Burundi: Aba Batwakazi baravavanuye no kubumba inkono, ubu batunzwe n'umuziki

"Nahora mbumba ariko ubu simperutse. Imana yarampezagiye", uyu ni Esther Manirumva, umwe mu bagore b'Abatwakazi basigaye batunzwe n'umwuga wo gutamba, ku mutumba Mubuga, komine Kayanza, intara ya Butanyerera.

Uyu mugore w'imyaka 23 avuga ko umuziki ubu ari wo umutungiye abana biwe batatu.

Ati: "Ubu ndamerewe neza. Nja gutora amazi noga gusa hama nkaja gutamba. Ni wo mwuga wanje".

Esther Manirumva n'abandi Batwakazi bagenzi we bane, bahurikiye mu murwi witwa "Afrimamas".

Kugira ushike mu kigwati babamwo, uvuye mu gisagara ca Bujumbura, ugenda ibirometero birenga 100.

Ni mu misozi. Imodoka ntishobora kuhashika. Vyabaye ngombwa ko ndayisiga ahantu hameze neza hama mbandanya n'amaguru.

Igihe c'isaha indwi n'igice, ni ho nashika ku mutumba Mubuga. Ikigwati kiri ahantu ku musozi uhanamye, hatemba.

Kw'izuba rimena imbwa agahanga, abana bariko barakina, abakuze na bo bariko babumba inkono.

Kubumba, usanzwe ari umwuga kama w'Abatwa bo mu Burundi.

Yamara, mu buryo butari bumenyerewe, aba Afrimamas bo bafashe iyindi nzira. Basigaye batunzwe no gutamba indirimbo zigwezeho zo mu midiho nka Afrobeat, Amapiano, n'iyindi.

Batamba bambaye imvutano, canke iyindi myambaro y'abagore basanzwe. Ni kimwe mu vyo abantu babakundira.

Batamba ibintu bisa, ico bita "chorégraphie".

Izi ntambo zabo baraheza bakazishira ku mbuga hwaniro nka tik tok, facebook, snapchat na youtube.

Nkishika, baciye bakanyukura kugira banyereke ubuhinga bwabo. Batamba bamwenyura, banezerewe cane, abantu bakaza no kurorera.

Mu mezi indwi bamaze batanguye, bafise abantu benshi babakurikira ku mbuga zabo. Kuri tik tok bakurikirwa n'abarenga umuriyoni, facebook na ho bafise abarenga ibihumbi 300.

Ibi vyatumye bagenda baronka amasoko yo kuja kuryosha ibirori mu manza zitandukanye bagahabwa amafaranga canke bagafatanya n'abandi baririmvyi, ibi bikabaha akarusho, hampande y'ayo izi mbuga zibinjiriza.

Rachelle Mugisha, imyaka 18, ni umwe muri bo. Kuva yinjiye muri uwo murwi ubuzima bwiwe bwarahindutse.

Avuga ko atagifise ingorane yo kugura impuzu.

"Iyo mipira iharawe y'ibeyi abandi bambara, na jewe ubu ndayambara", ni ko yambwiye imbere yo kwongerako ati: "Ubu ngura igitenge kirimwo bitatu".

Mugisha yemeza ko n'abana biwe ubu batidoga.

"N'umwana wanje ubu yambara agahuzu kazimvye. Akivuka yambara ndize kuja gusega, ariko ubu bimeze neza".

Eddy Fredol Uwiyera ni we yatanguje uwu murwi. Asigura ko kuba badatamba intambo kama z'abatwa ari mu ntumbero yo kugerageza kujana n'ibihe bafatiye ku vyo abantu benshi bakunda.

Ati: "Bituma bunguka".

Uyu musore w'imyaka 22 avuga ko bazokomeza uwu mwuga gushika aho ibikorwa vy'abo bagore bikwira mu mpande zine z'isi.

Mu Burundi, abatwa bafatwa nk'umurwi w'Abarundi ukiri inyuma mu bijanye n'iterambere.

Batunzwe no kubumba, umwuga ugeramiwe cane n'umuzo w'ibikoresho biva mu mahanga bituma Abarundi batagihurumbira inkono zabo.

Mu gihe benshi muri bo ata n'amatongo bafise, abagize umurwi Afrimamas, muri kazoza bashobora kuzofatwa nk'Abatwa bake cane bashoboye gutora ingene babaho baciye mu yindi nzira.