Anthony Joshua yakomerekeye mu mpanuka yapfiriyemo abantu babiri muri Nigeria

Icyamamare mu mukino w'iteramakofe ku isi Anthony Joshua yakomerekeye mu mpanuka y'imodoka muri Nigeria yapfiriyemo abantu babiri, nk'uko polisi ibitangaza.

Umuryango wa Joshua wemeje ko yakoze impanuka ari mu rugendo yerekeza mu ntara afitemo inkomoko kwizihizanya na bo umwaka mushya.

Igipolisi muri leta ya Ogun cyatangaje ko Joshua n'abandi bantu bakomeretse bahise bihutanwa ku bitaro bitatangajwe.

Iyi mpanuka yabereye ku muhanda munini (expressway) uhuza leta ya Ogun na Lagos umurwa mukuru w'ubukungu wa Nigeria kuri uyu wa mbere.

Joshua w'imyaka 36 uvuka mu Bwongereza afite inkomoko mu mujyi wa Sagamu wo muri leta ya Ogun iri mu majyepfo ashyira uburengerazuba bwa Nigeria.

Polisi yemereye BBC ko Joshua yagiye ibikomere bito.

Amafoto n'amashusho byashyizwe ku mbuga nkoranyambaga yerekana imodoka bivugwa ko bari barimo yangiritse bikomeye.

Adeniyi Orojo, umwe mu babonye iyi mpanuka yabwiye ikinyamakuru The Punch ko imodoka yo mu bwoko bwa Lexus hamwe n'iya Pajero ari zo zagonganye.

Yagize ati: "Joshua yari yicaye inyuma y'umushoferi n'undi muntu iruhande rwe. Hari kandi umuntu wari wicaye iruhande rw'umushoferi, bari bane mu modoka ya Lexus.

"Abashinzwe umutekano we bari mu yindi modoka yari inyuma yabo mbere y'impanuka".

Joshua aheruka kugaragara mu mukino wavuzwe cyane kw'isi wabaye tariki 20 z'uku kwezi aho yatsinze Jake Paul kuri 'knockout' kuri 'round' ya gatandatu.

Uyu mukino bivugwa ko winjirije aba bakinnyi miliyoni 184$ bagabanya ubwabo, mbere y'uko ashyirwaho umusoro.

Amafaranga Joshua yakoreye kuri uwo mukino bivugwa n'ibinyamakuru by'imikino ko atigeze ayakorera mbere ku mukino umwe.

Jake Paul wasigaye yavunitse urwasaya kubera amakofe aremereye ya Joshua ni bwo bwa mbere yari atsinzwe mu mukino w'iteramakofe.

Joshua ubu amaze gutsinda imikino 29 muri 33 amaze gukina.

Umwe mu bo mu muryango wa Joshua utifuje gutangazwa amazina yabwiye BBC ko batunguwe cyane bumvise iby'iyi mpanuka kandi barimo gusenga ngo Joshua n'abandi bari kumwe bakomeretse bakire vuba.

Umuryango wa Joshua wemeje ko yari ari mu rugendo ava muri Lagos yerekeza muri leta ya Ogun aho abo mu muryango we bari bamutekegereje ngo bizihizanye na we ibirori by'umwaka mushya.