म्हणून लोकांनी सेवकांना निवडून दिलं. राजेशाही लोकांना दिलं नाही.

- मागच्या निवडणूक आणि आताच्या निवडणुकीतील फरक म्हणजे शिवरायांचा आशीर्वाद, मोदीजी आणि आता राजांच्या वंशजाची साथ हा आहे.

- पुढच्या पाच वर्षांत दुष्काळमुक्त महाराष्ट्र करायचाय.

- मराठवाड्यात पाणी आणायचाय. योजनांच्या माध्यमातून उत्तर महाराष्ट्र, पश्चिम विदर्भ आणि मराठवाड्यात पाणी आणू.

- देशाच्या 5 ट्रिलियन इकॉनॉमीच्या स्वप्नात 1 ट्रिलियन महाराष्ट्राचा वाटा असेल.

- उद्योगक्षेत्रातल्या 89 लाख लोकांना रोजगार गेल्या पाच वर्षांत आम्ही दिला.

1. 40 - नरेंद्र मोदींचे पगडी घालून स्वागत

उदयनराजे भोसले यांनी पंतप्रधान नरेंद्र मोदी यांचं पगडी घालून स्वागत केलं.

1.37 - नरेंद्र मोदींचं व्यासपीठावर आगमन

1. 35 - तोडून काँग्रेस आणि राष्ट्रवादीचे बंधन, करतो शिवाजी महाराज आणि बाबासाहेंबांना वंदन,

महाराष्ट्रात जनादेश यात्रेचं फडणवीसांनी आणलं चंदन, मोदी करणार आहेत विरोधकांचं रणकंदन - रामदास आठवले यांनी आपली कविता सादर केली.

1.34 - पंतप्रधान नरेंद्र मोदी यांच्या ताफ्याचं आगमन

1. 29 - भाजप हा जातीपातीला थारा देणारा पक्ष नाही - पंकजा मुंडे

1.28 - राज्याला राष्ट्रवादी काँग्रेस मुक्त करण्याचं स्वप्न - पंकजा मुंडे

याआधी काय घडलं?

गेले काही दिवस महाजनादेश यात्रेनिमित्त देवेंद्र फडणवीस यांनी महाराष्ट्राच्या अनेक जिल्ह्यांमधून प्रवास केला आहे. या दरम्यान अनेक नेत्यांनी भाजपामध्ये प्रवेशही केला आहे. शेतकऱ्यांचे प्रश्न, आगामी काळातील सरकारचे धोरण, बेरोजगारी आणि पक्षामध्ये बाहेरून येणाऱ्या लोकांचा वाढता प्रवाह याबद्दलही नरेंद्र मोदी काय बोलणार याकडे सर्वांचे लक्ष लागून राहिले आहे. कांद्यावरील निर्यातबंदी आणि बाहेरून कांदा आयात करण्याच्या विचारामुळे कांदा उत्पादकांची कोंडी झाली आहे. ही कोंडी फोडण्यासाठी पंतप्रधान काय करतात याकडेही नाशिकच्या शेतकऱ्यांचे लक्ष लागले आहे.

या सभेच्या आणि कांद्याच्या कोंडीमुळे शहराला पोलीस छावणीचे स्वरूप आले आहे. तसेच कायदा आणि सुव्यवस्थेस बाधा पोहोचू नये यासाठी आज सर्व मद्यविक्री दुकाने बंद ठेवण्यात येणार आहेत.

गेली पाच वर्षं महाराष्ट्रात सत्तेत राहिलेले शिवसेना आणि भाजप युती करून आगामी निवडणुकांना सामोरं जाणार की स्वबळाचा नारा देणार, हे अद्याप निश्चित नाही. मात्र युतीतला तणाव वाढवणारी लक्षणं ठळकपणे दिसू लागली आहेत. अशा स्थितीत महाजनादेश यात्रेच्या अंतिम दिवशी काही संकेत मिळतील अशीही चर्चा सुरू आहे.

2014 साली मे महिन्यात केंद्रात सत्तांतर झाल्यावर काही महिन्यातच महाराष्ट्र, हरियाणा आणि झारखंड राज्यांमध्ये निवडणुकांचे वारे वाहू लागले होते. लोकसभा निवडणुकांच्या प्रचारात भाजपचे तेव्हाचे पंतप्रधानपदाचे उमेदवार नरेंद्र मोदी यांनी अख्खा देश पिंजून काढला होता. त्यानंतर या राज्यांच्या विधानसभांसाठीही त्यांनी सर्वत्र प्रचार केला होता.

महाराष्ट्र विधानसभा निवडणुकांच्या धामधुमीत नव्याने पंतप्रधानपदी आलेल्या नरेंद्र मोदी यांची 'ब्रँड व्हॅल्यू' चांगलीच जाणवत होती. नरेंद्र मोदी यांनीच राज्याच्या विधानसभा निवडणुकांसाठी केलेल्या प्रचाराचा फायदाही भाजपाला झाला होता. त्यामुळे यंदाही नरेंद्र मोदी यांच्या प्रचाराचा भाजपाला किती फायदा होण्याची शक्यता आहे.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)