Goreth na Kirokiro: urumuri rutazima mu muziki w'u Burundi

Goreth Habonimana naho imyaka imujanye ijwi n'ubuhinga bwo kuririmba vyovyo ntibihera, aho aba akoranije abakuru n'abato baba bamukikuje bumviriza ubuhinga bwiwe mu gusubiramwo indirimbo za kera z'umurwi Amabano n'ubu zigifise akanovera.

Ashize mu gahogo, benshi baritabira abandi bakamugumiriza harimwo n'abakiri bato bavutse inyuma y'umwaka wa 2000 usanga indirimbo z'uwo murwi wa kera bazizi nk'igisabisho kubera Goreth Habonimana adahengeshanya kuzibigisha.

Goreth Habonimana ni umwe mu banyamuziki b'u Burundi bagize agahogo katazimangana.

Yamenyekanye mu murwi Amabano wegukira radiyo na televiziyo vy'u Burundi, azwi cane mu ndirimbo zitandukanye nka Mpa inka yanje, Turerere Uburundi, Umuvyeyi, Munzanire, n'izindi nyinshi zo mu myaka ya 1980 ari kumwe n'ibindi bihangange nka Canjo Amissi, Nikiza David bita Niki Dave, n'abandi nka Afrika Nova ari we Antoine Marie Rugerinyange.

Uwo mukenyezi w'imyaka irenga 60 be n'umugabo wiwe Emmanuel Sadiki batazira Kirokiro -asanzwe ari umuhinga mu kuvuza ingoma z'ikizungu, batterie - bahuriye muri uwo murwi, barahava barubukana, ubu bafise abana n'abuzukuru, bakaba bamaze imyaka 40 bari mu muziki.

Uno munsi Goreth na Kirokiro bamaze imyaka 30 baba mu mahanga, mu gisagara ca Liege kiri mu buseruko bw'Ububirigi. Bari mu mparurwa bakiri bazima mu mugwi wabo wa kera Amabano.

Ariko basa n'abatoranye iragi ryawo. Aho bari mu Bubirigi ntibahengeshanya kuririmba, gucuraranga no kwigisha abana bavukiye mu mahanga.

None Goreth yashitse gute muri 'Amabano'?

Goreth yatanguriye mu murwi wegukira ubushikiranganji bw'inkino n'imico kama bita 'Ballet National', mu nyuma umurwi Amabano wahavuye umugomwa kuko wipfuza abigeme bitabira bongera baririmba mu ntango y'imyaka ya 1980.

Yinjiranye n'bahisi Chantal Nibizi na Amida Hassan, baje bahasanga ibindi bihangage nka Niki Dave, Canjo Amissi, Antoine Marie Rugerinyange batazira Africa Nova n'abacuraranzi nka Diamond Ilunga, Tula Walupini, Bruno Simbavimbere batazira Memba, Aloys Gasuku, Super wa Super.

Abo bagiye hamwe barabiciye biracika bakwira igihugu bakora ibiteramo. Kimwe mu biterano vyabaye rurangiranwa ni ico kwugurura Televiziyo y'Uburundi mu 1984 cabaye ikibiriraho kuri iyo televiziyo hahejeje kuba inama y'abakuru b'ibihugu vya Afrika n'Ubufaransa , sommet France-Afrique.

Ico gihe abakuru b'ibihugu n'ama leta barenga 30 harimwo na prezida w'Ubufaransa w'ico gihe François Mitterand bari bishikiye i Bujumbura, uwo mugwi w'abaririmvyi b'Abarundi waririmbanye n'abaririmvyi b'ibihangange nka Manu Dibango umunya Cameroun yabaye rurangiranwa kw'isi mu kuririmba no kuvuza saxophone, umurwi wa Cassave wo mu mazinga ya Caraibes wari uharawe cane mu myaka ya 80, Mbilia Bel wo muri RD Congi n'umurwi Impala wo mu Rwanda.

Mu 1980, Goreth ari kumwe n'Amabano, baratwaye agashimwe ka Moulin d'Or (Golden Windmill, Urusyo rw'Inzahabu ) kategurwa na radio yo mu Buholandi Radio Nederland Wereldomroep mu guhuza imirwi ikomeye ya Afrika. Ico gihe baciye basohora urutonde rw'indirimbo bise Amsterdam Ticket rwabaye mu zakuzwe cane muri Afrika.

Hari ikibateye agahinda

Mw'ijwi ryuzuye agahinda, bavuga ko bababazwa n'ukuntu abaririmvyi ba kera bibagiwe, akenshi bageheza ubuzima nk'abo ataco bigeze bamara. Atanga akarorero k'umuririmvyi Canjo Amissi yari igihangange yatwaye ubushimwe bukomeye nka Prix Calao Dakar mu 1982, akanashika ku ntambwe ya nyuma y'ihiganwa rya Prix Decouverte RFI (radio mpuzamakungu y'Ubufaransa). Goreth avuga ko Canjo yapfiriye mu bukene butagira izina, abiwe bugarijwe n'ubukene kandi yarateye iteka igihugu.

Ikindi bidogera ni ukuntu indirimbo zabo zicuruzwa batagishijwe inama.

"Twebwe igihe twararirimba twari abakozi ba leta. Ico gihe nta mbuga zigurisha umuziki zariho'', niko Goreth avuga aho abandanya ati ''ariko ubu indirimbo zacu ziragurishwa twebwe twaziririmvye ntiduhabwe na cumi kandi ari ibikorwa mvabwenge.

''Hari n'abasubiramwo indirimbo z'abaririmvyi ba kera badasavye uruhusha ba nyenezo canke imiryango yabo, hari n'abandika ngo Rest In Peace bahejeje indirimbo kandi nyenezo akiriho, bakatwica tukiriho, nta ruvugiro dufise kandi twararwaniye igihugu, birababaje"

Umurwi Amabano wari washinzwe mu 1978 mu nyuma wegukira Radio na Televiziyo vy'igihugu. Mu bari bawugize barenga 12 hasigaye imparurwa. Ariko indirimbo zawo ziracakundwa aho zifashishwa mu birori no mu manza nyinshi z'abakunda umuco n'akaranga vy'Uburundi

Urukundo rwabo n'umuziki rwabaye akaramata

Benshi mu baririmvyi bari kumwe na Goreth baritavye imana, abasigaye baratatanye irya n'ino kw'isi ku mvo zitandukanye. Ni uko Goreth na Kirokiro na bo bagiye mu Bubigi, ariko impano yabo yo gucuraranga ntibigeze bayisiga inyuma.

Kirikoriro, umucance wa Goreth, imirisho y'ingoma iva gake mu ntoke. Avuga ko ari iyerekwa Imana yabahaye kugira batsimbatare ku muziki w'u Burundi.

"Jewe narize ibindi vyo gufata amasanamu ni navyo nkora, ariko buri munsi jewe n'umugore wanje turigisha abakiri bato kuririmba uturirimbo twacu, kuvyina kandi tubikorera ubuntu, n'ibiteramo vyacu n'uko nyene, kugira nitwaba tutahari abandi bazodukorere mu ngata", niko yabwiye BBC.

Nawe Goreth, mu ijwi ryo guhibongoza, yabwiye BBC Gahuzamiryango ko yifuza ko n'umunsi wiwe wa nyuma yoba ariko araririmba yongera aramura urwaruka mu muziki.

Yagize ati : "Gusaza ni mu mutwe. Ubu, ndafise abuzukuru ariko urabona ko abo turirimbana bangana n'abana banje, jewe umuziki nzowonsa abaruka bose ni vyo bimpimbara.

''Nzoguma nigisha kuririmba indirimbo z'akanovera mu Kirundi kiryohoye kandi ndabona ko maze kwamura ivyamwa. Nta maronko nkeneye, nkeneye ko impano n'inyigisho naronse ndabivungurirako urundi runganwe rwankwirikiye."