DJ Fernando, umuririmvyi akunzwe mu Burundi, yipfuza gushinga ishure ry’umuziki

Aho ari mu biteramo ku mugabane wa Bulaya, umuririmvyi w’Umurundi DJ Fernando afise indoto yo gutanguza ishure ryigisha umuziki mu ntumbero yo gutsimbataza umuziki mu Burundi.

Aransabiye Fernand, azwi kw’izina rya DJ Fernando, akunze kuririmba indirimbo z’urukundo, akaba ari mu baririmvyi b’Abarundi bakunzwe cane muri kino gihe, na cane cane mu,bakiri bato, akavuga ko ibi bimuha izindi nguvu zo gukora cane.

Agira ati: “Mfise ihangiro ry’ishure ryigisha umuziki, ngomba kwereka Abarundi ko umuziki ari akazi atari ugufyinata, ni naco gituma ndiko ngira ibiteramo i Bulaya”.

Mu biteramo yakoreye mu Bubirigi n’Ubufaransa mu mpera z’indwi iheze, DJ Fernando w’imyaka 26 yateye amero amajana n’amajana y’abamwitavye, bari bagizwe ahanini n’urwaruka, aho yabiciye bigacika cane cane mu ndirimbo yiwe 'Bellisima' ikunzwe cane mu Barundi.

Armand Niteka, umwe mu bari bitavye igiteramo ca DJ Fernando i Buruseli (Bruxelles/Brussels) mu Bubirigi, yabwiye umunyamakuru Alain Majesté Barenga ati: “Abaririmvyi nk’aba bafise impano yo gukora imiziki iryoshe nk’iyi, inatambika, ni imbonekarimwe iwacu”.

Nayo Samantha w’imyaka 21 ari mu gisagara ca Lille mu Bufaransa, n’ijwi ririmwo ibigumbagumba, avuga ko uko DJ Fernando aririmba yongera atamba bishobora bake.

Inyuma y’ibiteramo yaremeshereje mu Bubiligi no mu Bufaransa, DJ fernando yiteze gukora ibindi mu bihugu vy’Ubuswisi, Ubudagi na Suwede mu mpera z’ino ndwi.

Ategekanya kuzunguruka mu bihugu umunani ku mugabane wa Bulaya.