फिटनेस कोचला 22 व्या वर्षीच हार्टअटॅक, तरुणांना सल्ला देताना म्हणाली...

फिटनेस कोच म्हटला की तो अत्यंत तंदुरुस्त असणार हे ओघानेच येते. मात्र जर एखाद्या तरुण फिटनेस कोचलाच हृदयविकाराचा झटका आला तर...

फेथ हॅरिसन या इंग्लंडमधील श्रॉप्सहायर येथील फिटेनस कोच असणाऱ्या तरुणीला वयाच्या 22व्या वर्षीच ह्रदयविकाराचा झटका आला. त्यानंतर तिने हृदयविकाराच्या लक्षणासंदर्भात जागृती निर्माण करण्यासाठी ब्रिटिश हार्ट फाऊंडेशन (बीएचएफ) बरोबर काम करण्याचा निर्धार केला.

फेथ हॅरिसनला जानेवारी महिन्यात हॉकीचा एक सामना खेळल्यानंतर अचानक अस्वस्थ वाटू लागले होते. त्यामुळे तिला तातडीने हॉस्पिटलमध्ये दाखल करण्यात आलं होतं.

फेथ तंदुरुस्तीविषयी अत्यंत जागरुक असणारी आणि नियमितपणे व्यायाम करणारी तरुणी आहे. मात्र तिला डॉक्टरांनी एक अत्यंत धक्कादायक बाब सांगितली. ती म्हणजे फेथला सात तासांपासून हृदयविकाराचा झटका येत होता.

अत्यंत तातडीने ऑपरेशन केल्यानंतर फेथ हॅरिसनचे हृदय अतिशय कमकुवत झाले असून त्याची कार्यक्षमता फारच कमी झाल्याचे निष्पन्न झाले.

या घटनेनंतर तिने तरुणांना ते अमर नसल्याचे आणि आयुष्याला गृहित न धरण्याचे आवाहन केले आहे.

ती म्हणाली, ''मला जेव्हा कळले की मला हृदयविकाराचा झटका आला आहे आणि माझे ह्रदय कमकुवत झाले आहे.

तेव्हा मला धक्का बसला आणि माझे यापुढील आयुष्य बदलणार असल्याची जाणीव झाली. त्याआधी माझ्यासमोर व्यावसायिक उद्दिष्टे होती, फिटनेसची उद्दिष्टे होती, आयुष्याबद्दल माझी स्वप्ने होती.''

''मात्र आता माझ्या शारीरिक आणि मानसिक आरोग्यातच बदल झाल्यामुळे माझी उद्दिष्टे फारच बदलली आहेत.''

फेथ हॅरिसन पुढे म्हणाली, 6 जानेवारीला स्टॅफर्ड येथे हॉकी सामना खेळल्यानंतर तिला अस्वस्थ, वेगळेच वाटू लागले.

तिथून तिचे घर एक तासाच्या अंतरावर होते. फेथचा हात सुन्न, बधिर झाल्याचे जाणवल्यानंतर आणि छाती ताणली जाऊ लागल्यानंतर तिने घरी जायचे ठरवले आणि ती कारमध्ये बसली.

मात्र परिस्थितीचे गांभीर्य लक्षात घेऊन चिंताग्रस्त झालेली फेथ तिच्या आई-वडिलांच्या घराकडे निघाली. कारण ते तिथून जवळ होते. तिथे पोचल्यानंतर तिने आई-वडिलांना सांगितले की काहीतरी गंभीर होते आहे.

त्यानंतर फेथला टेलफोर्ड येथील प्रिन्सेस रॉयल हॉस्पिटलमध्ये नेण्यात आले. त्यानंतर तिला रुग्णवाहिकेद्वारे रॉयल स्टोक युनिव्हर्सिटी हॉस्पिटलमध्ये दाखल करण्यात आले.

तिथे चाचण्या केल्यानंतर एक रक्ताच्या गुठळीमुळे फेथच्या डाव्या धमनी मधील रक्तप्रवाह जवळपास 90 टक्क्यांपर्यंत थांबल्याचे निष्पन्न झाले. त्यामुळे तिला ह्रदयविकाराचा तीव्र झटका आला होता. या प्रकारचा ह्रदयविकाराचा झटका अतिशय गंभीर आणि प्राणघातक स्वरुपाचा असतो.

फेथला पेटंट फोरमेन ओव्हल (पीएफओ) असल्याचे चाचणीतून समोर आले. या आजारात ह्रदयाच्या दोन महत्त्वाच्या कप्प्यांमध्ये एक छोटे छिद्र असते.

या छोट्या छिद्रामुळेच एरवी फारसे गंभीर नसणारी रक्ताची गुठळी धमनीत पोचली होती आणि त्यामुळे रक्तप्रवाहात अडथळा निर्माण झाला होता.

आपण अमर नाही

त्यानंतर फेथवर तातडीने थ्रॉमबेक्टोमी (रक्ताची गुठळी काढण्याचे ऑपरेशन) करण्यात आली. मात्र त्याचबरोबर तिला आलेल्या हृदयविकाराच्या झटक्याच्या गांभीर्यामुळे तिच्या हृदयाची कार्यक्षमता कमी झाल्याचेही निदान करण्यात आले.

तिच्यावर तातडीने करण्यात आलेल्या उपचारांबद्दल फेथ हॅरिसनने वैद्यकीय स्टाफ चे आभार मानले. तसेच या आजारातून सावरण्यासाठी तिला मदत करणाऱ्या ब्रिटिश हार्ट फाऊंडेशनचेही फेथने आभार मानले.

हॉस्पिटलमध्ये उपचार होत असताना फेथने समाजसेवी कामासाठी 250 पौंडाची रक्कम उभी केली. तिला मिळालेल्या या नव्या आयुष्यात काहीतरी समाजकार्य करण्याची इच्छा तिने व्यक्त केली.

हीच इच्छा पुढे नेत फेथ हॅरिसनने हृदयविकाराच्या लक्षणासंदर्भात आणि तिच्या आजाराबद्दल सोशल मीडियावरून जागृती निर्माण करण्यास सुरूवात केली.

फेथ म्हणाली, ''मला तरुणांमध्ये जागृती निर्माण करायची आहे की तुम्ही अमर नाहीत आणि आयुष्याला गृहीत धरू नका.''

हेही नक्की वाचा