Irani yarashe ibisasu vya misire vyababa 180 kuri Israel

Irani yemeye ku mugaragaro ko yakoze igitero ca misire kuri Israel.

Itororokanirizo ry’amakuru rya Irani IRNA, ryemeje ko igisirikare ca Irani carashe ibisasu vya misire biraswa kure (missiles ballistiques) kuri Israel.

Imboneshakure ya reta ya Irani nayo yacishijweko itangazo ry’ishami ry’igisirikare ca Irani IRGC (lslamic Revolutionary Guard Corps/ Corps des gardiens de la révolution islamique) ryemeza ko ibisasu “bitari bike” vya misire vyarashwe kuri Israel, kandi rikagabisha ko hazoba n’ikindi ari nka hamwe Israel yoramuka yihoye.

Iri shami rya gisirikare rikomeye cane rivuga ko iki gitero ca misire ari ico kwihora kw’igandagurwa ry’umukuru wa Hamas muri Mukakaro (7), Ismail Haniyeh, be n’umukuru wa Hezbollah, Hassan Nasrallah, yishwe ku wa gatanu – hamwe kandi no guhora abanyagihugu ba Libani n’Abanyapalestina bariko baricwa.

Iri shami rivuga ko igisirikare caryo kirwanira mu kirere cateye “ibigo nyamukuru” kandi ko rizotanga amakuru aramvuye mu gihe kiri imbere.

Umutegetsi wo mu bushikiranganji bwo kwivuna abansi bwa Reta Zunze Ubumwe za Amerika yabwiye imboneshakure CBS yo muri Amerika ikorana na BBC ko Amerika yakoroye bimwe mu bisasu vyariko birakoroka mu gufasha gukingira Israel.

Uno mutegetsi avuga ko badashobora gutanga amakuru aramvuye muri uno mwanya.

Irani yatangaje iyi nkuru haciye akanya gato igisirikare ca Israel gitangaje ko Irani yarashe ibisasu vya misire kuri iki gihugu.

Kivuga ko ibisasu vya misire vyababa 180 ari vyo vyarashwe na Irani kuri Israel.

Umutegetsi wo mu gisata kijejwe umutekano ca Israel avuga ko ibi bisasu vya misire hafi vyose vyasamburiwe mu kirere n’igisirikare ca Israel kirwanira mu kirere gifatanije n’ingabo za Amerika zikorera mu karere.

Inzego za Israel zijejwe ubutabazi zitangaza ko gushika ubu ata makuru y’aboba bakomeretse cane muri iki gitero ca misire ca Irani.

Umuvugizi w’ishirahamwe Magen David Adom (MDA) avuga ko abahinga n’abaganga baryo barungitswe mu bikorwa vyo kuraba ko hari aboba bakomeretse “mu bibanza bitari bike bivugwamwo ibi bitero”.

"Gushika ubu, nta makuru y’aboba bakomeretse cane muri ibi bisasu bihejeje kuraswa kuri Israel, kiretse babiri bakomeretse bukebuke mu karere ka Tel Aviv, hamwe n’abandi nabo nyene bakomeretse bukebuke mu gihugu cose mu gihe bariko baja kwinyegeza mu bibanza bitekanye”.

Umuvugizi w’igisirikare ca Israel Daniel Hagari, ahejeje gushikiriza ijambo, aho avuga ko iki gitero kizogira ingaruka.

Ati: “Turameze magabo haba mu buryo bwo kwivuna canke bwo gutera. Tuzokingira abanyagihugu ba Israel. Iki gitero kizogira ingaruka. Turafise integuro, kandi tuzotera mu kibanza dushatse n’igihe tuzoshakira”.

Yongerako ati: “Nta we turumva yapfuye canke yakomeretse; ibi vyose ku bw’inyifato yanyu nziza”.

Yabwiye abanyagihugu ko bashobora kuva aho banyegeye mu bibanza bitekanye.

Muri uno mwanya, kiretse nimba Irani yoba itegura ikindi gihuhusi c’ibisasu vya misire, ubu bisa nk’aho igitero c’iri joro caheze.

Imbuga hwaniro zakwiragije amasanamu menshi yerekana ibi bisasuu vya misire biriko birakoroka nk’imvura hagati muri Israel, vyinshi muri vyo biriko birasamirwa mu kirere.

Ariko hari bimwe vyashoboye gushika ku butaka biteza ibiturika bikomeye.

Iki gihuhusi c’ibisasu vya misire cabonywe n’abanyagihugu b’akarere ka Gaza na Cisjordanie/West Bank, aho Abanyapalestina bamwe bari mu munezero wo kubona Israel iriko iraterwa.

Hamas yishimiye iki gitero

Umuhari Hamas w’Abanyapalestina ushimagiza iki gitero “c’ubutwari” ca misire cakozwe na Irani kuri Israel.

Mw’itangazo wasohoye, uno muhari usanzwe uhanganye na Israel muri Gaza uvuga uti “turakengurutse” ku bisasu vyarashwe na Islamic Revolutionary Guard Corps ya Irani "ku turere twagutse tw’ubutaka bwacu bwihagiwe".

Ku ruhande rwiwe, Ebrahim Azizi, umukuru wa komite ijejwe umutekano w’igihugu n’imigenderanire yo hanze mu nama nshingamateka ya Irani, yavugiye ku mboneshakure ya reta ya Irani ko iki ari igitero ca mbere ca Islamic Revolutionary Guard Corps.

Avuga ko “ibigo n’inyubakwa vya gisirikare ni vyo twateye, ariko ibi bitero bishobora kuba vyagemye n’abasivire kubera hashobora kuba ukwihenda”.

Azizi avuga ko ari nka hamwe Israel “yokora irindi kosa”, hazoca haba ikindi gihuhusi