Canada: Imvo n'Imvano n'Umunyarwandakazi ufasha abana biganjemo abimukira kwinjira mu mashuri yaho

Mwaramukanye amahoro mwese muteze amatwi Imvo n'Imvano yo kuri uyu wa gatandatu tariki ya mbere y'ukwa 11 mu 2025. Turacyakomeza rwa ruhererekane rw'ibiganiro nagiye gukorera muri Canada mu kwezi kwa 9.

Uyu munsi turavuga ku ishyirahamwe FEEJAD (Famille Pour l'Entraide et l'Education des Jeunes et des Adultes), ryashinzwe n'Umunyarwandakazi Perpétue Mukarugwiza, akaba amaze imyaka 20 ashinze iri shyirahamwe.

Ishyirahamwe FEEJAD rifasha abantu bava mu bihugu birenga 70 byo hirya no hino ku isi. Kubera impamyabushobozi y'ubwarimu yakuye muri Kaminuza ya Québec, Mukarugwiza afasha abo bantu, biganjemo abimukira, uko abana babo binjira vuba mu mashuri yo muri Canada, ababyeyi babo na bo akabigisha uko ayo mashuri akora kugira ngo bashobore gufasha abana babo.

Mukarugwiza yatangiye ibyo bikorwa abikorera mu rugo rwe, abantu bamaze kumubana benshi, ajya gushaka ahantu hanini, abona n'ubufasha. Ubufasha bwinshi abukura muri leta ya Canada.

Namusanze mu biro akoreramo mu mujyi wa Montréal, anyereka ibikorwa bye, mbona na bamwe mu bo afasha, n'abo bakorana ibyo bikorwa.

Nabonye ibikombe n'udushimwe amaze kubona, n'amafoto y'ibirori bamuheragamo utwo dushimwe. Yambwiye ko amaze kubona ibikombe n'udushimwe bigera kuri 12, harimo icyo yahawe mu 2009 n'uwari Umwamikazi w'Ubwongereza.

Perpétue Mukarugwiza afasha kandi n'umuryango nyarwanda uba i Montréal, na cyane cyane nko kubashakira aho bakorera ibikorwa byabo n'ibindi.

Maze kureba ibyo bakora najyanye muri 'Studio' Perpétue Mukarugwiza n'umwungirije Alexis Manirakiza, we ni Umurundi, hamwe n'umwe mu bo bafashije, Umunyarwanda witwa Jacques Rwirangira, maze dukora iki kiganiro cy'Imvo n'Imvano ngiye kubagezaho.

Muri kumwe na Félin Gakwaya.