Ubucamanza bwashyize iherezo ku iperereza kuri Agatha Habyarimana ku ruhare muri jenoside

Abacamanza bo mu Bufaransa bashyize iherezo ku maperereza kuri Agatha Kanziga Habyarimana, umupfakazi w'uwari Perezida w'u Rwanda Juvénal Habyarimana, ku ruhare ashinjwa kugira muri jenoside yabaye mu Rwanda mu 1994, nkuko ibiro ntaramakuru AFP bibitangaza.

Abacamanza bavuze ko Kanziga, w'imyaka 82, "agaragara atari nk'uwakoze jenoside, ahubwo neza nk'uwahohotewe kubera iki gikorwa cy'iterabwoba" cyakorewe umugabo we, ubwo indege yari arimo yahanurwaga yitegura kugwa ku kibuga mpuzamahanga cy'indege cya Kigali, mu ijoro ryo ku wa gatatu, ku itariki ya 6 Mata (4) mu 1994.

Bongeyeho bati: "Ntibishoboka kugaragaza gihamya y'isano hagati y'ubwicanyi bwa mbere bwakozwe na bamwe mu [basirikare] barindaga perezida cyangwa [ubwakozwe] n'igisirikare, n'itegeko ngo yaba yaratanze" muri iryo joro.

Iminsi itatu nyuma yaho, ku itariki ya 9 Mata, Agatha Kanziga n'umuryango we bajyanwe i Burayi ku busabe bw'uwari Perezida w'Ubufaransa François Mitterrand, wari inshuti ya Habyarimana.

Ihanurwa ry'iyo ndege – ryahitanye abari bayirimo bose bari hafi ya Habyarimana ndetse n'uwari Perezida w'u Burundi Cyprien Ntaryamira – rifatwa henshi nk'imbarutso ya jenoside, yiciwemo Abatutsi n'Abahutu batari bashyigikiye ubwicanyi bose hamwe bagera ku 800,000.

Leta y'u Rwanda ishinja Agatha Kanziga ko we n'abakomeye mu gisirikare na politike bari bari hafi y'umuryango wa Perezida Habyarimana mu cyiswe 'Akazu', barimo na musaza we Protais Zigiranyirazo, ari bo bari inyuma y'umugambi wa jenoside. Agatha Kanziga arabihakana.

Abacamanza bavuze ko "nta mbwirwaruhame n'imwe ya Agathe Kanziga ihari avuga amagambo y'urwango cyangwa yo gushishikariza [gukora] jenoside" ndetse ko "nta buhamya na bumwe" bumuhuza n'intonde z'Abatutsi bo kwicwa.

Bongeyeho ko "nta kimenyetso na kimwe" cyuko yakoze icengezamatwara kuri Radio-Televiziyo RTLM yatangazaga ubutumwa bwo kwanga Abatutsi, cyangwa ko yayiteye inkunga, nkuko abishinjwa, ibyo we yakomeje guhakana.

AFP, isubiramo amagambo y'abayihaye amakuru bari hafi y'iyi dosiye, yatangaje ko umucamanza ukora iperereza wo mu ishami rikurikirana ibyaha byibasira inyokomuntu mu rukiko rw'i Paris, yatangaje icyemezo cye cyo kureka gushaka amakuru ku wa gatanu, ku itariki ya 16 Gicurasi (5), bivuze ko kuri ubu Kanziga atakigejejwe mu rubanza.

Abacamanza bavuze ko bafashe icyo cyemezo kubera ko ubuhamya bumushinja "burivuguruza, ntibuhuza ndetse ni ubw'ibinyoma".

Nta cyo leta y'u Rwanda yahise itangaza ku mugaragaro kuri iki cyemezo.

Patrick Baudouin, umunyamategeko w'impuzamashyirahamwe y'uburenganzira bwa muntu, yo mu ruhande rw'abashinja Agatha Kanziga, yavuze ko ababajwe no kudashyirirwaho ibirego kwe "mu gihe hari ibimenyetso bimushinja bihagije cyane".

AFP itangaza ko iki cyemezo cy'urukiko mu mezi macye ari imbere gishobora kuvamo gusoza iyi dosiye mu bucamanza.

Muri Nzeri (9) mu mwaka ushize, parike y'Ubufaransa ishinzwe gukurikirana ibyaha by'iterabwoba (PNAT) yari yasabye urugereko rw'iperereza rwo mu rukiko rw'ubujurire rwa Paris gukora iperereza kuri Agatha Kanziga ku mugambi wo gukora jenoside.

Biteganyijwe ko ku wa gatatu urukiko ruterana mu muhezo nyuma y'iki cyemezo cyo mu cyumweru gishize.

AFP yasubiyemo amagambo y'umunyamategeko Philippe Meilhac wunganira Agatha Kanziga agira ati: "Madamu Habyarimana ategereje atuje cyane ibizava muri iyi dosiye uyu munsi imaze kongera gutungurwa bikomeye n'icyemezo cyafashwe n'umucamanza ukora iperereza, washenye umuvuno w'uruhande rushinja."

Mu kwanga ubusabe bwa parike, umucamanza w'umugore ushinzwe iyi dosiye, hamwe n'undi mucamanza bafatanyije w'impuguke w'umugore, banzuye, nkuko AFP ibitangaza, ko "kuri ubu nta bimenyetso bikomeye kandi byuzuzanya bihari kuri Agathe Kanziga (Habyarimana) ko yashoboye kuba umufatanyacyaha mu gikorwa cya jenoside" cyangwa ko yashoboye "kwitabira umugambi ugamije gukora jenoside".

Muri icyo cyemezo cyabo bongeyeho bati: "Niba ibihuha bimaze igihe kirekire, ntibishobora gusimbura ibimenyetso mu gihe nta bimenyetso mperekeza [ibimenyetso by'ibanze] kandi byuzuzanya bihari."

Icyo cyemezo, cyabonwe na AFP, kivuga ko mu Kuboza (12) kw'umwaka ushize umucamanza yongeye kumva Agatha Kanziga n'abatangabuhamya ariko ko umucamanza yanze ibindi "bikorwa bidafite akamaro" kubera ko "igihe gikwiriye cyo gutegereza ahanini cyari cyamaraze kurenga".

Léon Habyarimana, umwe mu bana b'uwari Perezida Juvénal Habyarimana, yatangaje ku rubuga nkoranyambaga X ko igihe kigeze cyo "gutanga umucyo kuri ba nyirabayazana nyakuri b'amakuba yagwiriye Ibiyaga Bigari no kureka kwikoreza umutwaro abahohotewe."

Yongeyeho ati: "Ibinyoma byabaye byinshi cyane, guceceka kwabaye kwinshi cyane."

Kuva mu 2016, Kanziga akurikiranwa n'umucamanza ukora iperereza ('juge d'instruction'), aho yabaye ahawe inyito y'umutangabuhamya ufashwa ('témoin assisté'), bisobanuye umuntu wumvwa n'umucamanza ari kumwe n'umwunganizi we mu mategeko.

Kuva mu 2007, akurikiranwaho "ubufatanyacyaha muri jenoside" bijyanye n'ikirego cyatanzwe n'imiryango yishyize hamwe mu rugaga ruzwi nka 'collectif des parties civiles pour le Rwanda'. Leta y'u Rwanda yasohoye n'urwandiko mpuzamahanga rwo kumuta muri yombi.

Ubufaransa bwamwimye ubuhungiro ndetse bwanga kumwoherereza ubucamanza bw'u Rwanda ngo bumuburanishe ku byaha akurikiranweho.

Uyu mukecuru wageze mu Bufaransa mu 1998, ubu ahatuye nta byangombwa byo mu rwego rw'amategeko afite.