वॉशिंग्टनमध्ये आर्मी हेलिकॉप्टरला हवेतच धडकलं विमान, 64 जणांचा मृत्यू
अमेरिकन एअरलाईनच्या एका विमानाची हवेतच हेलिकॉप्टरबरोबर धडक झाल्यानं मोठा अपघात घडला आहे.
या विमानात 60 प्रवासी आणि 4 क्रू मेंबर्स होते अशी माहिती फेडरल एव्हिएशन अॅडमिनिस्ट्रेशनने (FAA) दिली आहे. यात सर्व 64 जणांचे प्राण गेले असल्याची माहिती, बीबीसीची अमेरिकेतील सहकारी संस्था असलेल्या 'सीबीएस'नं दिली आहे.
रेगन वॉशिंग्टन नॅशनल एअरपोर्टवर रात्र 9 वाजेच्या सुमारास रनवे क्रमांक 33 च्या दिशेनं जात असताना हा अपघात घडल्याची माहिती FAA नं दिली आहे.
हे विमान कोसळल्यानंतर वॉशिंग्टन डीसीमधून वाहणाऱ्या पोटोमॅक नदीमध्ये पडल्याची माहिती अग्निशमन विभागानं दिली आहे.
अमेरिकेचे राष्ट्राध्यक्ष डोनाल्ड ट्रम्प यांनी या गंभीर दुर्घटनेबाबत माहिती मिळाली असल्याचं सांगितलं. तसंच तातडीनं बचाव कार्यासाठी धावून जाणाऱ्यांचं त्यांनी कौतुकही केलं आहे.
अमेरिकेचे उपराष्ट्राध्यक्ष जेडी वेन्स यांनी 'एक्स'वर पोस्ट करून या घटनेवर लक्ष ठेवून असल्याची माहिती दिली. दुर्घटनेतील लोकांसाठी प्रार्थना करण्याची विनंतीही त्यांनी केली आहे.
या दुर्घटनेतील जखमी किंवा मृतांच्या संदर्भात अद्याप काहीही माहिती देण्यात आलेली नाही.
विमानाचे दोन तुकडे झाले?
अमेरिकेन एअरलाईन्सनं विमानात 60 प्रवासी आणि 4 क्रू मेंबर असल्याच्या वृत्ताला दुजोरा दिला आहे.
दरम्यान, या अपघाताबाबत अधिक माहिती अद्याप समोर आलेली नाही. मात्र, हेलिकॉप्टरशी धडक झाल्यानंतर विमानाचे दोन तुकडे झाले आणि ते नदीत कोसळल्याची माहिती अमेरिकेतील काही माध्यमांनी दिली आहे.
तर हेलिकॉप्टरही उलटं-पालटं होऊन विमानाजवळच कोसळलं अशीही माहिती काही माध्यमांनी दिली.
ज्या ब्लॅक हॉक हेलिकॉप्टरबरोबर या विमानाची धडक झाली त्यात अमेरिकेच्या लष्करातील तीन सैनिक असल्याची माहिती एका अधिकाऱ्याने बीबीसीच्या अमेरिकेतील सहकारी संस्था सीबीएसशी बोलताना दिली.
अमेरिकन एअरलाईन्सचे सीईओ रॉबर्ट आयसम यांनी एका व्हीडिओद्वारे या घटनेबाबत दुःख व्यक्त केलं. "हा आमच्यासाठी अत्यंत कठीण दिवस आहे. घटनेबाबत अनेक प्रश्न उपस्थित होत आहेत, हे मला माहिती आहे. त्या सगळ्यांची उत्तरे आता लगेच देऊ शकणार नाही. पण माझ्याकडे उपलब्ध असलेली माहिती मी देणार आहे," असं ते म्हणाले.
वॉशिंग्टन डीसीजवळ लष्कराच्या हेलिकॉप्टरला धडकून विमानाचा अपघात झाला. यात 4 क्रू मेंबर्ससह 60 जणांचा समावेश होता. आम्ही बचावकार्यावर लक्ष देत आहोत. आम्हाला शक्य ते सर्व करण्याचा प्रयत्न करत आहोत. लोकांना कुटुंबीयांची काळजी आहे, याची आम्हाला जाणीव आहे, असंही आयसम यावेळी म्हणाले.
बीबीसीसाठी कलेक्टिव्ह न्यूजरूमचे प्रकाशन.
