'पाकिस्तानसोबत क्रिकेट मॅच खेळणार; तुमचा सद्सद्विवेक जागा नाहीये का,' असदुद्दीन ओवैसींचा सवाल

संसदेच्या पावसाळी अधिवेशनादरम्यान लोकसभेत ऑपरेशन सिंदूरवर चर्चेला सुरूवात झाली. सोमवारी (28 जुलै) पहिल्या दिवशी संरक्षण मंत्री राजनाथ सिंह यांनी चर्चेला सुरूवात केली.

चर्चेदरम्यान सत्ताधारी पक्षाच्या तसेच विरोधी पक्षाच्या अनेक नेत्यांनी आपली भूमिका मांडली, काहीवेळा परस्परांवर आरोप-प्रत्यारोपही झाले.

याच चर्चेदरम्यान एआयएमआयएमचे नेते असदुद्दीन ओवैसी यांनी भारत-पाकिस्तानदरम्यानच्या मॅचवरच प्रश्नचिन्ह उपस्थित केलं.

त्यांनी म्हटलं की, पहलगाम हल्ल्यानंतर केंद्र सरकारने म्हटलं होतं की, 'पानी और खून एक साथ नहीं बह सकते' आणि पाकिस्तानविरोधात अनेक निर्बंध लादले होते. मग 14 सप्टेंबरला आशिया चषकमध्ये भारताची टीम पाकिस्तानविरुद्ध कशी खेळणार आहे?

त्यांनी म्हटलं, "बैसरनमध्ये लोकांची हत्या झाल्यानंतर पाकिस्तानसोबतचा व्यापार बंद आहे. विमान उड्डाणं रद्द आहेत. आपल्या जलक्षेत्रात त्यांची जहाजं येऊ शकत नाहीयेत. अशा परिस्थितीत तुम्ही पाकिस्तानसोबत क्रिकेट खेळणार... तुमचं सद्सद्विवेक जागा नाहीये का"

ओवैसी यांनी म्हटलं की, माझा सद्सद्विवेक मला भारत-पाकिस्तानदरम्यानची क्रिकेट मॅच पाहण्याची अनुमती देत नाही.

त्यांनी पुढे म्हटलं की, "पाणी आणि रक्त एकत्र वाहणार नाही, असं म्हणत आपण पाकिस्तानचं ऐंशी टक्के पाणी अडवत आहोत. आणि त्यांच्यासोबतच आपण क्रिकेट खेळणार. मॅडम, मी तरी ही मॅच पाहू शकणार नाही."

त्यांनी केंद्र सरकारला प्रश्न विचारत म्हटलं की, ऑपरेशन सिंदूरच्या माध्यमातून पहलगाम हल्ल्याचा बदला घेतला गेला आहे आणि आता तुम्ही भारत-पाकिस्तान क्रिकेट मॅच पाहू शकता, असं या हल्ल्यात मारल्या गेलेल्या जवानांच्या कुटुंबियांना सांगायचं धाडस तुमच्यामध्ये आहे का?

ओवैसी यांनी म्हटलं, "या हल्ल्याची जबाबदारी कोणाची आहे? जर ही जबाबदारी जम्मू-काश्मिरच्या उपराज्यपालांची आहे, तर त्यांना हटविण्यात का आलं नाही. जर गुप्तचर यंत्रणा की पोलिसांच्या निष्काळजीपणा जबाबदार असेल तर त्यांच्या विरुद्ध कारवाई व्हायला हवी. या हल्ल्याची जबाबदारी कोणाची हे निश्चित व्हायला हवं."

एशियन क्रिकेट काऊन्सिलने (ACC) आशिया कप 2025 चे वेळापत्रक जाहीर केले आहे.या स्पर्धेचे यजमानपद भारताकडे आणि आशिया चषकाचे आयोजन संयुक्त अरब अमिरातमध्ये होत आहे. यावेळी आशिया कप टी-20 फॉर्मॅटमध्ये खेळला जाणार आहे. स्पर्धेची सुरुवात 9 सप्टेंबरला होईल आणि अंतिम सामना 28 सप्टेंबर रोजी असेल.

भारत आणि पाकिस्तान एकाच ग्रुपमध्ये असतील. 14 सप्टेंबर रोजी भारत आणि पाकिस्तान यांच्यात सामना होईल. भारत आणि पाकिस्तान दोन्ही देश फायनलला गेले तर आणखी दोन सामने या देशांमध्ये खेळले जाऊ शकतात.

मे महिन्यात भारत आणि पाकिस्तानमध्ये संघर्ष झाल्यानंतर पहिल्यांदा या दोन्ही टीम एकमेकांसमोर उभ्या ठाकतील.

काँग्रेस आणि शिवसेना (UBT) यांच्यासह अनेक नेटिझन्सनी यावर आक्षेप नोंदवले आहेत.

युथ काँग्रेसने ट्विटरवर म्हटले आहे की, आशिया कपमध्ये भारत आणि पाकिस्तान यांच्यात सामना खेळण्याची घोषणा करण्यात आली आहे. मग जे पहलगाम हल्ल्यात मृत्युमुखी पडले होते त्यांचं काय?

आशिया कप 2025 च्या यजमानपदाचा अधिकार भारताकडे आहे. परंतु, भारत आणि पाकिस्तानमध्ये झालेल्या संघर्षानंतर या स्पर्धेचा 17 वा सीजन होईल की नाही, याबद्दल साशंकता निर्माण झाली होती.

शनिवारी ACC चे अध्यक्ष आणि पाकिस्तान क्रिकेट बोर्डाचे चेअरमन मोहनसीन नकवी यांनी 17 व्या सीजनची घोषणा केली. ही घोषणा करताना त्यांनी क्रिकेटविन्स हा हॅशटॅग देखील वापरला. अद्याप BCCI ने या घोषणेवर कोणतीही प्रतिक्रिया दिलेली नाही.

आशिया कपमध्ये 8 टीमचा समावेश

ACC कडून झालेल्या घोषणेनुसार या स्पर्धेत 8 देशांचा समावेश आहे. एशियन क्रिकेट काउन्सिलचे पाच पूर्ण सदस्य अफगाणिस्तान, बांगलादेश, भारत, पाकिस्तान आणि श्रीलंका यांच्यासह संयुक्त अरब आमिरात, ओमान आणि हाँगकाँग देखील या स्पर्धेत भाग घेतील.

पाकिस्तान आणि भारताच्या ग्रुपमध्ये ओमान, संयुक्त अरब आमिरात यांचा समावेश आहे. 'ग्रुप बी'मध्ये अफगाणिस्तान, बांगलादेश, श्रीलंका आणि हाँगकाँगचा समावेश आहे.

9 सप्टेंबर रोजी हाँगकाँग आणि बांगलादेश यांच्या सामन्याने स्पर्धेचे उद्घाटन होईल. दोन्ही ग्रुपमध्ये टॉपवर असलेल्या दोन दोन टीम पुढील फेरीसाठी पात्र ठरतील. त्यानंतर ज्या टीम पहिल्या दोन क्रमांकावर असतील त्यांच्यात 28 सप्टेंबर रोजी अंतिम सामना होईल.

गुरुवारी ढाक्यात एशियन क्रिकेट काऊन्सिलची वार्षिक बैठक पार पडली. या बैठकीनंतर मोहसीन नकवी यांनी पत्रकार परिषद घेतली. त्यावेळी त्यांनी स्पर्धेचे ठिकाण अथवा तारखांची घोषणा केली नव्हती.

शनिवारी 26 जुलैला त्यांनी वेळापत्रक जाहीर केले.

या वर्षाच्या सुरुवातीला पाकिस्तानमध्ये चॅम्पियन्स ट्रॉफीचे आयोजन करण्यात आले होते. परंतु, भारतासोबतचे सामने दुबईमध्ये खेळण्यात आले होते.

त्यावेळी BCCI आणि PCB यांच्यात एक सामंजस्य करार झाला होता, त्यानुसार भारत आणि पाकिस्तानमधील सामने हे न्यूट्रल व्हेन्यूवर होतील असे म्हटले होते.

शेवटच्या आशिया कपच्या सीजनचा भारत विजेता आहे. भारताने 2023मध्ये श्रीलंकेला हरवून चषक भारतात आणला होता.

काँग्रेस आणि शिवसेनेने काय म्हटले?

भारत पाकिस्तान सामन्याबाबत सोशल मीडियावर प्रतिक्रिया येत आहेत.

इंडियन यूथ काँग्रेसने म्हटले आहे की, "भारत विरुद्ध पाकिस्तान मॅचची अधिकृत घोषणा झाली आहे. पंतप्रधानांनी म्हटले होते की, दहशतवाद आणि खेळ एकत्र चालू शकत नाही. तर मग हे काय सुरू आहे. ICC चे अध्यक्ष दुसरं तिसरं कुणी नसून गृहमंत्री अमित शाह यांचे पुत्र जय शाह आहेत. म्हणजे हे सारं काही संगनमताने सुरू आहे. मग जे लोक पहलगाम हल्ल्यात मृत्युमुखी पडले त्यांचे काय?"

शिवसेना खासदार प्रियंका चतुर्वेदी यांनी बीसीसीआयला देखील प्रश्न विचारला आहे.

या मुद्द्यासंबंधी त्यांनी ANI ला म्हटले, "जर भारत-पाकिस्तान सामना झाला तर केवळ सरकारच नाही तर BCCIचे देखील अपयश असेल. एका बाजूला आपण कारगील दिवसाच्या निमित्ताने आपल्या सैन्याच्या वीर गाथेचे स्मरण करत आहोत, तर त्याच दिवशी PCB ही घोषणा करत आहे की, आशिया कप UAEमध्ये होईल."

"मी ऑपरेशन सिंदूर अंतर्गत संसदेच्या शिष्टमंडळात सहभागी होते. आम्ही म्हटलं होतं की, दहशतवाद सुरू असताना काही चर्चा होणार नाही. अद्याप पहलगामच्या हल्ल्यासाठी जबाबदार असलेल्या दहशतवाद्यांना अटक झालेली नाही.

"बीसीसीआय भारत-पाकिस्तान स्पर्धेला कसं काय परवानगी देऊ शकतं. केवळ मीच नाही तर देशातील प्रत्येक नागरिक या मॅचचा विरोध करेल."

भारतीय क्रिकेट टीमचे माजी कर्णधार आणि काँग्रेस नेता मोहम्मद अझरुद्दीन यांनी म्हटले आहे की, "भारत आणि पाकिस्तान या दोन्ही देशात मालिका होत नाहीत तर आंतराष्ट्रीय मालिकेत दोन्ही देश का खेळतात?

"माझी भूमिका स्पष्ट आहे. आंतरराष्ट्रीय टुर्नामेंटमध्ये देखील दोन्ही देशांना एकमेंकाविरोधात खेळू नये. परंतु सरकार आणि बोर्ड जे ठरवेल तेच होईल."

भारत आणि पाकिस्तानातील प्रतिक्रिया

या सामन्याचा अनेक भारतीय यूझर सोशल मीडियावर विरोध करताना दिसत आहेत.

नमिता बाल्यान यांनी एक्स वरील अकाउंटमध्ये म्हटले आहे की, "आशिया कप 2025 ची घोषणा कारगिल विजय दिनाच्या दिवशी झाली. निश्चितपणे हा आपल्याला कारगीलमध्ये बलिदान दिलेल्या वीरांविषयी अथवा ऑपरेशन सिंदूरबाबत अनादर आहे. कारण भारत-पाकिस्तान मॅचमधून भरपूर पैसे कमवण्याला प्राधान्य देण्यात आले आहे."

दर्पण नावाच्या एका यूझरने म्हटले आहे की, "आशिया कपमध्ये भारत -पाकिस्तान सामना खेळला जाणार असल्याचे मी ऐकले आहे. बीसीसीआय या विषयाकडे गांभीर्याने पाहतंय की नाही? तेही नुकताच काश्मीरमध्ये हल्ला झालेला असताना?"

धारिया नावाच्या एका यूझरने म्हटलं आहे की, "भारताने पाकिस्तानसोबतच्या मॅचवर बहिष्कार टाकला पाहिजे."

त्यांनी पुढे म्हटले की, "बीसीसीआय आणि भारत सरकारला लाज वाटली पाहिजे की आशिया कपमध्ये होणारा भारत-पाकिस्तान सामना हा पहलगाम हल्ल्यातील पीडितांशी खेळण्यासारखं आहे. भारताने पाकिस्तानसोबत खेळल्या जाणाऱ्या सर्व मॅचेसवर बहिष्कार केला पाहिजे."

त्याचवेळी पाकिस्तानच्या क्रिकेट फॅन्सनी या घोषणेचे स्वागत केले आहे.

पाकिस्तानचे यूझर सय्यद मोहम्मद उस्मान यांनी म्हटलं आहे की, "राजकारणाहून क्रिकेटला अधिक प्राधान्य देण्यात आले आहे. ही गोष्ट चांगली आहे. यासंबंधात केलेल्या जाणाऱ्या प्रयत्नांसाठी बीसीसीआय कौतुकास पात्र आहे."

उस्मान पुढे म्हणतात की, "आपण हे विसरुन चालणार नाही की ही केवळ भारत-पाकिस्तानमधील स्पर्धा नाही. तर या स्पर्धेच्या आयोजनातून मिळणाऱ्या महसुलावर नेपाळ, भूटान, हाँगकाँग सारख्या छोट्या देशात क्रिकेट या खेळाला प्रोत्साहन मिळते."

(बीबीसीसाठी कलेक्टिव्ह न्यूजरूमचे प्रकाशन.)