Amerika yabaye ihagaritse ibyemezo ku busabe bwose bw'ubuhungiro nyuma y'iraswa ry'inkeragutabara

Umukuru wa serivisi z'ubwenegihugu n'abinjira mu gihugu (zizwi nka USCIS mu mpine y'Icyongereza) yavuze ko ubutegetsi bwa Trump bwahagaritse ibyemezo byose ku busabe bw'ubuhungiro, nyuma y'iraswa ry'abasirikare babiri bo mu mutwe w'inkeragutabara (National Guard) w'abitabazwa bibaye ngombwa, barasiwe i Washington DC.

Joseph Edlow, umukuru wa USCIS, yavuze ko uko kuba hahagaritswe ibyo byemezo ku gusaba ubuhungiro bizagumaho "kugeza tubonye ko buri munyamahanga wese amaze gusuzumwa [kugenzurwa] ku rwego rwo hejuru cyane rushoboka".

Bibaye hashize amasaha Perezida w'Amerika Donald Trump asezeranyije "guhagarika mu buryo buhoraho abimukira" bava "mu bihugu biri mu nzira y'amajyambere [bicyennye]".

Ukwiyongera kw'ibyemezo ku bimukira kubaye nyuma y'iraswa ryo ku wa gatatu w'iki cyumweru, ryishe umusirikare umwe naho undi agasigara ari indembe. Abategetsi bashinje Umunya-Afghanistan kuba ari we wabarashe.

Nubwo ibya mbere muri ibyo byemezo byari bigambiriye by'umwihariko Abanya-Afghanistan bashaka ubuhungiro muri Amerika, ibindi byemezo bireba ingeri nyinshi.

USCIS - ishami rya minisiteri y'Amerika y'umutekano mu gihugu - yasabwe kutemeza, kudahakana (kutima) cyangwa kudafunga dosiye z'ubusabe bw'ubuhungiro yakira z'abo mu bihugu byose, nkuko byatangajwe n'igitangazamakuru CBS News, gikorana na BBC muri Amerika.

CBS yatangaje ko abakozi ba USCIS bashobora gukomeza gukora ku busabe bw'ubuhungiro no gusuzuma izo dosiye kugeza ku rwego rwo gufata icyemezo.

Ariko nta byinshi bizwi kuri iri bwiriza ryatanzwe ku wa gatanu.

Trump ntiyavuze amazina y'ibihugu bishobora kugirwaho ingaruka n'uku guhagarika kwe kw'ibijyanye n'abimukira, gushobora kuregwa mu nkiko ndetse kwamaze kwamaganwa n'amashami y'Umuryango w'Abibumbye (ONU).

Ibi Perezida w'Amerika aherutse gutangaza bigaragaza gukaza cyane kurushaho aho ahagaze ku bijyanye n'abimukira kuri iyi manda ye ya kabiri ku butegetsi.

Trump yanashatse gushyira mu ngiro kwirukana mu gihugu mu kivunge abimukira binjiye mu gihugu mu buryo bunyuranyije n'amategeko, kugabanya umubare w'impunzi zakirwa muri Amerika, no gukuraho uburenganzira ufite ubwenegihugu ahita abona, ubwo burenganzira ubu bufitwe na benshi bavukiye ku butaka bw'Amerika.

Nyuma y'icyo gitero cyavuyemo urupfu cyo ku wa gatatu, ubutegetsi bwa Trump bwabaye buhagaritse gutanga impushya zo kwinjira mu gihugu (visa) ku Banya-Afghanistan bo muri gahunda imeze nk'iy'ucyekwa kugaba icyo gitero yakoresheje mu kwinjira muri Amerika.

Nyuma yaho, ubutegetsi bwabaye buhagaritse ubusabe bwose bw'abimukira b'Abanya-Afghanistan, mu gihe hategerejwe ko hakorwa isuzuma.

Nuko ku wa kane, idakomoje ku gitero cyo ku wa gatatu, USCIS yavuze ko izongera gusuzuma abantu bafite impushya zo kuba no gukora muri Amerika mu buryo buhoraho zizwi nka 'green cards' bimukiye muri Amerika bavuye mu bihugu 19.

Icyo kigo cyakomoje ku itangazo ryo muri Kamena (6) uyu mwaka ririmo ibihugu nka Afghanistan, Cuba, Haïti, Irani, Somalia na Venezuela. Nta makuru yatanzwe ku kuntu uko kongera gusuzuma kuzaba kumeze.

Nyuma yaho ku wa kane, Trump yasezeranyije "gusoza inyungu [ibihabwa abaturage] zose za leta na nkunganire [amafaranga leta itanga mu koroshya ikiguzi ku bintu runaka ku baturage] zose za leta ku batari abanyagihugu".