Imvo n'Imvano n'abanyamuziki b'Abarundi Goreth Habonimana na Emmanuel Sadiki 'Kirokiro'

Kaze mu kiganiro Imvo n'Imvano c'uno munsi ku wa gatandatu tariki 29/11/2025, turemeshereza mu gihugu c'Ububiligi aho tuyaga n'umutamvyikazi rurangiranwa wa kera mu Burundi, Goreth Habonimana, yamenyekanye mu murwi Amabano wo mu myaka ya 1980 na 1990, n'umushingantahe wiwe Emmanuel Sadiki batazira Kirokiro, bamaze imyaka 40 mu muziki.

Goreth Habonimana ni izina rizwi cane mu Burundi. Naho imyaka imujanye, ijwi n'ubuhinga bwo kuririmba vyovyo ntibihera, aho aba akoranije abakuru n'abato baba bamukikuje bumviriza ubuhinga bwiwe mu gusubiramwo indirimbo za kera z'umurwi Amabano, n'ubu zigifise akanovera.

Ashize mu gahogo, benshi baritabira abandi bakamugumiriza, harimwo n'abakiri bato bavutse inyuma y'umwaka wa 2000, usanga indirimbo z'uwo murwi wa kera bazizi nk'igisabisho kubera Goreth Habonimana adahengeshanya kuzibigisha.

Goreth Habonimana yamenyekanye mu murwi Amabano wegukira radiyo na televiziyo vy'Uburundi.

Azwi cane mu ndirimbo zitandukanye nka Mpa Inka Yanje, Turerere Uburundi, Umuvyeyi, Munzanire, n'izindi nyinshi zo mu myaka ya 1980 ari kumwe n'ibindi bihangange nka Canjo Amissi, Nikiza David bita Niki Dave, n'abandi nka Afrika Nova ari we Antoine Marie Rugerinyange.

Uwo mukenyezi w'imyaka irenga 60 be n'umugabo wiwe Emmanuel Sadiki asanzwe ari umuhinga mu kuvuza ingoma z'ikizungu (batterie), bahuriye muri uwo murwi, barahava barubakana, ubu bafise abana n'abuzukuru.

Uno munsi Goreth na Kirokiro bamaze imyaka 30 baba mu mahanga, mu gisagara ca Liège kiri mu buseruko bw'Ububiligi. Bari mu mparurwa bakiri bazima mu mugwi wabo wa kera, Amabano.

Ariko basa n'abatoranye iragi ryawo. Aho bari mu Bubiligi ntibahengeshanya kuririmba, gucuraranga no kwigisha abana bavukiye mu mahanga.

Benshi mu baririmvyi bari kumwe na Goreth barapfuye, abasigaye baratatanye irya n'ino kw'isi ku mvo zitandukanye.

Kirokiro, umucance wa Goreth, imirisho y'ingoma iva gake mu ntoke. Avuga ko ari iyerekwa Imana yabahaye kugira batsimbataze umuziki w'Uburundi.

Kino kiganiro mugishikirizwa na jewe Alain Majesté Barenga.